Waba uzi isano riri hagati y’amasezerano na nyirayo?

Abantu bakunze kwitwa abarokore mu bintu by’ingenzi bibaranga harimo n’amasezerano, aho usanga ari bwo buhanuzi bwiganje mu nsengero no mu byumba by’amasengesho. Ndetse ubona bisigaye bifatwa nk’ikimenyetso simusiga cy’uko umuntu yakijijwe neza. Uhanuye gutunganya ibidatunganye abenshi basigaye bavuga ko yavangiwe, ariko uhanura amasezerano y’ibitangaza akitwa, Umukozi w’Imana usizwe amavuta!

Iyo uvuze isezerano, bihita byumvikana ko ari ibyemezo byemeranijwe hagati y’abantu babiri cyangwa benshi cyagwa impande zirenze rumwe. Kandi buri ruhande cyangwa buri wese aba afite icyo asabwa mu rwego rwo gusohoza amasezerano yagiranye n’undi.

Abenshi muri aba bantu bitwa abarokore rero, maso yabo ahora atumbiriye mu kirere cyitwa amasezerano bahawe n’Imana, ariko ntibibuke ko hari icyo basabwa kugira ngo barinde ayo masezerano.

Byakunze kuvugwa no kuririmbwa ko isezerano ry’Imana ridahinduka, nyamara njyewe ndababwiza ukuri ko ryahinduka.

Niba Imana yitwa ISHOBORA BYOSE guhindura ibintu yivugiye ubwayo si byo byayinanira cyane ko ntan’uyibaza icyo ikoze icyo ari cyo, ntan’amabwiriza aba imbere yayo ngo niyarengaho irahanwa. Ni Imana ikora iby’ubumana.

Kubera impamvu zayo bwite, bitari na ngombwa ko wowe cyangwa njyewe tumenya Imana ifite ububasha bwose bwo guhindura ikintu cyose mu Isi no mu Ijuru. Icyo nyikundira ni uko ibyayo byose bishingira ku Rukundo ikunda umuntu no ku cyubahiro cyayo.

Igira icyo yitumye, ni nde wabasha kuyivuguruza ? Kandi icyo umutima wayo ukunze ni cyo ikora. Yobu 23 :13

Ikibazo gikomeye abarokore benshi bagira, ni ukubakira imyemerere yabo ku murongo umwe wo muri Bibiliya. Kubera umuco utari mwiza wo kudasoma, bafungura Bibiliya bagiye gushaka mo umurongo wabarengera ku byo bemera, ariko ntibasoma ngo basobanukirwe iryo jambo ryaravuzwe na nde ; ryari ; abwira nde ; habaye iki ; ashaka kumvikanisha iki ?

Reka turebe urugero rumwe rwo muri Bibiliya aho yahinduye isezerano ryayo kandi ikanabivuga yeruye.

Ni cyo gitumye Uwiteka Imana ya Isilayeli ivuga iti : « Ni ukuri nari navuze yuko ab’inzu yawe n’ab’inzu ya so bazajya bagendera imbere yanjye iteka ryose, ariko none Uwiteka aravuze ngo : Ntibikabeho kuko abanyubaha ari bo nzubaha, ariko abansuzugura bazasuzugurwa. 1Samweli 2 : 30

Rero isano iri hagati y’isezeano na nyiraryo, ni igihango afitanye n’uwamusezeranije.
Iyo icyo gihango kitagihari ashatse yatekereza ko iryo sezerano ntaho agihuriye naryo.

Dukwiye gutumbira utanga amasezerano tugakunda ibyo akunda tukanga ibyo yanga aho guhora tureba amasezerano gusa. Abantu bategereje amasezerano si ko base bahiriwe, ariko abantu bose badafite urubanza ku Mana ni abahiriwe ndetse ni abanyamasezerano kabone n’iyo baba batarigeze abahanurirwa ibitangaza, bahera ku yanditse mu ijambo ry’Imana imitima yabo ikanyurwa kandi nta kabuza ko babona ineza y’Imana mu buzima bwabo.

