Dore impamvu kubaha Imana, bitavuze guhirwa muri byose

“Ibiri muri iki gitabo cy’amategeko ntukarorere kubihamisha akanwa kawe, ahubwo ujye ubitekereza ku manywa na nijoro kugira ngo ubone uko ukurikiza ibyanditswemo byose. Ni ho uzahirwa mu nzira zawe, ukabashishwa byose.”(Yosuwa 1:8)

Imana yadusezeranijeko nituyubaha tuzahabwa umugisha, tugahirwa mu nzira ducamo. Ijambo ry’Imana riraboneye kandi iyo twubashye ijambo ry’Imana duhirwa mu nzira zacu zose tunyuramo.

Ariko se kuki inshuro nyinshi abenshi muri twe gukora icyo Imana idusaba bitunanira?
Abenshi muri twe duterwa agahinda n’igihe twubaha Imana ariko ntitubone ibyo twari twiteze:

• Tujya mu rusengero tugakorera Imana ariko ntitubone umugisha twari twizeye
• Dufasha abakene kuko ijambo ry’Imana ribidusaba, ariko ntitubone ibitugarukira kubyo twatanze.
• Tugerageza kubaha abantu kandi tukabafata nk’uko twifuza ko natwe badufata ariko bo ntibatwubahe kandi bakadufata uko tutabishaka.

Ibi ndetse n’ibindi byinshi tugenda tunyuramo, bitera abakristo guhagarika gukorera Imana, gufasha abakene no kwita ku bantu bayo uko bikwiriye.
Ariko birashoboka ko ibyo twari twiteze bitagenda uko tubyifuza. Bibiliya itubwirako inzira z’Imana atari zo zacu.Inzira zayo zirenze kure izacu kandi uko itekereza kurenze kure uko dutekereza.

“Erega ibyo nibwira si ibyo mwibwira, kandi inzira zanyu si zimwe n’izanjye!” Ni ko Uwiteka avuga. “Nk’uko ijuru risumba isi, ni ko inzira zanjye zisumba izanyu, n’ibyo nibwira bisumba ibyo mwibwira.”(Yesaya 55:8-9)

Bityo rero, dukeneye kumva ko , uko Imana itekereza atari kumwe n’ukwacu. Mu gihe kubona ibyo dushaka/guhirwa , twumva amafaranga, gukundwa cyangwa kubahwa mu isi, ariko ibyo Imana ikora biba ari ukuzuza umugambi wayo.

Mu buzima bwacu tubamo tuvuga ko dusa na Kristo, ariko gusa na Kristo ni ugusa no kubana n’iyi si idukikije duhesha Imana icyubahiro.
Nitwubaha Imana tuzarushaho gusa na Kristo umwana wayo w’ikinege. Dushobora kutagira umutungo , ubukire, kumenyekana imbere y’abantu kudakundwa n’abadukikije ariko mu maso y’Imana dutunze byinshi. Tubona ibyo twifuza kuko twayubashye nk’uko umwana wayo Yesu Kristo yabikoze.

Nshuti , reka twe gutekereza kubyo turarikiye bishira ahubwo dutekereze ku mugisha ugaragara mu maso y’Imana, kandi tuzarushaho kuba nka Kristo nituyubaha.

“Kuko abo yamenye kera yabatoranirije kera gushushanywa n’ishusho y’Umwana wayo, kugira ngo abe imfura muri bene se benshi.(Abaroma8:29)

Sophie @ Agakiza.org