Dore ibikwiye kuranga umuyobozi w’umukristo ushyitse

N’ubwo isi itwereka amahame atandukanye buri muyobozi akwiye kuba afite kugira ngo abashe kuyobora neza, umuyobozi w’umukristo we akwiye kurangwa n’amahame/ imyitwarire Imana imushakaho , kugirango agaragare neza imbere y’amaso yayo.

Ese wifuza kugaragara nk’ukora neza imbere y’Imana? Ukwiye kugira indangagaciro ziturutse mu ijuru. Iyi myitwarire 3 ni yo ikwiye kuranga umuyobozi w’umukristo :


Kwishingikiriza Imana no kubaha ijambo ryayo:
Buri mukristo yifuza kubona ibyo ageraho byubakiye ku Mana no kubaha ibyo ikora. Iyo dusomye muri bibiliya tuhasanga abantu babashije gutsinda kuko Imana bayigize iya mbere kandi bakubaha ijambo ryayo.

Yosuwa igihe yatangiraga kuyobora ,Imana yaramubwiye iti: “Nta muntu n’umwe warinda kuguhagarara imbere iminsi yose yo kubaho kwawe. Nk’uko nabanaga na Mose ni ko nzabana nawe, sinzagusiga kandi sinzaguhāna.”(Yosuwa1:5) . Yosuwa yiringiye Imana yubaha ijambo ryayo, kandi yabonye insinzi yaturutse ku Mana gusa.

Kugira ubushobozi bwo gukurikiza amategeko y’Imana :
Kwishingikiriza ijambo ry’Imana ni urufunguzo rutuma Imana ikugeza ku nsinzi. Ibi bivuze kwishingikiriza ku ijambo ry’Imana haba mu bikomeye cyangwa ibyoroheje, ibyiza cyangwa ibibi, uko ibintu byaba bimeze kose, ukwiye kubaha amategeko y’Imana.

“Icyakora ukomere ushikame cyane, kugira ngo witondere amategeko yose umugaragu wanjye Mose yagutegetse. Ntuzayateshuke uciye iburyo cyangwa ibumoso, kugira ngo ubashishwe byose aho uzajya hose.”(Yosuwa1:7)

Igihe wubashye amategeko y’Imana, bikwemerera kubaho umuzima budakora icyaha.
“Umusore azeza inzira ye ate? Azayejesha kuyitondera nk’uko ijambo ryawe ritegeka. Nagushakishije umutima wose, Ntukunde ko nyoba ngo ndeke ibyo wategetse. Nabikiye ijambo ryawe mu mutima wanjye, Kugira ngo ntagucumuraho.(Zaburi119:9-11)

Abayobozi badashobora kwitondera amategeko y’Imana, bamara igihe kirekire batakaza imbaraga ku bintu bidafite umumaro. Kwemerera ijambo ry’Imana rikaba ari ryo rigushyiriraho umupaka kandi rikakubwira icyo ukwiye gukora ni byo by’ingenzi.


Gukomeza kuyoborwa n’ijambo ry’Imana:
Ijambo ry’Imana niryo ryonyine muyobozi w’ikirenga udufasha kubaho ubuzima bushyitse, bukora neza.

Intumwa Pawulo yagize ati: “Ibyanditswe byera byose byahumetswe n’Imana kandi bigira umumaro wo kwigisha umuntu, no kumwemeza ibyaha bye no kumutunganya, no kumuhanira gukiranuka kugira ngo umuntu w’Imana abe ashyitse, afite ibimukwiriye byose ngo akore imirimo myiza yose. “(2Timoteyo3:16-17)

Umwami Yesu ni we wazanye insinzi ubwo yatsindaga icyaha n’urupfu ni we muntu wenyine watsinze ku isi yose. Yaratsinze akora ibyo umuntu wese atashoboye gukora: yabayeho ubuzima budakora icyaha , abasha no kuzuza ubushake bw’Imana.

Bibiliya itubwirako yari umuntu nkatwe ariko yabashije gukora iby’ubushake bw’Imana. Ese yakoresheje irihe banga, niki cyamushoboje? “Yesu arababwira ati “Ibyokurya byanjye ni ugukora ibyo uwantumye ashaka, no kurangiza umurimo we.”(Yohana4:34)

Umwami Yesu ubwe yavuzeko gukora ibyo Imana ishaka ari byo kurya bye. Bibiliya itubwirako Yesu yamaraga igihe kinini yihererana n’Imana asenga ,igihe gito nicyo yamaraga mu butumwa yigisha, yujuje umugambi wo kudukiza twese aba inzira yatumye twiyunga n’Imana.

Iyi ni imwe mu mirongo igaragaza uburyo Kristo yubashye ijambo ry’Imana:

• “Yesu arabasubiza ati “Ni ukuri, ni ukuri, ndababwira yuko ari nta cyo Umwana abasha gukora ubwe atabonye Se agikora, kuko ibyo Se akora byose n’Umwana ari byo akora.(Yohana5:19)

• “Kuko ntavanywe mu ijuru no gukora ibyo nishakiye, ahubwo nazanywe no gukora ibyo uwantumye ashaka”(Yohana 6:38)

• “……..kandi amaze kuboneka afite ishusho y’umuntu yicisha bugufi, araganduka ntiyanga no gupfa ndetse urupfu rwo ku musaraba.”(Abafilipi 2:7- 8)


Kristo ni urugero rwiza rwo gusohoza ibyo Imana ishaka. Dukwiye gukurira mu buyobozi busa nk’ubwa Kristo dukora ibijyamye n’ ijambo ry’Imana.

Sophie @ agakiza.org