Bimwe mu bimenyetso biranga uwatewe n’abadayimoni n’uburyo wabarwanya

Abantu benshi bakunze guhinyura ko hari umwanzi utagaragara ukora ibishoboka byose ngo asenye ubuzima. Bibiliya itubwirako dufite umwanzi udafite inyama n’amaraso - umwanzi n’abamufasha(abadayimoni). Ariko ntashobora gutuza gukora ibishoboka byose ngo adusenye , atubuze kubona Imana n’ agakiza kayo.

Amwe mu mayeri satani akoresha nk’intwaro ye mu gusenya ni abazwi nk’abadayimoni. Ese waruziko buri muntu ashobora kugira umudayimoni cyangwa agakoreshwa n’umudayimoni? Iyi nkuru ntigamije kugutera ubwoba, ahubwo iragufasha kumenya ukuri n’uburyo wabasha kubaneshereza mu nsinzi ya Yesu no kubaho mu mudendezo w’Umwami Yesu Kristo.

Bibiliya itwereka abantu bari bafite dayimoni, bari baratewe n’imyuka itagaragara(abadayimoni) bagaragazaga ibimenyetso bitandukanye :

1. kurangwa no gutigita

Mariko 1 :23-28 hatwereka umuntu wari watewe n’umwuka utagaragara. Uyu muntu yaratigise cyane ubwo Yesu yacyahaga uwo dayimoni wari umurimo.

«Mu isinagogi yabo harimo umuntu utewe na dayimoni, arataka cyane ati “Duhuriye he Yesu w’i Nazareti? Uje kuturimbura? Ndakuzi uri uwera w’Imana.” Yesu aramucyaha ati “Hora muvemo.” Dayimoni aramutigisa, ataka ijwi rirenga amuvamo. Bose baratangara barabazanya bati “Ibi ni ibiki? Ko ari imyigishirize y’inzaduka! Mbega uburyo ategekana ubutware, n’abadayimoni na bo baramwumvira!” Uwo mwanya inkuru ye yamamara hose, mu gihugu cyose gihereranye n’i Galilaya. ”(Mariko1 :23-28)

2. Kurwara indwara nyinshi

Mariko 1:32-34 hatwereka uburyo abantu bari barwaye indwara zitari zimwe hamwe n’abatewe na dayiyoni babazaniye Yesu akabakiza. Aba badayimoni bari barateje abantu kugira indwara zitari zimwe.

“Nimugoroba izuba rirenze, bamuzanira abarwayi bose n’abatewe n’abadayimoni, ab’umudugudu wose bateranira ku irembo. Akiza benshi bari barwaye indwara zitari zimwe, yirukana abadayimoni benshi, ntiyabakundira ko bavuga kuko bari bamuzi.”(Mariko1:32-34)

3. Kugira imbaraga zidasanzwe, gutakaza ubwenge ukaba umusazi

Mariko5:1-13 , tuhasoma umuntu wari ufite abadayimoni benshi bazwi nk’igitero. Bibiliya itubwirako yari afite imbaraga nyinshi ku buryo yacagaguraga ingoyi akavunagura n’iminyururu babaga bamubohesheje, akikebaguza n’amabuye.

“………. Yomotse, uwo mwanya umuntu utewe na dayimoni ava mu mva, aramusanganira. Yabaga mu mva, ntawari ukibona icyo ashobora kumubohesha n’aho waba umunyururu, kuko kenshi bamubohesheje ingoyi y’amaguru n’iminyururu y’amaboko, maze ingoyi akayicagagura n’iminyururu akayivunagura, ntihagira umuntu ubasha kumuhosha .Iteka ryose ku manywa na nijoro, yahoraga mu mva no ku misozi asakurizayo, yikebesha amabuye. …….”(Mariko5:1-13)

4. Ubuhumyi n’uburagi

Matayo 12:22 hatubwira umuntu wari impumyi n’ikiragi yarabitewe n’abadayimoni. Yesu yaramukijije amuha kubona no kuvuga. “Maze bamuzanira impumyi yari ikiragi itewe na dayimoni, arayikiza. Uwari ikiragi avuga ubwo kandi arahumuka.”(Matayo12:22)

5. Guhunga Imana

Luka22:3-6 hatubwira uburyo dayimoni ashobora gutera n’umuntu wagendanaga na Yesu akamugambanira. Dusoma uko Yuda Isikariyota yagiye kureba Abafarisayo nyuma y’uko satani amwinjiramo.

“Satani yinjira muri Yuda witwaga Isikariyota, yari mu mubare w’abo cumi na babiri. Aragenda avugana n’abatambyi bakuru n’abatware b’abasirikare, uko azamubagenzereza. …...”(Luka22:3-6)

Kimwe n’indi mirongo myinshi yo muri bibiliya, iratwemezako abadayimoni bashobora guteza uburwayi, ubumuga, ubusazi, ndetse bakadukura mu kwizera. “Ariko Umwuka avuga yeruye ati “Mu bihe bizaza bamwe bazagwa bave mu byizerwa, bīte ku myuka iyobya n’inyigisho z’abadayimoni”(1Timoteyo4:1)

N’ubwo satani n’abadayimoni batera abantu , Kristo yerekaniwe kutubohora no kumaraho ibikorwa by’umwanzi. “Ukora ibyaha ni uwa Satani, kuko uhereye mbere na mbere Satani akora ibyaha. Ibyo Umwana w’Imana yerekaniwe ni ibi: ni ukugira ngo amareho imirimo ya Satani. (1 John 3:8)

Kristo yaje kugirango amareho imirimo ya satani, adukize. Ese ni iyihe mirimo ya satani? Adutera gukora icyaha(Itang.3). iyo ducumuye, tuba twemereye satani kutugira imbata(Abaroma6:16). Umuntu wese ukora icyaha hanyuma ntacyihane ahora mu bubata bw’icyaha akajya kure y’imbabazi z’Imana.((1Yohana1:9). Dukwiye rero kubererekera satani(Abefeso4:27)

Yesu afite ubushobozi bwo gukura buri muntu mu bubata bwa satani. Iyo dusomye mu butumwa bwiza dusanga ko yakijije buri muntu wari ufite abadayimoni, akabirukana. Na n’uyu munsi aracyakora nk’ibyo, kandi aha ubushobozi abari muri we bwo kubirukana.

Niba twizera Kristo, buri mudayimoni cyangwa ikindi cyose cyadutera cyangwa cyaduhindura twacyirukanamu gihe twihannye ibyaha byacu tukabijyana ku mwami Yesu. Ni we wadukijije ubutware bw’umwijima, akadukuramo akatujyana mu bwami bw’umwana we akunda.( Abakolosayi1:13).

Ubwo turi muri Kristo kandi tukaba twarakuwe mu bubata bwa satani, ni inshingano zacu gukomeza kwizera kandi tugafasha n’abandi gukira mu izina rya Yesu:

“Arababwira ati “Mujye mu bihugu byose, mwigishe abaremwe bose ubutumwa bwiza. Uwizera akabatizwa azakizwa, ariko utizera azacirwaho iteka. Kandi ibimenyetso bizagumana n’abizera ngibi: bazirukana abadayimoni mu izina ryanjye, bazavuga indimi nshya, bazafata inzoka, kandi nibanywa ikintu cyica nta cyo kizabatwara na hato, bazarambika ibiganza ku barwayi bakire.”(Mariko16:15:18)

Sophie @agakiza.org