Avoka, urubuto rw’ingenzi ikaba n’umuti w’indwara zibasira umubiri.

Avoka (avocado mu cyongereza, avocat mu gifaransa) iri mu bwoko bw’imbuto ziribwa kandi igirira akamaro umubiri wacu. Si ibi gusa ahubwo avoka ituma umubiri ukora neza ndetse ikavura indwara zinyuranye.

Imbuto zigize igice kimwe mu biribwa umubiri ukenera. Zifitiye umubiri umumaro ntagereranywa. Mu by’ukuri, kurya imbuto zitandukanye byongera ubudahangarwa bw’umubiri mu kurwanya indwara. Avoka ni ingenzi cyane mu kunoza imikorere y’umubiri, ari nayo mpamvu biba byiza kuyirya incuro nyinshi mu cyumweru.
Avoka yirukana impumuro mbi mu kanwa

Kugira impumuro mbi mu kanwa ni ikintu umuntu wese yanga kadi gitera ipfunwe. Kugirango ubirwanye, ukwiye kurya avoka kuko izagufasha gusubirana umwuka mwiza. Guhumura nabi mu kanwa biterwa n’uko amara (intestins) aba adafite isuku, avoka rero yoza amara bityo umwuka ukaba mwiza.

Avoka irinda amaso
Bitewe na vitamine A iba muri avoka, umuntu urya avoka kenshi imurinda uburwayi bw’amaso harimo ubuhumyi, kimwe n’izindi mbuto zose zagufasha kugira amaso mazima.

Avoka ituma umutima ukora neza.
Ku isi yose indwara y’umutima ni ikibazo gihangayikishije abantu benshi. Ku bw’iyo mpamvu, ukwiye kurya avoka inshuro nyinshi kugirango umutima wawe ubashe gukora neza. Avoka ifasha imitsi ijyana amaraso mu mubiri kuko igabanya ibinure bifata kuri iyo mitsi bikayifunga ntibashe gutwara amaraso uko bikwiye.

Avoka irinda umubiri kurwara kanseri
Avoka ifite ubushobozi bwo kurwanya kanseri yo mu maraso , inzira z’ubuhumekero, kanseri yo mu magufwa ndetse na kanseri y’amabere.

Avoka ifasha umuntu kugabanya ibiro
Abantu benshi bahangayikishijwe n’ikibazo cyo kugira ibiro byinshi, nyamara avoka ni igisubizo kuko yongerera umubiri uburyo bwo gukoresha amasukali uko bikwiriye. Ikindi kandi avoka ituma umuntu atagira ikibazo cya constipation.

Irwanya diyabete
Muri avoka habamo (oleic acid) iyi aside ishinzwe kurwanya diyabete, igabanya umusemburo witwa cholesterol mu gihe wabaye mwinshi mu mubiri ndetse ikagenzura urugero rw’isukari rukwiriye mu mubiri.

Ifasha uruhu kugubwa neza.
Hamwe no kurya avoka, wagira uruhu rutoshye kandi runyerera kuko igira vitamie C na E zituma uruhu rubasha gukweduka (elasticity). Urugero: mu gihe cyo gutwita izi vitamine zifasha uruhu rw’umubyeyi gukweduka.

Ibyiza bya avoka ni byinshi mu gihe ikoreshejwe ku rugero rukwiye ndetse twayifata nk’urukingo ruturinda zimwe mu ndwara zavuzwe, erega amagara araseseka ntayorwa kandi kwirinda biruta cyane kwivuza.