Wumva wakomeza guhamya Kristo nubwo byagusaba gupfa?

Iki ni ikibazo kimaze iminsi kibazwa n’imbaga y’abantu batari bake, nyuma y’aho mu bihugu hirya no hino ku isi cyane cyane ibyiganjemo abayoboke b’idini ya Isilamu abakristo barushaho kwicwa bazira imyemerere yabo. Kuri iki bamwe bakomeza kwibaza impamvu ibi birushaho gukaza umurego. Ese byaba ari uko isi irushaho kugwiza umwijima ikaba idashoboye kwihanganira umucyo uyizamo? Wenda nabyo birashoboka. Ese byaba ari kimwe mu byerekana ko Yesu agiye kugaruka. Ibi byose birashoboka.

Urubuga rutangaza amakuru ya Gikristo Christian Today rwibajije iki kibazo rwabihereye ku bimaze iminsi bigaragara mu bihugu bitandukanye, aho abakristo badasiba kuvutswa ubuzima bwabo bazira izina rya Yesu.

Iki gitangazamakuru kibajije iki kibazo kandi nanone nyuma y’aho kivuze ko mu minsi mike ishize aribwo umuntu witwaje imbunda witwa Chris Harper-Mercer yinjiye muri Kolegi imwe muri Leta zunze ubumwe za Amerika agasaba abakristo kujya ku ruhande babikora agahita abarasa.

Ikintu cyatangaje benshi ni uko nyuma yo kurasa aba mbere, bitabujije n’abandi guhagarara bakemeza ko ari abakristo naho babizira. Kuri aba banyeshuri ngo basanze guhakana ko bizera Kristo byaba ari ugukoza isoni Imana bahitamo kwemera ingaruka zabyo. Bati ‘’Aho guhakana Imana Umuremyi wacu, twakwemera gupfa tukmwiringiye tukajya guhura nawe.’’

Ibi kandi byabaye nyuma y’aho abandi bakristo b’abanya Siriya bagera kuri 12 bishwe n’intagondwa zigendera ku mahame akaze ya Leta ya Isilamu nyuma y’aho nabo banze kwihakana ko ari abakristo. Muri aba harimo umwe mu bafite itorero bakoreraga iyicarubozo umwana we w’imyaka 12, izi ntagondwa zikamubwira ko zibihagarika ari uko gusa yemeye kwihakana izina rya Yesu, akemera kuba umuyoboke w’idini ya Isilamu, uyu mugabo yahisemo kubatsembera ko ibyo atabikora. ‘

Mu kwezi kwa kabiri kandi na none, nibwo hakwirakwijwe amashusho y’abakristo 21, bishwe baciwe amajosi n’izi ntagondwa mu gihugu cya Libiya. Aba nabo barinze bashiramo umwuka bataremera kwihakana izina rya Yesu.

Nyuma y’aya masanganya akomeje kugwirira abakristo nibwo umwe yibajije ngo mbese, twese turi ku rugero rw’ababasha guhamya izina rya Yesu naho haba kuripfira? Iyo winjiye mu nsengero usanga ababyina ari benshi, bavuga bati ‘’Ntituzakuvamo Mana, turakwemera, naho byaba ibyago, gupfa, mbese ururimi ni inyama yigenga bavuga byinshi, ariko uribaza ngo twese twabasha kwemera guhara ubuzima bwacu kubwa Kristo’’. Imana idutabare kandi itubashishe, turusheho no kujya dusengera abo bose barimo bazi izina rya Yesu, kugira ngo Imana iborohereze. Murakoze Imana ibahe umugisha!!