Dore igituma bidukomerera gukunda bagenzi bacu


“Na we aramusubiza ati “ ‘Ukundishe Uwiteka, Imana yawe umutima wawe wose n’ubugingo bwawe bwose n’ubwenge bwawe bwose.’ Iryo ni ryo tegeko rikomeye ry’imbere. N’irya kabiri rihwanye na ryo ngiri ‘Ukunde mugenzi wawe nk’uko wikunda.’ Muri ayo mategeko yombi, amategeko yose n’ibyahanuwe ni yo yuririraho.”(Matayo22:37-40)

Umwami Yesu yatubwiyeko tugomba gukunda bagenzi bacu nk’uko ubwacu twikunda .Aya mabwiriza ntakwiye kugibwaho impaka, dukwiye gukunda bagenzi bacu b’abakristo ndetse n’abatizera badukikije tukabereka urukundo rw’Imana.
Gusa abenshi bisa nk’ibibakomereye gukunda abandi, babibona nk’ibikomeye, ndetse nk’ibidashoboka gukunda bagenzi babo.Bamwe bagerageza kwegera abandi ngo babagaragarize urukundo ariko bikarangira bakomeretse, batabashije kubakunda urukundo Imana ibasaba.

Ese kuki abenshi mu bakristo bananirwa gukunda bagenzi babo?

Impamvu ni uko batarumva neza urukundo rw’Imana, kandi tuba mu isi yanduye aho abantu basayishije ndetse bakaganzwa n’icyaha, ku bw’ibyo abenshi ntibizerako abantu bagira urukundo igihe cyose.
Bityo abakristo bakananirwa gukunda bagenzi babo kuko badashaka gukomereka cyangwa ngo bababare.Ntibashaka kumva ububabare baterwa n’uko biyegereje abandi cyangwa bakaba bakangwa bagasuzugurwa. Ariko ikibazo si ugukomereka babona igihe bagerageje gukunda abandi ahubwo ikibazo ni ubwoba twiyumvamo bwo kuba kwakomereka .

Kuki twiyumvamo ubwoba bwo gukunda bagenzi bacu?

Abakristo benshi bakunda kujya mu nsengero cyangwa mu mahuriro aho baririmba bagashima Imana, aho baba baseka ndetse umwe agahana ikiganza na mugenzi we bishimye n’ibindi byinshi.
Ikintu giteye ubwoba ni uko abakristo bamwe batekerezako kwiyegereza abantu ari ikintu gikomeretsa kandi kikagora kugikora. Bagahora batekereza ko bashobora kwangwa. Ariko mu gihe twumva dufite ubwoba bwo kwangwa, cyangwa ubwoba bwo kwegera abandi , ntakabuza tuzakomereka,maze ntidusobanukirwe urukundo rw’Imana. Kandi mugihe tuzaba tutasobanukiwe urukundo rw’Imana, ntituzabasha na rimwe kurwakira, kandi nitutabasha kurwakira, ntituzabasha gukira ubwoba, ibikomere n’imitima yakomeretse kuko urukundo rutunganijwe rwose rwomora inguma zo mu mutima.

“Mu rukundo ntiharimo ubwoba, ahubwo urukundo rutunganijwe rwose rumara ubwoba, kuko ubwoba buzana igihano kandi ufite ubwoba ntiyari yashyikira urukundo rutunganijwe rwose. Turayikunda kuko ari yo yabanje kudukunda.”(Yohana4:18-19)
Nshuti, urukundo rw’Imana ni urutuma dukunda bagenzi bacu.Niturushaho kumenya Imana no kwakira urukundo rwayo,niko tuzarushaho gukira ibikomere dufite ndetse duture imitwaro n’ubwoba bwose dufite. Nitumara gukira kandi tubohotse niko tuzashobora gukunda bagenzi bacu.

Urukundo rw’Imana ni urwo kuturinda, nta mpungenge y’ibyo twahura nabyo igihe tugerageje gukunda bagenzi bacu ,n’igihe tubashyiriye ubutumwa bwiza. Mu gihe tuzi nezako Imana idukunda, nta kibazo dukwiye kugira n’ubwo twakwangwa tuzira umuhate wo kwamamaza Kristo muri bagenzi bacu. Imana yo ntizigera itureka, idusiga cyangwa ngo itujugunye kandi urukundo ruri muri Kristo Yesu nirwo rutubashisha gukora byose.

“Ni nde wadutandukanya n’urukundo rwa Kristo? Mbese ni amakuba, cyangwa ni ibyago, cyangwa ni ukurenganywa, cyangwa ni inzara, cyangwa ni ukwambara ubusa, cyangwa ni ukuba mu kaga, cyangwa ni inkota?
Nk’uko byanditswe ngo “Turicwa umunsi ukīra bakuduhōra, Twahwanijwe n’intama z’imbagwa.”

Oya, ahubwo muri ibyo byose turushishwaho kunesha n’uwadukunze, kuko menye neza yuko naho rwaba urupfu cyangwa ubugingo, cyangwa abamarayika cyangwa abategeka, cyangwa ibiriho cyangwa ibizaba, cyangwa abafite ubushobozi, cyangwa uburebure bw’igihagararo, cyangwa uburebure bw’ikijyepfo, cyangwa ikindi cyaremwe cyose, bitazabasha kudutandukanya n’urukundo rw’Imana ruri muri Kristo Yesu Umwami wacu.(Abaroma8:35-39)

Abakristo bakwiye kumenyako urukundo rw’Imana ari rwo rubashoboza gukunda bagenzi babo, niyo mpamvu bakwiye kwemerera urukundo rw’Imana rukabakiza, rukabarinda kugirango bagere ku kigero cyo gukunda bagenzi babo .

Sophie @agakiza.org