Abagibeyoni bari bantu ki?

Abagibeyoni ni igice cy’abantu bakomokaga ku Bamori (2 Samweri 21:2). Bagaragara mu gitabo cya Yosuwa 9 nk’abantu bariganije cyangwa batetse umutwe ku bisrael kugira ngo birengere Yosuwa atazabarimbuza inkota.Nyuma y’uko Abisrael batsinze imijyi y’i Yeriko no kuri Ayi Abanyakanani benshi bishyize hamwe bakora umutwe w’ingabo kurwanya Abisrael

Abagibeyoni bo ariko ntibarwaye muri ubwo buryo, bakoresheje ubundi budasanzwe: “Bahimba ubwenge: Bagenda bihinduye intumwa, bajyana amasaho ashaje ku ndogobe n’imvumba za vino zishaje ziteye ibiremo, bambaye inkweto zishaje mu birenge, n’imyenda ishaje y’ubushwambagara, hamwe n’imitsima y’impamba ishaje yagwengeye iguye uruhumbu. Barahaguruka basanga Yosuwa n’Abisrael mu ngando y’i Gilugari baramubwira bati turaturuka mu gihugu cya kure nuko nimudusezeranye isezerano (Yosuwa 9:4–6).

Abisiraheri ntibigeze bagisha inama Uwiteka ahubwo babasezeranya isezerano ry’amahoro batazi ko baguye mu mutego w’uburyarya bw’Abagibeyoni. Nyuma y’aho Abisiraheri baje kuvumbura ko bababeshyaga kandi ko ari abaturanyi ba bugufi bashaka icyo gukora barakibura. Abakuru babo baravuga bati twamaze kubarahira mu izina ry’Uwiteka Imana ya Israel none ntacyo twabasha kubakoraho: tubareke babeho kugira ngo tutikongereza umujinya w’Imana kubwo kwica indahiro twabarahiriye. Tuzabareke babeho ariko tuzabagire abatashyi b’inkwi n’abavomyi b’amazi mu materaniro y’Abisrael. Nuko biba bityo (Yosuwa 9:19–21).

Mu yandi magambo Abagibeyoni babayeho ari abacakara b’abasrael mu minsi yakurikiyeho. Nyuma i Gibeyoni n’ibikingi byaho haje guhabwa umuryango wa Benyamini

Umwami Sawuri yaje kwica isezerano Yosuwa yagiranye n’Abagibeyoni arabatera arabarwanya anicamo bamwe. Ingaruka z’icyo yakoze zaje ku ngoma ya Dawidi kuko hateye inzara ikomeye mu gihugu cya Israel. Igihe Dawidi abajije Imana iby’iyo nzara, Uwiteka aramusubiza ati bitewe na Sawuri n’inzu ye y’abicanyi kuko bishe Abagibiyoni Mu kurura Abagibeyoni ndetse no kugira ngo inzara ihagarare, byabaye ngombwa ko abahungu barindwi ba Sawuri batangwa bakicwa (2 Samweri 21:6).

Nubwo Abagibeyoni bari abanzi b’Abisrael,hari isomo rikomeye batwigisha mu gihe cyacu. Uburyarya bwabo bwakomejwe n’uko Yosuwa n’abantu be batabanje kugisha inama Uwiteka y’icyo bajyaga gukora kuri ubwo bwoko. Bityo kandi, Yosuwa 9 hatwereka cyane ko abakristo natwe tugomba gusenga ku myanzuro yose ikomeye tuba twenda gufata mbere yo kuyishyira mu bikorwa no gushaka ubushake bw’Imana mbere yo kwihutira gukora. Na none kandi Imana yakomeje indahiro Abisrael bagiranye n’Abagibeyoni mu buryo bwo kwerekana uko Imana ikiranuka, kwica isezerano ku Mana, ni ikintu gikomeye. Hanyuma na none, kubana kw’Abagibyoni n’Abisrael nubwo byari bimenyekanye ko babeshye bigaragaza ubuntu n’imbabazi Imana igirira abantu bose.

By: BYIRINGIRO Jean Dominique,
[email protected]