Dore icyo abakristo basabwa ngo bazahabwe igihugu cy’isezerano

Bibiliya itubwirako ko Imana yari yarateguriye abantu bayo kuba ahantu heza bakarya ku byiza byaho.
Mu gitabo cy’Itangiriro dusoma ko Imana yaremye Edeni. Yari Paradiso, icyaha n’urupfu ntibyaharangwaga. Nta kurenganywa kwahabaga. Abantu n’inyamaswa babanaga neza. Amafaranga ntiyari ikibazo, umunaniro ntiwahabaga.( Itangiriro1-2)

Igihe Adamu na Eva bacumuraga, birukanywe muri Edeni, ntibaba bacyemerewe kuyinjiramo maze bajya guhinga ubutaka kuko ari bwo bakuwemo. Kubera icyaha , twatakaje iwacu, kuba hafi y’Imana.(Itang.3)

Nk’abantu bagizwe abacakara n’icyaha, twabaye imfubyi zatandukanye na Se. twahindutse abagenzi batagira aho bajya. Uko twaba abakire kungana gute, ubwinshi bw’amazu n’amamodoka twatunga, ntibyangana nk’aho twari twarateguriwe kuba ariho Edeni y’Imana.

Mu gitabo cy’Itangiriro, Imana yabwiye Aburahamu gusiga inzu ya se akajya ku butaka bw’isezerano. Tuziko Imana yamusezeranije kuzaba sekuruza w’amahanga, abazamukomokaho bakazaba muri iyo gakondo bahita iwabo.

Ubutaka bw’isezerano Imana izaduha , si igihugu cyangwa ubutaka bushira ahubwo ni ubutaka buzahoraho iteka, ni ahantu hazaba iwacu hahoraho. Aha ni ho abapfuye bizera bahareberaga kure cyane bakahishimira:

“Abo bose bapfuye bacyizera batarahabwa ibyasezeranijwe, ahubwo babiroraga biri kure cyane bakabyishimira, bakavuga ko ari abashyitsi n’abimukīra mu isi. Abavuga batyo baba berekana yuko bashaka gakondo. Iyo baba barakumbuye iyo bavuyemo, baba barabonye uburyo bwo gusubirayo. Ariko noneho barashaka gakondo irusha icyo gihugu kuba cyiza, ari yo yo mu ijuru. Ni cyo gituma Imana idakorwa n’isoni zo kwitwa Imana yabo, kuko yabiteguriye umudugudu.” (Abaheburayo11:13-16)

Nshuti igihugu twasezeranijwe ni mu ijuru ku Mana, ahantu tuzabana n’Imana iteka ryose:
“Numva ijwi rirenga rivuye kuri ya ntebe rivuga riti “Dore ihema ry’Imana riri hamwe n’abantu kandi izaturana na bo, na bo bazaba abantu bayo kandi Imana ubwayo izabana na bo ibe Imana yabo.”(Ibyahishuwe21:3)

Iki nicyo gihugu cy’isezerano ku bantu bose bizera. Abakristo b’amahanga yose basezeranijwe ijuru aho Imana izabana nabo, inzira izatuma tuhinjira iri muri Yesu Kristo.

N’ubwo duhura n’ibigeragezo n’ingorane zitari zimwe mu buzima bwacu hano ku isi, kuba dufite iri sezerano mu mitima yacu ry’iki gihugu biduha ibyiringiro ko tuzasohorayo niba dukurikiye Kristo by’ukuri kuko muri we dufitemo ubuhungiro.

Imibereho yacu hano ku isi,ni iy’igihe gito. Reka tubeho ubuzima buhesha Data icyubahiro tuzi neza ko igihe kizagera tukajya iwacu mu ijuru aho tuzabona tukanaban n’ Imana iteka ryose.

[email protected]