ADPR Gashyekero iritegura igiterane cy’ivugabutumwa no gushyira ibuye ry’ifatizo ahazubakwa urusengero

Kuri iki cyumweru tariki ya 4 Gashyantare 2018, ku mudugudu wa Gashyekero, paruwase ya Gikondo baritegura igiterane cy’ivugabutumwa ,hakazashyirwa n’ibuye ry’ifatizo ahazubakwa urusengero rujyanye n’igihe.

Past.Valentin RURANGWA, uyobora umudugudu wa Gashyekero

Valentin RURANGWA, Pasiteri uyubora umudugudu wa Gashyekero ,paruwase ya Gikondo/ADPR avugako iki gikorwa gifite intego yo kuvuga ubutumwa ,gukora ibikorwa by’urukundo no gutangiza umushinga w’ inyubako y’urusengero kuri uwo mudugudu wa Gashyekero.

Avugako iki giterane kizitabirwa n’abavugabutumwa batandukanye harimo Abapasitoro,abashumba n’abavugabutumwa b’abanyamuhamagaro,amakorali atandukanye yaba ayo muri paruwasi ya Gikondo n’andi azaturuka hanze nka korali Gologota na korali Rubonobono .

Past. RURANGWA akomeza avugako uwo muhango uzayoborwa n’abayobozi bakuru b’itorero ry’ADPR kandi uzitabirwa n’abashyitsi batandukanye barimo inshuti z’Abanyagashyekero,abahasengeye n’inshuti zabo zisengera hirya no hino .
Akomeza avugako impamvu nyamukuru yo gutumira abayobozi bakuru b’itorero ari ukugirango bamenye uwo mushinga kandi baheshe umugisha icyo gikorwa.

Yagize ati: “Ni igikorwa kidasanzwe, ni urusengero rujyanye n’igihe, ni runini kuko ruzaba rugeretse kandi n’ igikorwa kizatwara imbaraga nyinshi abakristo, ni yo mpamvu twifujeko abayobozi ba ADPR, abashumba b’ururembo, umushumba w’Akarere bahesha umugisha iki gikorwa kandi bagiheshe n’agaciro kugira ngo bamenye umutwaro dufite, aho bazaba bari hose bajye bagisengera bavuge bati ‘Abanyagashyekero Imana ibakomereze amaboko.”

Akomeza avugako bafite ibyiringiro by’uko Imana izabashoboza,n’ubwo ari urusengero ruzatwara amafaranga atari make. Yakomeje avugako badahanze amaso ku bantu ahubwo ngo bafite gahunda yo gusenga kugirango ibyo Imana yavuze kuri Gashyekero ibisohoze .

Agira ati: “N’ubwo urusengero tugiye kubaka ari runini kandi ruzatwara amafaranga atari make,ntiduhanze amaso ku bantu bakomeye,ku baterankunga bakomeye…, twebwe dufite gahunda yo gusenga Imana kugirango ibyo yavuze kuri gashyekero ibisohoze ibinyujije ku Banyagashyekero ubwabo.

Avugako bifuzako Imana izabahemburiramo ariko ikabaha n’amafaranga kugira ngo urwo rusengero rwubakwe n’ubwo inkunga zava hirya no hino ariko cyane bigakorwa n’Abanyagashyekero kugirango umugisha utazatwarwa n’abandi.

Gashyekero ni umwe mu midugudu 3 igize paruwase ya Gikondo:Gashyekero,Kigarama na Karugira ahari icyicaro cya paruwase ya Gikondo.Ukaba ufite abayoboke bagera kuri 723.

Uyu mushinga wo kubaka urusengero rugezweho uzarangira utwaye amafaranga arenga miliyoni magana arindwi(700.000.000 frw).

Igishushanyanyo mbonera cy’inyubako y’urusengero, umudugudu wa Gashyekero






[email protected]