Waba uzi impamvu hagati y’isezerano rya kera n’isezerano rishya harimo urupapuro rutanditseho? Ese ni iki cyabaye hagati aho?

Abantu benshi bibaza ibintu byabaye hagati y’Isezerano rya Kera n’Irishya kuko bigaragara ko hagati ya Malaki na Matayo hari igihe kirekire cyabayeho

Iyi nyandiko ngufi iragufasha kumenya muri make uko byari byifashe muri icyo gihe n’ibyakozwe:

Nubwo Isezerano rya kera rirangira irishya naryo rigahita ritangira, ariko si uko byagenze. Hagati y’Isezerano rya kera n’Irishya hahisemo imyaka 400. Ibyo ni ukuvuga ko Malaki akimara kurangiza ubuhanuzi bwe (ubutumwa yatumwe n’Imana) nta wundi muhanuzi dusoma muri Bibiliya waba yaramukurikiye.

Tubona ko hahise imyaka 400 hakaboneka undi muntu twakwita umuhanuzi ariwe witwa Yohana Umubatiza ubwo rero Isezerano Rishya riboneka nyuma y’iyo myaka 400.

Abantu bibaza ibyabaye muri icyo gihe kingana gityo ariko ntitumenye na kimwe cyaba cyaranditswe muri Bibiliya muri iyo myaka.
Nyamara nubwo bitanditswe muri Bibiliya habaye byinshi muri iyo myaka aha rero twavuga bimwe muri ibyo by’ingenzi :

Muri iyo myaka nibwo Bibiliya yahinduwe mu Kigiriki ikuwe mu Giheburayo nk’uko twabibonye.

Bya bitabo byitwa Apokrife nabyo byaranditswe : bamwe babyita iby’Imana abandi bakabihakana kuko bitari muri Bibiliya y’igiheburayo.

Hadutsemo ibindi bitabo byinshi byitiriwe Imana ariko abantu b’Imana ntibabyemera.

Urugero : Ibyahishuwe bya Mose, Ubutumwa bwa Barinaba n’ibindi

1) Muri icyo gihe nibwo Abayuda batangiye ibyo bita amasinagogi (aho bateraniraga basenga Imana) kuko bararindagiye badafite urusengero bari baramenyereye gusengeramo i Yerusalemu nyuma y’aho rusenyewe.

2) Muri iyo myaka niho havutse imitwe inyuranye y’abayahudi :
a) ABAFARISAYO : bari abayuda bakunda idini yabo ya kiyuda baharaniraga amategeko bakubaha cyane imigenzo ya basekuruza babo.

b) ABASADUKAYO : Wari umutwe w’Abayuda nabo bubahaga amategeko ya Mose ariko ntibemeraga umuzuko w’abapfuye ariko ABAFARISAYO bo barawemeraga ; kubw’ibyo ABAFARISAYO n’ABASADUKAYO ntibahuzaga.

c) ABAZEROTE : Bari intagondwa zitekereza kuzana ubwami bwa Mesiya bakoresheje imbaraga ngo birukane Abaromani.

Ibi byose tuvuze haruguru nibyo bivugwa ko byakozwe muri ya myaka 400 hagati y’isezerano rya kera n’isezerano rishya nubwo hari n’abavuga ko muri icyo gihe cyose mu ijuru batekerezaga ku wabasha gucungura umuntu

[email protected]