Bimwe mu bituma umukristo agwingira

Muri iyi minsi mu matorero menshi ,abakristo bavuga ko bakuze ariko wareba neza ugasanga ibikorwa byabo bihabanye n’ibiranga umukristo ukuze mu by’umwuka,ariko ni ngombwa ko abantu bitwa ko bamenya Imana bakura kugira ngo bazabashe kwinjira mu bwami bwo mu ijuru.

1. Kudasoma Bibiliya

Kumva ijambo ry’Imana ku cyumweru kandi na ho urisomewe n’umwigisha bigwingiza umukristo kuko nta ntwaro aba afite irimo amasasu,kuko igihe cyose haje umuhakanya ntashikama mu byo yizeye . Bibiliya ni igikoresho cy’ibanze Imana ikoresha kugira ngo ikuze umukristo mu buryo bw’umwuka.Bibiliya ni ibyahumetswe n’Imana kandi muri yo ni ho hagaragara urukundo ruhebuje rw’Imana ku muntu n’umugambi wayo kub’ubuzima bw’ikiremwamuntu.

Gerageza kubaho mu buzima ugendeye kuri bibiliya kugira ngo urusheho gushaka kwera kw’Imana, mu gushaka ubutunzi n’amahoro. Byagorana kubona umukristo ukura adasoma ijambo ry’Imana kuko usanga ntacyo afite cyo kuvuga kuko atagaburira ubugingo.

2. Kudasenga

Imana iteka ihora ihuze kuko iba ifite ibyo irigukora. Ntabwo umuntu ashobora kuyibona mu gihe yagira ikindi cyose akora kidafitiye Imana umumaro. Iyo usenze uba ukurura umutima w’Imana bigatuma hari inzugi z’umugisha zifunguka. Gusenga ni umwanya mwiza wo kuganira n’Imana uyishima cyangwa se uyibwira ibibazo byawe. Ntabwo umukiristo ashobora gukura adesenga kuko yakwicwa n’amaganya y’isi.

3.Kutagira uwo mugendana ukijijwe

Ubukristo bukurira mu kubana.Niba udashaka kugwingira ,shaka incuti musengana cyangwa muvugana ku buzima buturuka muri bibiliya.uko ubifatira igihe kandi ukagira umuhate bishobora kugushyira mu kindi cyiciro. Mu buzima bwawe buto uba usigaje ku isi, gerageza ushake inshuti nziza izagufasha gukura kugera kukigero cyuzuye.

4. Kudatanga icyacumi n’amaturo

Kugira neza ni imwe mu ntwaro ya bibiliya igaragaza gukura mu mwuka ku buzima bw’abizera.Bibiliya ivugako iyo twubashye Imana dutanga icya cumi, idusezeranya kutugomorera imigisha n’imvura y’umugisha.

5.Kutagira umurimo ukora aho usengera

Kugira umurimo ukora bisa nko kubiba imbuto mu gitaka.Bituma imizi yacu ibona aho ishorera ,igatangira kugaburira umwuka. Ni ngombwa kugira umurimo ukorera mu nzu y’Imana kugira ngo uwo murimo uzaguherekeze no mu bwami bwo mu ijuru.

6.Kutaba umuntu uhamye

Kudahinduka ni nk’umusemburo ukwirakwiza ibituma umuntu akura vuba vuba.Guhindagurika bishobora kugwingiza bikagira ingaruka ku buzima bw’umukristo.
Umukristo nyawe ni ugendana n’Imana akamenya guhagarara kubyo yamenye ntatembanywe n’imiyaga iyo ariyo yose ishobora kumugusha mu cyaha. Kandi ntabwo wikwiye umukiristo kuba nyamujyijyanino(kugenda nta nego afite y’urgendo). Nta mpamvu yo gusamira hejuru ibije byose utazi ibyo aribyo.

Abakristo bakwiye guharanira kugendera kure ibintu byose bituma badakura, ahubwo bakimika Imana mu mitima yabo kandi bagakora ibyo ishaka.

[email protected]