Uraremerewe? Uwo mutwaro wuhe nyirawo ubone amahoro. Ev. Clarisse Ingabire


Yesu yatubwiye ko muri iyi si tuzahura n’ibibabaza ndetse n’ibiteye ubwoba byinshi. Ariko asoza adusaba kugira ihumure, atubwira ko we ubwe yanesheje isi. Yatubwiye kandi ko aduhaye amahoro kandi ko ayo aduhaye atandukanye na yayandi isi itanga. Yohana 14 :27

Amahoro y’isi aboneka iyo byagenze uko dushaka gusa. Wariye uko ushaka, wambaye uko ushaka, ufite akazi wifuzaga, mbega igihe ibintu byose bigenda neza nta bigoye bihari.

Nonese ubuzima bumeze gutyo burashoboka?
Oya! Nta na rimwe umwana w’umuntu ashobora kubaho adafite ibimugoye. Hakemuka kimwe havutse ikindi.

Abatazi Imana rero, bahora bahangayitse kuko amahoro isi ibaha ntiyuzuye, ntibayatindana. Niyo mpamvu Yesu atadusigiye ikindi ahubwo akadusigira amahoro kuko ni yo yonyine adufasha kubona impamvu zo kunezerwa kandi ibibabaje bigihari ndetse byinshi. Amahoro ya Yesu ntazanwa n’imigendekere myiza y’ubuzima bwacu.

Ni byo byabaye ku ntumwa, kuko babakoreraga iby’ubugome byinshi bo bakanezerwa cyane mu mwanya wo kuganya imitima yabo igasendera amahoro ukaba wagira ngo ibyo bihe barimo bari barabyifuje kuva kera.

Yesu yavuze ko mu babyawe n’abagore ntawe uruta Yohana Umubatiza kereka umwana muto mu bwami bw’Imana. (Luka 7 :28)

Iyi ntaruro igaragaza neza ko Yesu yakundaga Yohani bikomeye. Ariko kimwe mu byatumye abona umuntu umuruta ari umwana muto mu bwami bw’Imana, ni iki ?

Umwana iyo azi ko umubyeyi we ari hafi, ibyo yifuza byose abiherereza ku mubyeyi, ni nayo mpamvu aba yumva ntacyo yaba kuko aba azi neza ko umubyeyi we amuri hafi, aba yumva afite amahoro yuzuye.

Wasobanura gute uburyo Yohani wari inshuti na Yesu kuri urwo rwego agera aho acibwa umutwe kandi azi neza ko Yesu yabasha kumukiza ariko akarinda apfa ataramutuka ?

Yagerageje no kumutumaho nk’uko natwe tumuhamagara buri munsi, Yesu amusubiza ibitandukanye n’ibyo yifuzaga kumva, nk’uko nawe usenga ukabona nta gihindutse. Iyo bitubayeho dukora amakosa menshi tutarondora, nyamara Yohana we yagumanye amahoro ya Yesu ageza n’ubwo acibwa umutwe akiri inshuti na Yesu. Luka 7 :18-23

Umubiri wacu wababazwa ndetse n’ibyo dukeneye tukabibura, ariko ntidukwiye gukuka umutima ngo dutakaze amahoro.

Igihe Yesu yari mu bwato, umuraba ntiwamubujije kwisinzirira. N’igihe abandi bari bakutse umutima we bamukanguye ntiyigeze ashigukira hejuru ngo agire ubwoba. Impamvu nta yindi, ni uko Yesu yari yaramaze gusobanukirwa neza uwo ari we kuri se.

Natwe ashaka ko duhishurirwa neza icyo turi cyo kuri we, tugahishurirwa uburyo adukunda, tugahishurirwa imbaraga ze n’ineza ye, maze ibyo bikaduhesha amahoro asesuye, ndetse bikatwizeza ko n’ibyo twifuza abishoboye, impamvu atabiduha ko ari impamvu ze bwite kandi zose zituruka ku rukundo adukunda.

Ijambo ry’Imana nta kindi rigusaba, ni uko ugenda nawe ukiryamira iruhande rwa Yesu ugafata amahoro ye, uknezerwa nta binejeje bigaragarira amaso y’umubiri. We ubwe yarivugiye ngo : « Mwese abarushye n’abaremerewe, nimuze munsange ndabaruhura. Mwemere kuba abagaragu banjye munyigireho, kuko ndi umugwaneza kandi noroheje mu mutima, namwe muzabona uburuhukiro mu mitima yanyu. » Matayo 11 :28-29

Imibiri yacu iteye ku buryo idashobora kwihangana, iba yumva byahita bikemuka ako kanya. Niba urwaye umubiri uba ushaka ko uhita ukira ako kanya. Niba ukennye umubiri uba ushaka ko uhita uba umuherwe ako kanya, niba ushonje umubiri uba ushaka ko uhita urya ako kanya. Umuntu rero uyoborwa n’umubiri ni ibyo bimubaho. Iyo ibibazo bimugezeho ntiyongera kwibuka ko afite Imana ahubwo ashaka ibisubizo byihuse ngo ibibazo bikemuke vuba. Ariko si ko bimeze ku Mana. Yo ikunyuza mu bintu byinshi bitewe n’icyo igutegura kuba cyo.

