Dore Impamba korali Elayono ya ADEPR Remera Izahagurukana I Kigali

Korali Elayono ibarizwa mu mujyi wa Kigali mu itorero rya ADEPR Paruwase ya Remera, ikaba ari imwe mu makorali akomeye abarizwa hano mu Rwanda binagaragazwa na bimwe mu bihembo bagiye bahabwa n’abayobozi batandukanye b’ igihugu ndetse n’ abikorera. Kuri ubu bagiye kwerekeza mu intara y’ amajyepfo mu itorero rya karere ka Huye Paruwase ya Matyazo kuri uwo mudugudu.

Korali Elayono yakunze kwagura umurimo w’Imana, mu buryo bwose kuko usanga bakomeje gukoresha ikoranabuhanga hagamijwe kwamamaza Yesu Kristo nk’umwami n’ umukiza.

Pastor Charles wo muri Paruwase ya Matyazo Umudugudu wa Matyazo mu itorero ry’ Akarere ka Huye ururembo rw’Amajyepfo, yagize ati “Igiterane cyatangiye tariki ya 16 kikazasozwa ku itariki ya 22/07/2018 kikaba cyaratangijwe n’amasengesho y’ ibyiciro bitandukanye harimo n’abayozi b’ itorero ryacu, ku munsi wo kuwa Gatandatu nibwo dutegereje Korali Elayono izaturuka I kigali tukazabana nayo guhera mu gitondo kugeza ni mugoroba tukazanakomezanya nabo no ku cyumweru umunsi wose, Igiterane twagihaye intego iboneka mu “Abakorinto8:3” turashaka kubwira abantu ubutumwa tukanabakundisha Imana””

Umuyobozi wa Korali Elayono Madam Marora Genevieve yavuze ko mbere ya byose bashima Imana ijya ijyenda ibiyereka mu ngendo z’ivugabutumwa bakora ndetse zigatanga umusaruro kuko zisiga habonetse umubare w’abantu benshi bakira agakiza kandi nyuma bakumva ubuhamya bwabo ko bakomeje gushikama mu mwami, avuga kandi ko ntakabuza ko bizeyeko Imana izabana nabo muri uru rugendo rw’Iminsi 2.

Bwana Mwiyeretsi Alain Samson, ni umutoza wa Korali Elayono yagize ati “kuruhande rwacu imyiteguro imeze neza cyane, icyo nabwira abazitabira iki giterane bazabasha kumva umuziki w’umwimere n’indirimbo nziza z’ivugabutumwa ryihanisha abanyabyaha, zizahumuriza abanyamibabaro ikindi kandi nuko tuzakoresha umwimerere w’ umuziki w’indirimbo shyashya zacu zirigukorwa muri Studio” Yakomeje avugako, Korali Elayono yamamaza ubutumwa babinyujije kuri websites zitandukanye mu gihugu, kuri facebook, kuri Flickr.com (Amafoto), kandi ko bafite konti kuri Youtube.com iriho ibihangano byabo kuburyo buri wese, aho yaba ari hose ku isi yoroherezwa kugera ku ndirimbo zabo z’amashusho.

Elayono ivuga ko izaruhuka ihawe ingororano na Yesu dore ko kugeza ubu ibikorwa byayo bimaze kugera mu bihugu birimo Ububiligi, Ubufaransa, Ubwongereza, Esipanye, Ubushinwa, Leta Zunze Ubumwe z’Amerika, Ubuhinde, Afurika y’Epfo, Sudani, Burundi, Uganda n’ahandi kandi intego ni ugusakaza ubutumwa mu isi yose dore ko ari cyo Imana isaba abakozi bayo.

Korali Elayono guhera mu mwaka 2011, nibwo batangiye gukora ivugabutumwa binyuze mu bihangano byayo byoherezwa hirya no hino mu bihugu bigize isi, aho byahitaga bigezwa ku babyifuza bifashishije uburyo bw’ikoranabuhanga rya murandasi (internet).

Mu Mwaka 2012 nibwo Korali Elayono yashyikirijwe Impamyabumenyi (Certificate) n’ uwari Minisitiri w’Urubyiruko n’Ikoranabuhanga Bwana Nsengimana Philbert, nka korali yafashe amahugurwa mu birebana no gukoresha ikoranabuhanga. Naho mu 2013 yahawe ishimwe (SIFA Award 2013) nka korali yabaye iya mbere muri korali zo mu Rwanda nk’ikoresha cyane ikoranabuhanga mu ivugabutumwa.

[email protected]