Hari n’abatumbiriye amasezerano atari ay’Imana.

Imana irakomeye cyane kandi ni inyacyubahiro mu buryo bukomeye. Kugira ngo ivugane n’umuntu si ibintu byoroshye biza buri kanya nk’umukino. Icyakora uburyo bwonyine yashyizeho butworohereza kuvugana nayo, ni ijambo ryayo yandikishije.

Simpakanye ko Imana itavuga.

Iravuga rwose kuko ntiyandema mvuga ngo yo inanirwe kuvuga. Ariko kandi niba umuntu atavugavuga ibihe byose, Imana si yo yavugavuga ntibishoboka.

Benetada mwitondere ibihanurwa mugenzurure byose mugundire ibikwiye, cyane cyane mwifashishije ijambo ry’Imana n’Umwuka wera twahawe.

Simbasabye guhinyura ibihanurwa, ahubwo ndababwira nk’uko Pawulo yavuze, ngo: "mugerageze byose mugundire ibyiza" 1Abatesalonike 5:21

Hato utaba usengera hamwe bagira isaha yahariwe guhanura ugahora wishyuza Imana ibintu itigeze ivuga, kuko iyo iyo saha igeze yavuga itavuga bo barahanura.
(wagira ngo Imana ni radiyo bafungra ku isaha runaka bakumva amakuru). OYA, IBYINSHI BIBA ARI IBINYOMA, TUBE MASO BARATUBESHYA.

Dusengeshe umwuka kandi tube maso dore ibyera byose si amata. Niba waraje ku Mana ukurikiye ya masezerano y’abahanuzi, biteye impungenge nyinshi ko aho tujya uzagerayo amahoro, ariko nuhitamo gukurikira Imana uyubaha ushaka ubugingo kuruta ibihanurwa, uhindutse umunyamasezerano menshi meza yose yo mu Ijambo ry’Imana.

Twabonye haruguru uko Imana ibwira umuntu utararinze isano afitanye n’isezerano rye, ariko umva noneho uko Imana ibwira umuntu warinze isano afitanye n’amasezerano ye : Nimubasha gukuraho isezerano ryanjye ry’umunsi n’isezerano ryanjye ry’ijoro, kugira ngo umunsi n’ijoro bitazaboneka mu gihe cyabyo, ni ho isezerano nasezeranije Dawidi umugaragu wanjye ryakuka… » Yeremiya 33 : 20-21

Nk’uko ibyangombwa byinshi bigira igihe bimara ubundi bigasazurwa (Update) ni ko n’amasezerano yongererwa agaciro. Kongerera agaciro amasezerano ni ukunoza isano ufitanye nayo. Isano ufitanye nayo ni uko ubana neza na n’uwagusezeranije. Kubana neza n’uwagusezeranije , ni ugukiranuka no kwiyeza buri munsi.

 Muyandi magambo amasezerano yawe aracyafite agaciro niba umutima wawe ubanye neza n’Imana yagusezeranije. Niba atari ko bimeze ntacyo ugipfana nayo ushatse ntiwayategereza ahubwo wakwihana ukabona kuvugurura amasezerano.

 Si ngombwa ko uhura n’umuhanuzi kugira ngo wemere ko uri umunyamasezerano. Imana nibona ko ari ngombwa izabikorera kugukomeza mu rugendo. Igihe cyose umutima wawe utakurega ikibi uzaba uri umuragwa w’amasezerano yose y’Imana. Rinda icyo ni cyo gikomeye.

 Abanyamasezerano bose si abana b’Imana, ariko abana b’Imana bose ni abanyamasezerano.

Yesu aduhane umugisha, kandi asohoze ibyo yadusezeranije kubw’ubuntu bwe, Amen !

NIYONDORA Vedaste Christian @agakiza.org