Byinshi wamenya ku Mwuka Wera

Dushobora kutabonesha amaso Umwuka Wera ariko aba muri twe, abana natwe iminsi yose binyuze muri Kristo. Umwuka wera w’Imana abakristo bose bakwiye kumumenya. Ni umwuka uba muri buri muntu wizera Kristo, ni umwuka umwe nk’uwazuye Kristo mu bapfuye kandi ni umwuka utwemerera kuzabona umugabane mu bwami bw’Imana.

Abakristo benshi bagira imyumvire itari yo ku mwuka Wera ariko ni umwe mu butatu bugize Imana, akaba afite imbaraga n’ubushobozi. Bibiliya itubwirako ari Umwuka w’Imana ufite imbaraga zaremye ibintu byose.

« Imana iravuga iti “Tureme umuntu agire ishusho yacu ase natwe, batware amafi yo mu nyanja, n’inyoni n’ibisiga byo mu kirere, n’amatungo n’isi yose, n’igikururuka hasi cyose.” Imana irema umuntu ngo agire ishusho yayo, afite ishusho y’Imana ni ko yamuremye, umugabo n’umugore ni ko yabaremye. »(Itangiriro1 :26-27)
Tuziko mu byanditswe , Imana ari imwe mu batatu: Data, umwana n’Umwuka Wera. Yaremye umuntu mu ishusho yayo: umwuka ukaba utuye muri uyu mubiri. Umwuka wera w’Imana ariho, aba muri buri mukristo wese kandi akamuha ubushobozi bwo kuba icyaremwe gishya muri Kristo.

Mbere ya Kristo, umwuka w’Imana ntiwabaga mu bantu b’Imana ngo ubagumeho ubafashe gukora iby’ubushake bw’Imana. Umwuka wera w’Imana yajyaga aza akongera akagenda.Nyuma ya Kristo, Imana yahinduye ibintu uko byari biri, yatabuye umwenda wari mu rusengero ubwo Kristo yabambwaga ku musaraba, byerekana gukuraho igikuta cyari hagati y’Imana n’umuntu- bityo twiyunga nayo binyuze muri Kristo.

Umurimo wo kunga Imana n’abantu warangiriye muri Kristo. Iyo twizeye Yesu tukaza aho ari, Imana ishyira umwuka wera wayo muri twe akaduturamo, agafata icumbi akatugira urusengero.

“Ni we namwe mwiringiye mumaze kumva ijambo ry’ukuri, ari ryo butumwa bwiza bw’agakiza kanyu, kandi mumaze kwizera ni we wabashyizeho ikimenyetso, ari cyo Mwuka Wera mwasezeranijwe, uwo twahawe ho ingwate yo kuzaragwa wa murage kugeza ubwo abo Imana yaronse izabacungura. Ubwiza bwayo bushimwe.(Abefeso1:13-14)

Mu bihe byo mu isezerano rya Kera umwuka wera yajyaga aza akongera akagenda , ariko ubu turi muri Kristo aba muri twe kandi ntidukeneye urusaku ngo tumenye ko ari kumwe natwe.

Abakristo bamwe kubwo kutizera bumva ari bonyine bagatekerezako Imana yabaretse ariko Umwuka w’Imana ahorana natwe kandi ntazadusiga na hato cyangwa ngo atureke(Abaheburayo13:5) .

Sophie @agakiza.org