Dore amasomo wa kura kuri Puwa na Shifura, ababyaza bahesheje Imana icyubahiro

Bibiliya igaragaza abantu bamwe na bamwe bagiye bagaragara agahe gato ariko bakaba bafite amasomo meza yadufasha mu buzima tubamo bwa buri munsi.Abo ni Shifura na Puwa ababyaza bakoze iby’ubutwari bashimisha Imana ,ubwo banganga kumvira umwami ku itegeko yari yashyizeho ryo kwica abana ba b’abahungu .

Shifura na Puwa bagaragara gato muri bibiliya.Tubasoma mu gitabo cyo Kuva1:15-21, mbere y’uko Mose avuka.Aba bagore babiri(2) bari ababyaza mu gihugu cya Egiputa, bakaba barakijije benshi mu gihe umwami Farawo yari yatanze itegeko ry’uko abana b’abahungu bakwiye kwicwa.

“Hariho ababyaza b’Abaheburayokazi umwe yitwa Shifura, undi yitwa Puwa. Umwami wa Egiputa arababwira ati “Nimubyaza Abaheburayokazi mukabona bicaye ku ntebe babyariraho, nihavuka umuhungu mujye mumuhotora, ariko naba umukobwa abeho.” Maze abo babyaza bubaha Imana, ntibakora ibyo bategetswe n’umwami wa Egiputa, ahubwo bareka abahungu babaho.”(Kuva1:15-17)
Shifura na Puwa banze kumvira itegeko ry’umwami Farawo, bareka abana babaho ,maze Imana ibahera umugisha mu murimo wabo, ibaha urubyaro ,ubwo bwoko buragwira .

“Umwami wa Egiputa ahamagaza abo babyaza, arababaza ati “Ni iki cyatumye mukora mutyo, mukareka abahungu bakabaho?” Ababyaza basubiza Farawo bati “Ni uko Abaheburayokazi batamera nk’Abanyegiputakazi, kuko ari abanyambaraga, bakabyara umubyaza atarabageraho.” Imana igirira neza abo babyaza, ubwo bwoko buragwira, burakomera cyane. Kandi kuko abo babyaza bubashye Imana, ibaha urubyaro, baba imiryango.”(Kuva1:18-21

Aba babyaza 2 baraduha amasomo y’ingenzi muri uru rugendo rw’ubukristo bwo kugira ub’umuntu no gutinya Imana:

1.Tugomba gutinya Imana aho gutinya abantu

Aba babyaza 2 bashoboraga no kwicwa kubwo gusuzugura umwami. Ese ni kuki bamusuzuguye?Impamvu ni uko bubahaga Imana kandi bakayitinya.
Ugutinya Imana kwa Shifura na Puwa byatumye badakora ibyo umwami yabasabye maze barabisuzugura. Igihe tutazagira umuntu dutinya udutegeka gukora ibikorwa bibi, uretse Imana tuzaba intabera bityo twubahe n’amategeko y’Imana.
“Umukiranutsi wiyoroshya imbere y’abanyabyaha, Ameze nk’iriba ritobamye n’isōko yandujwe.” (Imigani 25:26)

2. Dukwiye guha agaciro ubuzima

Ababyaza barengeye ubuzima bw’abana bari bategetswe kwica.Aba bana bato n’ababyeyi babo nta sano bari bafitanye uretse ko bari Abaheburayo, ariko banze gukora ibyo umwami yifuzaga ku bushake bwabo maze batuma abana babaho.
Aba babyaza baratwigisha guha agaciro ubuzima. Kandi ko tugomba guhaguruka tukavugira abantu batagira shinge na rugero.
“Bumbura akanwa kawe uvugire ikiragi, Kandi uburanire abatagira shinge na rugero. Bumbura akanwa kawe uce imanza zitabera, Ucire abakene n’indushyi urubanza rutunganye.” (Imigani31:8-9)

3. Menya ko Imana ireba ibitekerezo n’ibikorwa byacu.

Aba babyaza ntibigeze basenga ibigirwamana cyangwa ngo bubahe itegeko ry’ubugome ry’umwami , ahubwo bagambirira mu mutima wawo kutica aba bana , maze bakora ibishimisha Umwami Imana abana babaho kuko bamenye ko Imana ireba aho turi hose kandi izi n’imitekerereze yacu.

“Uwiteka, warandondoye uramenya, Uzi imyicarire yanjye n’imihagurukire yanjye, Umenyera kure ibyo nibwira. Ujya urondora imigendere yanjye n’imiryamire, Uzi inzira zanjye zose. Kuko ijambo ritaraba mu rurimi rwanjye, Uba umaze kurimenya rwose, Uwiteka.”(Zaburi139:1-4)
“Naho yanyica napfa nyiringira, Nubwo bimeze bityo, inzira zanjye nzazikomeza imbere yayo. 16Ibyo na byo bizambera agakiza, Kuko ari nta muntu uhakana Imana uzaza imbere yayo” (Yobu 13:15-16).

Imana izi buri kantu kose ko mu mibereho yacu. Bityo,tugomba kubaho ubuzima bushimisha Imana, n’ubwo bushobora gushyira mu kaga ubuzima bwacu igihe twanze gukora ikibi, tugatinya Imana yo itanga ubuzima buhoraho.

Sophie @agakiza.org