kuba aho Yesu ari /Pastor Desire HABYARIMNANA

Umuntu nankorera ankurikire, kuko aho ndi n’umugaragu wanjye ari ho azaba. Umuntu nankorera Data azamuha icyubahiro .(yohana 12:26)

Itegeko dufite ni ugukurikira Yesu no kuba aho ari. Abantu benshi hari ubwo basenga bavuga ngo Yesu waratubwiyengo aho tuzaba nawe uzaba uhari ariko igitangaje ni uko amateraniro yose ntabwo Yesu aba ayarimo kuko hari abateranywa n’amatiku , abandi bagateranywa no kuvuga abandi nabi no gusebanya no kugambana no gucamo abantu ibice.

Hari nabaterana bagiye gukora inama ariko babanje kuyikora bwihishwa, hakaba harimo abaje gukora inama ariko bazi umwanzuro w’inama kandi ugasanga iyo nama ibanjirijwe no gusenga, gusoma ijambo ry’Imana no kuririmba mu kararika Yesu aze muri bene iyo nama Yesu ntayibamo kandi ibyo bikunzwe gukorwa n’abanyetorero.

Tugiye kureba aho tuba tumenye niba Yesu yakemera kuhaza.

Iyo udahinduye iby’isi biragutegeka bikaguhindura ntube ugishoboye kubana na Yesu. Gutera intambwe zo guhindura kamere nibyo bituma umuntu abana na Yesu. Umuririmbyi yararirimbye ngo mpisemo guhora nkizwa kugera igihe nzashingwa mu gakiza ke, ntabwo umuntu akizwa ijoro rimwe. Umuntu ashobora gutandukana na Yesu kandi atavuye mu rusengero. Mariya na Yozefu bagiye I Yerusarumu barikumwe na Yesu bagezeyo bamutayo .Bibiliya iratubwira ngo bibutseko batari kumwe nawe bibwirako ari mu kivunge cy’abantu bari hafi aho ariko mwibukeko bamushatse iminsi itatu bataramubona kuko Yesu ni uw’umuntu si uw’abantu.

Hari ubwo umuntu avugango korari yacu irakizwa ku rusengero rw’iwacu hari ububyutse, dufite amasengesho bimeze neza ariko ukwiye kumenyako hakiza umuntu hadakizwa abantu, ntugafatire agakiza mu kivunge. Ujye uvugango njye na Yesu tubanye gute ? Ntabwo waba waravuye aho Yesu ari utangire kuvuga ngo korari yacu, urusengero rwacu, mu cyumba cy’amasengesho iwacu ahubwo ujye uvugango njye na Yesu tubanye dute ? Sanga Yesu umubwize ukuri, umubwire aho wamutereye burya ubwo wakora icyaha ntiwihane Yesu waramutaye. Ubwo wibaga, ubwo wabeshyaga, ubwo watukanaga Yesu waramutaye.

“Dore imirimo ya kamere iragaragara ni iyi: Gusambana no gukora ibiteye isoni n’iby’isoni nke, no gusenga ibishushanyo, no kuroga no kwangana no gutongana, n’ishyari n’umujinya n’amahane, no kwitandukanya no kwirema ibice, no kugomanwa no gusinda, n’ibiganiro bibi n’ibindi bisa bityo. Ndababwira hakiri kare nk’uko nababwiye kera, yuko abakora ibisa bityo batazaragwa ubwami bw’Imana.” Abagalatiya 5:19-21, iyi mirimo yose ya kamere igutandukanya na Yesu.

Mariya na Yozefu bataye Yesu bajya kumushakira ahatariho, hari ubwo umuntu ata Yesu ariko akajya kumushakira ahatariho akavugango ndirimba cyane nkajya nsimbuka cyane, ngacinya umudiho hoya ntabwo Yesu aba mu mudiho. Kubyinira Imana no kuyiririmbira ni byiza ariko urayibyinira mukiri kumwe .

Twitwa amazina Yose akomeye tuzi ntabwo bisobanuye kuba uri kumwe na Yesu. Hari abantu bafite amazina meza n’insengero nziza ariko Yesu atari kumwe nabo. Hari abantu bishukako bafite ubugingo ariko ntabwo bafite ariko wakisuzuma ukareba niba urikumwe na Yesu , muheruka gusabana na Yesu ryari ? Muracyari inshuti ? Iyo umuntu agize intege nke aterekezako abantu bose ariko bameze. Iyo umuntu atagitanga kimwe mu icumi akubwirako kurya icyacumi ntacyo bitwaye, iyo umuntu yiba akubwirako Imana iziko turi abantu, Ati ntimugakabye gukiranuka, agashaka imirongo yo kumushyigikira ariko ntibikwiye kuko turi abantu bafite umwuka wera , tumenya icyo Imana itubuza.

