Amwe mu magambo Yesu yavuze akamamara cyane

Ijambo Yesu yavugaga ryose yavugaga ryose ni iry’ubwenge kandi ry’ukuri. Amwe mu magambo ye yaramamaye cyane akoreshwa n’abakomeye n’abaroheje ndetse yinjira mu magambo yagiye avugwa n’abahanga bakomeye kubera uruhare yagize ku mpinduka z’abantu benshi abizera ndetse n’abatizera. Nubwo amagambo Yesu yavuze ari menshi cyane kuburyo hari n’ataranditswe, hepfo gato hari amagambo icumi tugiye kubagezaho, andi ni ubutaha:

“Kandi uko mushaka ko abantu babagirira , abe ariko mubagirira namwe.” (Luk 6:31)

Iyi mvugo ya Yesu yaramamaye ku isi hose kandi riba nk’itegeko ku bantu bose bifuza ibyiza mu buzima. Uyu muti wa Yesu wo kubaka umubano mwiza mu bantu kandi hashingiye ku gaciro n’uburenganzira buri wese afite, wabaye ihame ku bantu bose batuye isi.

“Ni jye nira n’ukuri n’uugingo. Ntawujya kwa Data ntamujyanye.” (Yoh 14:6)

Yesu avuga ibyo urupfu rwe, Abigishwa be byarabababaje bacika n’intege. Yesu mu kubahumuriza, ababwira ko agiye mu ijuru kubategurira aho bazaba kimwe n’abandi bamwizera bose (Yoh 14:2). Arongera ati, “kandi aho njya inzira murayizi”. Mu gushidikanya kwinshi, Toma yamubajije inzira igana kwa Data cyangwa aho yajyaga kujya, maze Yesu abasubiza ko ari we nzira rukumbi ijya mu ijuru. Iri jambo Yesu yavuze ko ariwe nzira, ukuri n’ubugingo ni naryo hame cyangwa se ishingiro ry’ubukristo. Niryo rigaragaza Yesu uwo ari we kandi rikagaragaza rikanakumira uburyo umuntu ashobora kwakira agakiza, ko kabonerwa mu kwizera urupfu rwa Yesu no kuzuka kwe.

“Ariko jyewe ndababwira nti mukunde abanzi banyu, musabire ababarenganya.” (Mat 5:44)

Iri jambo ryavugiwe ku musozi w’imigisha, ryabaye rishya kandi ritungura ubwoko bw’Abayuda. Mu Balewi 19:18, Uwiteka yategetse Abisiraheri ati, “Ntugahore, ntukagirire inzika abo mubwoko bwawe, ahubwo ukunde mugenzi wawe nk’uko wikunda. Ndi Uwiteka. Iyi mvugo Abisiraheri bayumvise nabi, bumva ko bagomba gukundana mu bwoko bwabo gusa. Mugihe cya Yesu, Abayuda, cyane cyane Abafarisayo, bari ku ntebe y’amategeko ya Mose bumva ko aribo bakora ndetse ibyo Imana ishaka. Bityo Yesu yashakaga kwagura ubumenyi bwabo kubyerekeye urukundo, ko batagomba kumva ko bagenzi babo ari ubwoko bw’Abayuda gusa ahubwo n’andi moko bitaga n’abanzi babo. Iri jambo Yesu yavuze n’ubu abakristo ba none baracyaryubatseho.

“Njye na Data turi umwe.” (Yoh 10:30)

Iri jambo Yesu yarivuze asubiza imbaga y’Abayuda bari bamukikije mu rusengero, ku kibazo bari bamubajije bati: “Niba uri Kristo utwerurire” (Yoh 10:24). Yesu yabasubije atyo nk’ubacyaha kuko yari yaragaragarishije ko ari Kristo imirimo n’ibitangaza yakoze. Anababwira ko ari umwungeri w’intamna kandi umwungeri apfira intama ze, ndetse avuga ko ari umwe na Data. Abari aho basobanukiwe neza uwo Yesu ari we: ko ari Imana yigize umuntu. Kubera ayo magambo, Abayuda bashaka kumutera amabuye ngo kubera ko yigereranyije. Yesu abacamo arigendera ariko nubundi baje kukigira ikirego cy’impamvu yo kumubamba.

“Ntimukiganyire mutekereza iby’ejo kuko ab’ejo baziganyira iby’ejo n’umunsi wose ugakwiranye n’ibibi byawo.” (Mat 6:34)

Aya magambo yesu yayavuze ahugura abigishwa be kutiganyira kutiganyira. Nta mpamvu yo guhangayikira ibyo kurya n’imyambaro. Atari uko Yesu atwibutsa urukundo adukunda akanatwitaho gusa, (Mat 6:26–30), ahubwo ibyo yabigize iby’ibanze. Bityo natwe ishingano yacu ni ugushaka ubwami bw’Imana no gukiranuka, ibindi tuzabyongererwa.

“‘Ukundishe Uwiteka , Imana yawe umutima wawe wose n’ubugingo bwawe bwose n’ubwenge bwawe bwose.’