Imana iyo ibishaka irakwihutisha mu kigeragezo, wagera mu kindi cyo kigatinda kugira ngo iguhindure umuntu w’imbaraga mu buryo bushyitse rwose, kandi ngo kamere y’umubiri ibanze ipfe amaso yawe ave ku bigaragara asigare areba Imana yonyine.

Imana iguteza ibikuremerera kugeza ubwo imbaraga zawe zishira burundu, ukemera ko ntacyo ushoboye. Iyo ugeze kuri urwo rwego umanika amaboko kandi ntiwongera kuremererwa, Yesu ahita akuramira vuba. Niyo mpamvu bavuga ngo iyo bikomeye biba bigiye kurangira. Wanavuga ko iyo imbaraga zawe zirangiye ari bwo hagaragara iz’Imana.

Yesu yavuze ko umutwaro we utaremereye, niba uwo ufite waguhese ibitugu rero, utwaye utari uwawe, wuhe nyirawo (Yesu) maze ubone amahoro. Igihe cyose uzumva ko ugishoboye kugerageza kwiruhura ntuzigera uruhuka kereka niwemera akakuruhura, akaguha amahoro ye.( Matayo 11 :30)

IMANA ITUNYUZA MU BIKOMEYE ITATWANZE, AHUBWO IDUTEGURA KUBA ABAKOMEYE

Iyo akana kakiri gato, kIyanduza uko kiboneye kakanyara ku buriri, umubyeyi akakihorera. Ariko uko kagenda gakura niko kagenda kareka bimwe mu byo kakoraga, ndetse kanabikora kakabizira. Ababyeyi bakarera mu buryo bugafasha kumenyera kwiyitaho no kwigenzura, bivuga ngo, sibo babigashyiramo, kuko kaba karabivukanye ariko bikeneye nabyo gukura kugira ngo bitange umusaruro.

Natwe rero hari aho tunyura Imana ikahadukubitira kugira ngo yice kamere zidutwara ari zo ngereranije n’ubwana, kugira ngo tube abantu bashyitse batagikoreshwa na kamere. Ibintu Imana yadushyizemo ntibikura kuko bibangamirwa na kamere yacu. Dukubitwa izo nkoni zose rero kugira ngo tubashe gutanga umusaruro mu mibereho yacu ndetse tubashe no gutwara neza ubugingo twahawe, kandi tubeho tuyobowe n’umwuka wera.

Urugero :

- Nta muntu mukuru unyara ku buriri kereka arwaye, nyamara akiri muto yarahanyaraga.
- Ni nako nta muntu washonje wimana ibiryo, kereka iyo yakize akibagirwa aho yanyuze, uwo numubona ujye umufata nk’umurwayi kimwe n’abandi bose. Nyamara mbere atarasonza ntiyitaga ku bashonje.

Imana yemeye ko tugira ibibazo kuko yabonaga ko ari ngombwa. Ntidukwiye kubihunga rero, kuko kubihunga bisa neza no guhunga Imana. Nyamara umubiri wo uba ukujomba ukubwira ngo : « Ndashaka ko bitungana aka kanya » Ariko Data siko abishaka kuko umubiri ntuzi impamvu y’ibibazo, ariko Data azi impamvu yabyo.

Kwizera ko uri kumwe n’Imana kandi ko igihe kizagera bikagenda neza, bizana amahoro. Amahoro y’Imana ntabwo aza ibibazo byashize, ahubwo aza mu gihe cy’ibibazo. Iyo ibibazo bishize haza ishimwe ariko amahoro y’Imana aboneka igihe ibibujije amahoro bihari.

Reka ayo mahoro atware umutima wawe wumve uguwe neza, ntiwongere kuganya, ntuhangayike, ntiwemere ko intambara zawe arizo zigenga ibyishimo byawe kuko wavuza induru nk’umusazi. Ntiwemere ko uko ubona ibintu bigena amahoro yawe ahubwo amahoro yawe agene uko ubona ibintu.

Ubwo buzima ni bwo Pawulo yari asigaye yibereyemo igihe yavugaga ngo: "Ku bwanjye kubaho ni Kristo, kandi gupfa kumbereye inyungu!" (Filipi: 1:21)

Tekereza ukuntu abantu batinya urupfu! Nyamara umuntu wuzuye amahoro ya Yesu, atinyuka ibitinyisha abandi kugeza ku rwego no gupfa yumva ntacyo bimutwaye, ndetse akabibona nk’inyungu, kubwo kwizera ko aho urupfu rumujyana ari heza kuruta aho rumukura.

Mwenedata, nkwifurije amahoro meza atangwa na Yesu!

Inspired by: Ingabire Clarisse
Edited by: Niyondora Vedaste [email protected]