Urukundo dukunda Imana ntirukabe nk’urw’injangwe ikunda imbeba.

Hari ibindi bintu bisa n’urukundo ariko sindamenya izina ribikwiye mu byukuri kuko si urukundo nyakuri.

Ese koko injangwe ikunda imbeba ?

Umuntu ashobora kuvuga ko injangwe ikunda imbeba kubera kubura ukundi abyita ariko mu bifatika ntabwo injangwe ikunda imbeba ahubwo ikunda kurya imbeba cyangwa ikunda inyama z’imbeba. Mu yandi magambo ntabwo injangwe ikunda imbeba nk’inshuti yayo ahubwo iyikunda nk’ifunguro.

Hari abantu benshi bakunda inkoko, nyamara si inkoko bakunda ahubwo bakunda inyama z’inkoko. Si urukundo rundi ahubwo nuko bayibona nk’igaburo riryoshye.

Impamvu nyamukuru yo gukurikira Yesu ni uko ari we nzira akaba ukuri kandi akaba n’ubugingo nkuko ubwe yabyivugiye. (Yohani 14:4)
Yesu yaje gucungura umuntu ingoyi y’icyaha kugira ngo amugeze ku bugingo buhoraho ubwo abera bazabamo mu Ijuru. We ubwe yarivugiye ati: “Nazanywe no kugira ngo zibone ubugingo, ndetse ngo zibone bwinshi” yohani 10:10.

Abantu benshi bibwira ko gukurikira Yesu ari inzira yo kubona ibyo imitima yabo irarikiye, bagafata icyemezo cyo kuba mu nzu y’Imana ariko atari ukubera gukunda Yesu utanga ubugingo ahubwo ari ukubera gusa ko bababwiye ko atanga imigati. Nibyo atanga imigati ariko imigati si yo yamuvanye mu ijuru, yavuye mu ijuru kugira ngo tubone ubugingo, kandi ubugingo n’ubutunzi bwo mu isi ni ibintu bibiri bihabanye cyane.

Bibiliya itubwira kwitonda ndetse no kwirinda, kuko ubugingo bw’umuntu butava mu bwinshi bw’ibintu bye. Luka 12:15.

Iyo ubugingo buba budahabanye n’ubutunzi Yesu yari kuza ari nk’umuterankunga w’abatishoboye hanyuma abakire ubutunzi bwabo bukabarengera. Nyamara yaje acishijwe bugufi cyane avukira mu muryango uciriritse, ndetse avukira mu muvure inka zinyweramo. Impamvu nyamukuru ni ugukiza abari mu isi ngo batarimbuka ahubwo bahabwe ubugingo buhoraho.

Ni byo koko ubugingo bw’umuntu ntibuva mu butunzi bwe bwo mu isi, kuko iyaba ari ko bimeze abakennye nta byiringiro by’ijuru bagakwiye kugira, ubwo ryaba ari iry’abakire kandi si ko bimeze. Rero ibi byose bitugaragariza ko impamvu nyamukuru yo gukurikira Yesu ikwiye kuba ubugingo kuruta kuba ubutunzi bufatika.

Matayo 6:33 “Mubanze mushake ubwami bw’Imana no gukiranuka kwayo, nibwo ibyo byose muzabyongererwa.” Aya ni amagambo yavuzwe na Yesu ubwe. Nyamara abigisha benshi barabicuritse, ntibakigisha abantu ibyo gushaka ubwami bw’Imana no gukiranuka kwayo ahubwo babigisha gushaka ibitangaza by’Imana n’amasezerano yayo, hanyuma ubwami bw’Imana no gukiranuka nibyo bashyize mu mwanya w’ibindi, babivuga nyuma kandi bakabivuga umwanya muto cyane, uwundi mwanya ugaharirwa kubyina guhanura, n’ibindi. Abantu benshi nabo bikundira uwo munyenga. Aho hantu satani yahafatiye abantu benshi ababuza gukiranuka no kwita ku iherezo ryabo ahubwo bakurikira ibifatika by’akanya gato.

Tuzi twese ko Data wo mu ijuru azi ibyo dukena byose, ntazabitwima burundu turi abana be kuko n’abatamwizera baratunze, kandi ntashobora kutwima umugati wo kurya kandi azi neza ko turi mu rugendo. Ariko benedata ntimuyobe, isano nkuru iri hagati y’umuntu na Kirisito ni ubugingo buhoraho. Ntimugakurikire Yesu kubera ibiryo, urwo rwaba ari nka rwa rukundo twavuze haruguru. Dukwiye kwita ku bugingo kuruta ibindi byose, kuko bishobora kuboneka cyangwa ntibiboneke ariko abakiranutsi bazajya mu Ijuru, kandi abanze kwihana bazasigara mu mwijima w’isi n’umuriro utazima, icyo gihe bwa butunzi bwose ntacyo buzaba bukimaze.