Nubundi kubana na Yesu ntabwo ari ibintu bigoye, umuririmbyi yararimbye ngo Uwiteka umucamanza iyo ambonyeho amaraso ntacira urubanza anyita ukiranuka, ese koko ibi bintu birakomeye ? Iyo wibutse gusaba amaraso ya Yesu ukamenyako icyaha ari kibi ugasaba imbabazi Imana irakubabarira burundu ukumva uri umwana w’Imana.

Yesu aba ahameze hate ?

Yesu aba mu mbabazi, aba mu guca bugufi, mu rukundo. Yesu aba ahantu haciye bugufi cyane mwibukeko yavukiye mu kiraro cy’inka. Mariya na Yozefu bemeye kuba aho hantu ariko Imana yahabahereye icyubahiro kuko yaboherereje abanyabwenge, bazana ishangi, bazana ibihumura neza, Yesu yemera kuba ahantu twe tutakifuza kuba ariko ndagirango nkubwireko nuba aho Yesu ari atazakugira umurizo ahubwo azakugira umutwe, kandi Bibiliya iravugango nibwo tugaragara nk’abakene ariko dutungishije benshi ntabwo bivuzeko gukena aribyo bituma utunga Yesu kuko umuntu ashobora kuba umukene amaganya yaramutandukanyije na Yesu ,ntabwo umuntu yaba umukire ariko yaratandukanye na Yesu, icy’ingenzi ni ukumenya niba umutima uciye bugufi.

Iyo udaciye bugufi ucishwa bugufi kandi gucishwa bugufi birababaza, reka turebe abantu bacishijwe bugufi barababara kandi byarabagoye: Umugabo umwe witwaga Nebukadinezari yigeze yubaka Babuloni mu buryo bwaribugezweho icyo gihe , areba abantu, areba amazu aravugango Babuloni yange niyubakiye umurwa umpesha icyubahiro Imana iramubwirango ko utambaye icyubahiro ukaba unkuyemo kandi arinjye wakubashishije bituma Imana imukura mu bantu imujyana mu ishyamba kurisha ahamara imyaka irindwi kandi abo yayoboraga nta numwe wabimenye.

Yavuyeyo avuga ngo uri Imana yimura abami ukimika abandi , ajya yaha Imana icyubahiro mu ijambo rimwe Nebukadinezari mu myaka irindwi yaragiye kwiga kubaha Imana no kugendana nayo, nawe ibyo wakora byose utaraca bugufi ntacyo uzabona gusa Yesu aragutegereje agusubize imigisha yose yaguteguriye. Yozefu yemeye kuba umunyagano mu gihugu cy’amanyamahanga mu kapotifari aramukunda, Yozefu yubaha Imana igihe kigeze iramugororera, nawe ntawuzi icyo Imana izakugira ariko genda wicishije bugufi, reka kwirwanira, reka kwicira inzira, reka kumva hari ibyo wagezwaho no kuriganya. Yesu niwe rugero rwiza rwo kwicisha bugufi, Yesu ntiyatekerejeko kugumana n’Imana ari ikintu cyo kugundirwa yemera imibabaro, yemera no gupfa urupfu rwo kumusaraba nicyo cyatumye Imana imushyira hejuru cyane.

Yesu yoza ibirenge by’abigishwa yari ukugirango atwerekeko guca bugufi ari ikintu gituma umuntu ashyirwa hejuru.
Umuntu nankorera ankurikire, kuko aho ndi n’umugaragu wanjye ari ho azaba. Umuntu nankorera Data azamuha icyubahiro . Ni iki cyagukuye aho Yesu ari ? Ni ibyishishimo ? Umubabaro mwinshi ?NI ubutunzi se ? Birashobokako umuntu akorera Imana ariko yaravuye aho Yesu ari.

Ukwiye kubabarira bikaba ubuzima bwawe bwa buri munsi. Abantu babajije Yesu ngo umuntu nancumuraho nzamubabarire ngeze ka ngahe ? Arabasuza ngo ni karindwi ukubye mirongo irindwi. Gutanga imbabazi no gusaba imbabazi ni itegeko ry’Imana. Kugendana n’Imana buri munsi ukiga kuyoboza Imana inzira, Enoke yagendanye n’Imana imyaka Magana atutu ari inshuti y’Imana akiranukira Imana kugeza ubwo Imana yamwimuye imujyana mu ijuru. Hari abantu bagendanye n’Imana ahantu hakomeye haruta aho uri kunyura uyu munsi.

Ibyiza byinshi wabigejejweho na Yesu, nakugaburira muzabane n’usonza muzabane,nakubakira urugo muzabane no mugihe urugo ruzaba rutagenda neza nabwo uzamwisunge azongera akubakire. Mukwiye kubana na Yesu mubuzima bwa buri munsi .Ni iki cyagukura aho Yesu ari ? Ninde mwami wabona ushobora kuruhura umutima wawe ? Ninde wakubera igisubizo Atari Yesu ?

Ngwino aho Yesu ari azakugirira neza kurusha uko wabitekereza.

[email protected]