Yesu Utwikorerera imibabaro (Igice cya 2)

Nanone niwe Yesu wikorera imibabaro yacu (Yes 53:4-5; Mat 11:28-29)

Ibyo tutamenyereye nuko uwishyizeho ibyaha byacu, yikoreye n’intimba zacu, n’ agahinda kacu, no kwiheba kwacu, n’ ubusharire dufite kubera ibyo twakorewe.

Mu nsengero, abantu bagaragaza umunezero w’ akanya gato kuko ‘idini rishima’ ba Nsekambabaye. Oya Nta mpamvu yo kwishushanya.

Ubundi amarangamutima ni impano twahawe n’ Imana akaba yerekana ko turi bazima. Iyo abantu baduhatira kuyacecekesha natwe tukabyemera, twazagera igihe ‘akagonga’, tukagwa ikinya. Nibwo uzumva umuntu akubwira ati ‘sinishima simbabara’

Kubabara si ubugwari, si n’ intege nke. Umwami Yesu yasongogeye imibabaro y’uburyo bwose nk’uko tuza kureba hasi.

Ahari ibyaha haba n’umubabaro (Itangiriro 3:16-19)

Imana ntitanga umuti w’ igice ku kibazo cy’ umwana w’ umuntu. Adamu na Eva bamaze gucumura, baremerewe n’ umutima ubacira urubanza , ariko basogongera ku mubabaro. Nibwo indwara, inzara, gutotezwa, kurengana, n’ urupfu byinjiye. Amagambo yo muri Yesaya 53: 4-5 yerekana ko Yesu yapfiriye ibyaha n’INGARUKA zabyo.

Niba hariho umujura, hariho n’uwibwa. Umwicanyi atuma habaho impfubyi n’ abapfakazi. Ufashe ku ngufu atera undi kwandura agakoko gatera Sida no kugendana ipfunwe.

Nk’umuntu wagize uruhare mu bwicanyi, nawe ubwe afite umubabaro akeneye gukira. Ahari icyaha, hari n’ umubabaro.

Ntibyari kuba byuzuye iyo Yesu aza kwishyiraho ibyaha agasiga ingaruka zabyo. Ijambo rikoreshwa muri Yesaya 53: 4 rivuga ko yashenjaguriwe gukiranirwa (Avon mu Ruheburayo) rivanzemo ibikorwa bibi n’ingaruka zabyo.

Abantu benshi mu babana n’ubumuga bagendana ipfunwe, birabagora kwiyakira. Abandi bagendana ubwoba ko batazabaho. Umujinya n’umutwaro munini abantu benshi bikoreye. Abandi baba mu bwihebe.

Twasanze hari indi mitwaro itavugitse mu Kinyarwanda kuko mu muco wa kinyarwanda bitemewe kugaragaza amarangamutima.

Ntuzacikwe n’igice kizakurikiraho..................

Niba wifuza gusengerwa cyangwa kugisha inama, waduhamagara kuri +250788422984. Dusengera ibyifuzo by’abantu k’ubuntu. Sangiza ubu butumwa inshuti zawe.
Pastor Desire
www.agakiza.org
Fcbk: Agakiza.org
Chaine YouTube: Agakiza.org