Impamvu mvuga ko bishobora kuboneka cyangwa ntibiboneke ni uko Yesu azi ibidukwiriye, kandi byose abiduha nk’inyunganizi zidufasha gukomeza inzira igana iwe, ashobora kubona ko ari ngombwa akabiduha cyangwa akabona atari ngombwa ntabiduhe. Ndababwiza ukuri ko hari abantu bazava mu isi batagize ubutunzi buhambaye kandi ntacyo bacumuye ndetse ari n’abaragwa b’ijuru.

Cyaba ari ikinyoma gikomeye umuntu avuze ko Imana idatabara abayo ngo ibahe ibyo bifuza. Ariko cyaba ari ikinyoma kivanze n’ubugome umuntu yijeje abantu ko bose uko bangana ibyo bifuza bazabitunga. Twibuke ko uwo tubisaba yavuye mu isi nta nzu igeretse yubatse kandi si uko atari kubona ubushobozi. Impamvu ni imwe gusa, ni uko ibihembo by’abizera bitari hano mu isi, si ugutunga imodoka, si ugusohorezwa amasezerano, utwo ni utuntu duto two gufasha abagenzi, kandi si ibintu bihambaye kuko tuzi ko n’abapagani babifite ndetse byinshi. Ahubwo ibihembo by’abizera ni rya sezerano riruta ayandi ari ryo “ Ubugingo buhoraho”.

Satani ashuka abantu yifashishije inyigisho zituzuye zigwiriye muri iki gihe, zihamagarira abantu gukurikira Yesu kubera ibitangaza n’amasezerano gusa, hanyuma akabareka byabindi bababwiye koko bikaba kuko nawe afite ubwo bushobozi bwo kubikora, hanyuma babona amasezerano yasohoye ndetse n’amasezerano ari kwiyongera, bakibwira bati: “Imana tubanye neza kuko ntiyampa ibi kandi ingaya”. Uretse no kuguha ibyo, igusha imvura mu murima w’imboga ikagwa no mu murima w’itabi.

Imana si umuntu, kuba uri umukire cyangwa uciriritse mu butunzi ntacyo biyitwaye si n’ibintu bidasanzwe kuri yo ku buryo wabiheraho upima umubano wawe nayo. Igipimo nyacyo kiri mu mutima wawe, ni aho ugeze uhindurwa n’ijambo ry’Imana kuko icyo ikwifuzaho gituma ikwitaho ni ukugira ngo uzabane nayo mu Ijuru.

Reka nkuburire nshuti wowe usoma ubu butumwa, ni wumva ubuhanuzi bukubwira ibitangaza kandi hari icyo wibuka umutima wawe ukubwira utatunganiyeho Imana, cyangwa ukabona amasezerano ari gusohora yihuta kandi uzi ko utabanye n’Imana neza, kora ibishoboka byose witunganye vuba cyane ubikore nk’ufite umwanya muto cyane kuko nta kindi kigenza satani uretse kwiba kwica no kurimbura, araguteze ngo ugume mu munyenga w’amasezerano n’ubutunzi by’isi maze azakwibe rimwe nk’umujura ube ubuze ubugingo utyo. Yohana 10:10

Rero dukwiye gukurikira Yesu kubw’urukundo rw’ukuri rutugeza ku bugingo buhoraho, tudakuruwe n’indonke cyangwa ibindi bifatika, kuko ibyo byose ari iby’igihe gito, kandi hamwe no gukizwa ubwo butunzi ushobora kubugeraho ndetse bwinshi, ariko ubutunzi ntibushobora kuguha agakiza.

Mwihane imigisha yanyu ize ariko mwizeye neza ko ivuye ku Mana kandi muhemburwe rwose kuko ibiza bititaye ku kwitunganya ntabwo ari iby’Imana kandi amaherezo yabyo ni umuborogo no kwicuza guza. (Ibyakozwe n’intumwa 3:19)
Nuko ibuka ibyo wakiriye n’ibyo wumvise, ubyitondere kandi wihane. Ariko rero nutaba maso nzaza nk’umujura, nawe ntuzamenya igihe nzagutungurira. (Ibyahishuwe 3:3)
Mwakire neza ijambo ry’Imana, kandi Imana ibahe umugisha!

Niyondora Vedaste Christian @agakiza.org