Iryo niryo tegeko rikomeye ry’imbere. N’irya kabiri rihwanye naryo ngiri’ukunde mugenzi wawe nk’uko wikunda.’ Muri ayo mategeko yombi, amategeko yose n’ibyahanuwe niwe yuririraho.” (Mat 22:37–40)

Muri aya magambo, Yesu yagarutse ku mategeko abiri yo mu isezerano rya kera aboneka mu Gutegekwa kwa kabiri 6:5, Abalewi 19:18. Aya mategeko uko ari abiri ashingiye ku rukundo. Kandi kugira ngo umuntu agire imibereho myiza akwiriye gukunda Imana ndetse n’abantu aribo mugenzi we (Abaglat 5:14).

“Ugukubise urushyi mu musaya w’iburyo, umuhindurire n’uw’ibumoso.” (Mat 5:39)

Mu murimo we, akenshi Yesu yayoboraga abantu kutirebaho cyane. Itegeko ryo guhindura umusaya ni rumwe mu ngero zibigaragaza. Bitewe na kamere muntu, iyo umuntu aduhemukiye twihutira kurakara no kumwishyura. Nyamara Yesu adusaba kureka kamere zacu kugira ngo twambare kamere y’Imana. Aho kugira ngo ikibi kishyurwe ikindi, abaduhemukira tubishyure kubacira bugufi no kubasabira umugisha (1 Pet 3:9).

“Ariko benshi b’imbere bazaba ab’inyuma kandi ab’inyuma bazaba ab’imbere.” (Mat 19:30)

Na none Yesu yongera kubwira abigishwa kubyerekeye abayobozi. Avuga ko kwicisha bugufi mu bwami bwo mu ijuru aricyo gihabwa agaciro kurenza icyubahiro, ubutunzi ndetse no gukomera k’umuntu uwo ariwe wese. Yongeye kugaruka kuri iki gitekerezo mu butumwa bwiza bwa Matayo 20:1-16 aho avuga abahinzi bahinze bagahembwa idenariyo imwe kandi uhemba agahera kubaje nyuma.

“Ibya Kayizari mubihe Kayizari, n’iby’Imana mubihe Imana.” (Luk 20:25).

Umwami Yesu yareruye agaragaza itandukaniro riri hagati y’ubwami bwo mu isi n’ubw’Imana, kandi anatwereka inshngano zacu muri ubwo bwami bwombi. Tugomba kubaha ubutegetsi tunakurikiza amategeko y’igihugu tubamo kandi tugomba no gukorera Imana tuyubaha. Aya magambo Yesu yayabwiye abantu bamugerageje bashaka kumugusha mu mutego, ubwo bamubazaga niba ari byo gutanga umusoro. Iki gisubizo Yesu yabasubije kirimo ubwenge bwinshi kandi ni icy’ukuri.

“Muri mwe udafite icyaha , abe ari we ubanza kumutera ibuye..” (Yoh 8:7).

Bamwe mu banditsi n’Abafarisayo bazanye umugore, bafashe asambana, aho Yesu yari arimo yigisha (John 8:2–4). Bashaka kumenya icyo Yesu aribuvuge ko bakorera uwo mugore. Abazanye umugore bafashe asambana ntibazanyen’umugabo basambanaga byumvikane ko batari bitaye kubyamukorerwa byose ari ikiza cyangwa ikibi, gusa na none ikibazo babajije Yesu cyari icyo kumugerageza ngo bazabone ibyo bamurega. Yesu nk’aho yabasubije, yarunamye yandika hasi ku butaka. Amaze kubabwira ariya magambo, buri umwe yajugunye hasi ibuye ubundi akizwa no kuva aho hantu kuko bari batsinzwe n’urubanza. Yesu yasezereye umugore amaze kumubabarira ibyaha kdi amuhana kutazongera gusambana.

Mu gusoza, twavuga ko amagambo Yesu yivugiye ubwe ari menshi kandi yose afite imbaraga zihindura. Rero ntitwigeze tuvuga urugero nnka Yoh 3:16, Ibyak 20:35 cyangwa Abahiriwe, Yesu asenga cyangwa andi magambo yamenyekanye cyane no mu bibwiriza byinshi by’abigisha batandukanye. Igihe cyose Yesu yabaga abumbuye akanwa ngo avuge, abantu batangazwaga no kwigisha kwe ndetse na bamwe mu banzi be baratangaraga bati “Yemwe, ntabwo higeze kuba umuntu uvuga nka we” (Yoh 7:46). Amagambo ya Yesu ahindura ubuzima: “Amagambo mbabwira niyo mwuka kandi niyo bugingo” (Yoh 6:63). Amagambo Yesu yavuze atandukanye n’ayo abahanga bavuze kuko yo ahoraho, ni ay’iteka ryose: “Ijuru n’isi bizashira, ariko amagambo yanjye ntazashira na hato” (Marik 13:31).

By BYIRINGIRO Jean Dominique