Abamaleki ni bande, Biblia ibavugaho iki ?

Abamaleki ni ubwoko bugaragara mbere na mbere mu gihe cya Abrahamu (Itang 14:7). Nubwo ku rutonde rw’amahanga aboneka mu Itang 10, mu Kubara 24:20 bagaragara nk’abambere mu mahanga ndetse banayaruta. Itang 36:12 herekana ko Abamaleki babyarwa na Amaleki, umuhungu wa Eliphaz akaba n’umwuzukuru wa Esawu. Bityo, Abamaleki bari bamwe n’Abedomu ariko bagatandukanaho gato cyane, mubyukuri bakomoka bose kuri Esawu, kandi ntiwaba ukabije cyane uvuze ko Amaleki yari umwedomu.

Ibyanditswe byerekana intambara z’urudaca hagati y’Abamaleki n’Abisraheri n’uburyo Uwiteka yagambiriye kumaraho ubwoko bw’Abamaleki (kuva 17:8–13; 1Samweri 15:2; Gutegek 25:17). Wakibaza uti, ni kuki Imana yahamagariraga ubwoko bwayo kurimbura ubwoko bwose bw’Abamaleki? Ariko uko usoma amateka y’ubwo bwoko ugenda umenya icyabiteraga.

Nk’ayandi moko yose yo mu butayu , Abamaleki bari aborozi bahora bimuka bakurikiye urwuri. kubara 13:29 herekana ko bari abaturage b’i Negebu, ubutayu buri hagati ya Egiputa n’i Canaani.

Ubugome bw’Abamaleki bwatangiriye ku gitero cy’i Refidimu (Kuva 17:8–13). Ibi kandi bigaruka mu Gutegek 25:17–19 aho Mose abihanangiriza ati: “Uhore wibuka ibyo Abamaleki babagiriye mu rugendo ubwo mwavaga muri Egiputa. Uko babasanganiraga bakica ab’inyuma banyu, abatakaye inyuma bose b’abanyantege nke [cyane abagore n’abana] ubwo mwananirwaga mukaruha, ntibatinye Imana. Nicyo gituma Uwiteka Imana yawe nimara kugukiza ababisha bawe bose bakugose, ikaguha kuruhukira mu gihugu Uwiteka Imana yawe iguhaho gakondo ngo ugihindure, uzaba ukwiriye gukuraho rwose kwibuka kw’Abamaleki ngo bibagirane mu bo munsi y’ijuru bose. Ntuzabyibagirwe!”

Nyuma Abamaleki bifatanije n’Abanyakanani, barwanye n’Abisraheri i Horuma (kubara 14:45). Mugihe cy’abacamanza, bifatanije n’Abamowabu (Abacam 3:13) n’Abamidiyani (Abacam 6:3) barwanya Abisraheri. Barazaga bakabasiribangira imyaka mu mirima.

Muri 1Samweri 15:2–3,Uwiteka abwira Sawuli ati, “Nzahana Abamaleki mbahora ibyo bagiriye Abisraheri ubwo babatangiraga bava muri Egiputa. None genda, utere Abamaleki, ubarimbure rwose n’ibyo bafite byose. Ntuzababarire ahubwo uzice umugabo n’umugore, n’abana b’impinja n’abonka, inka n’intama, ingamiya n’indgobe.”

Gusa Sawuli abanza kuburira Abakeni, kuko bari inshuti z’Abisraheri, ngo bave mu bamaleki batarimburanwa. Arangije atera Abamaleki ariko ntiyabikora nkuko Uwiteka yamutumye. Arokora umwami wabo Agag, atwara iminyago ye bwite n’iy’ingabo ze, hanyuma ashaka n’igisobanuro cy’impamvu yamuteye gukora ibyo nagera kuri Samweri. Kugoma kwa Sawuli ku Uwiteka n’amategeko yayo byarakaje Imana bituma ihita imuca ku ngoma (1 Samweri 15:23).

Abamaleki bacitse ku icumu bakomeje kubangamira Abisrraheri no mu myaka yakurikiyeho. Igitabo cya mbere cya Samweri 30 kitubwira Abamaleki batera i Sikulagi, umudugudu w’Abayuda Dawidi yatwaraga. Abamaleki batwitse uwo mudugudu, banyaga abagore n’abana, harimo n’abagore babiri ba Dawidi. Dawidi n’abantu be bakurikira Abamaleki barafata, barabica bagarura n’ibyo bari banyaze byose. Gusa hari abantu nka Magana ane bacitse barahunga. Hanyuma, ku ngoma y’umwami Hezekiya, ab’umuryango wa Simeyoni bishe Abamaleki bari barasigaye babaga ku musozi wa Seyiri baturayo (1 Ingoma 4:42–43).

Hanyuma Abamaleki baheruka kuboneka mu gitabo cya Esiteri aho Hamani w’umwagagi, ukomoka kuri Agagi umwami w’Abamaleki, yaguriye Abayuda bose b’i Shushani ngo bicwe ku ngoma ya Ahasuwerusi. Uwiteka yatabaye Abayuda , maze Hamani,abahungu be, ndetse n’abandi banzi ba Israheri bose baricwa (Esteri 9:5–10).

Urwango rwose Abamaleki bagiriye Abayuda n’uburyo bagerageje kenshi kubarimbura byarangiye babihaniwe ndetse igihano gikomeye. Ingaruka z’imigambi yabo mibi zakagombye kuba imbuzi kubagerageza kurwanya umugambi w’Imana cyangwa abagerageza kuvuma uwo Imana yahaye umugisha ( Itang 12:3).

by Jean Dominique BYIRINGIRO,