Umwana uri ku mugongo w’umubyeyi arangwa n’iki? / Ev. Adda Darlene Kiyange


Nimunyumve mwa nzu ya Yakobo mwe, namwe abarokotse bo mu nzu ya Isirayeli mwese, abo nahetse mukiri mu nda, nkabaterura mukivuka nkabageza mu za bukuru, ndi We. Muzarinda imvi ziba uruyenzi nkibaheka, ni jye waremye, ni jye uzaheka. Ni koko nzaheka kandi nzajya nkiza.
Yesaya 46:3-4

Umuntu wese wamaze kwakira Yesu nk’Umwami n’Umukiza mu buzima bwe, yakagombye kwizera iri jambo, akabaho ubuzima busa n’ubw’umwana uri mu mugongo w’umubyeyi.

Nyamara si ko bimeze, isi irushya abantu b’Imana n’ubwo baba mu mugongo w’Imana ariko bawusakurizamo, cyangwa bagateza imvururu kubw’ibyo bibwira rimwe na rimwe bitandukanye cyane n’ibyo ubahetse yibwira, ndetse hari n’igihe bikura mu mugongo, isi nayo ikabahindura abaretwa bayo.

Hariho ibiranga umwana uhetswe ku mugongo w’umubyeyi we:

Ntatwara impamba.

Umwana uhetswe mu mugongo ntiwamubaza iby’impamba kuko ntibimureba, impamba ye imenywa n’umuhetse. Kuki abantu b’Imana biganyira ibyo kurya imyambaro n’ibindi by’ubuzima? Iyo umuntu abonye igaburo ry’uyu munsi, akwiye gushima Imana ntahangayikishwe no kwibaza iby’ejo. iki ni cyo Imana idusaba, nuko tuyigirira icyizere gihagije kingana n’icy’umwana agirira umubyeyi we umuhetse.

Ntahangayikira uko urugendo rungana

Umwana uhetswe ntajya yibaza iby’itike (Ticket), no kumenya uko urugendo rungana kuko nabyo ntibimureba, bimenywa n’umuhetse. Icyakora iyo ananiwe cyangwa ashonje hari uko abigenza umubyeyi akabimenya agakemura ikibazo cye.

Uko ni ko twakabayeho. Iyo tunaniwe dufata umwanya tugasenga tukabwira Imana icyo twifuza. Hagati aho ariko, hari igihe umubyeyi abona aho hantu atari heza ku mwana we, akaba aretse kumwururutsa, umwana yakaye ataka avuga ati Mawe wanyihoreye ndarembye ndapfuye, ariko ntabikora kuko aba yizeye neza ko ari kumwe n’umubyeyi we ntacyo yaba,naho yarira ariko aba azi neza ko ntacyamuhungabanya, ndetse aba yumva nta cyago cyamugeraho, n’ibyo yatinyaga ntabitinya kuko aba yizeye uburinzi bw’umubyeyi we.

Nusenga ukabona ntibihise bisubizwa, ntukivumbure ngo wikure mu mugongo, ujye uzirikana ko Imana iguhetse igukunda kandi ikwitaye ho, ibyo itaraguha izi impamvu kandi ibyo iguhitiramo kunyuramo iba yabonye ko ari byo byiza kuri wowe bitewe n’impamvu izi wowe utazi, rero ntugasakurize mu mugongo cyangwa ngo wivumbure wivane mo kuko wavunika ndetse wakwisanga ibyo watinyaga byose byakugezeho kuko witandukanije n’uburinzi bw’umubyeyi wawe (Imana).

Ibibazo byo mu nzira ntibimureba kuko bibazwa uhetse.

Umwana uri mu mugongo ntajya asubiza ibibazo ahura nabyo mu nzira. Umuhetse niwe umenya ibyo gusubiza. Iyo ari ngombwa ko umwana asubiza umuhetse aramubwira ati: “Mubwire gutya na gutya”. Hanyuma umwana agasubiramo uko umubyeyi amubwiye, hakaba n’ibyo atabashije gusubiramo umubyeyi we akabisubiza mu mwanya w’umwana.

Ibibazo uzahurira nabyo mu nzira si ngombwa ko byose uzabisubiza. Hari ibyo satani agutega agira ngo ahinyure kwizera kwawe, gira amagambo makeya mu mugongo, utegereze ko uguhetse hari icyo akubwira. Nagusaba akuvuga uvuge, ariko ntugasakuze mu mugongo kuko ntan’ubushobozi ufite bwagufasha gusubiza ibibazo byo mu nzira.

Wibuke satani atega Yesu avuye gusenga, Yesu yafataga ku byanditswe akamusubiza. Iyo uhuye n’ingorane n’ibibazo by’isi usubiza ibyo ukuye hehe? Uguhetse yiteguye kuguha ibisubizo byose usubiza abakubaza impamvu z’ibyiringiro byawe, icyo usabwa ni ukumuturiza ukamuha akanya akaganira nawe mu ijambo rye. Nabona udasobanukiwe neza azakongorera ati: “Vuga gutya na gutya” cyangwa ati: “Iturize mwana wanjye nzakwereka uko nzabigenza”. Mu mugongo haba ubuzima bwiza ntukahivane.

Mu gihe cy’impanuka n’ibiza uhetswe ntiyikiza akizwa n’umuhetse

Ntabwo umwana uri mu mugongo yiramira mu gihe habaye impanuka, ahubwo aramirwa n’umuhetse. N’iyo abigerageje ateza ibindi bibazo, bishobora no kumuviramo gutakaza ubuzima, ariko iyo atuje umuhetse akora uko ashoboye yewe akemera we agahura n’akaga ariko akaramira umwana uri mu mugongo.

Mu byaha biba ku bantu b’Imana, hari mo n’ibiterwa no gusha kwicira inzira, cyangwa kwikemurira ibibazo ku ngufu kandi vuba na bwangu. Ariko abizera Imana, si uko bakwiye kubaho. Ubuzima bwabo bwose bushingira ku kwizera Imana. N’ubwo ibyago na makuba mu nzira ari byinshi urasabwa kwizera Imana ukayiharira urugamba rwawe kuko ifite ubushobozi bwo kugukiza muri byose kuko iguhetse ku mugongo wayo.

Uhetswe ntabwo areba inzira uhetse ni we umenya aho akandagiza ikirenge

Ntabwo umwana uri mu mugongo arwanira kureba imbere, arisinzirira kuko aba azi neza ko umuhetse abona imbere kandi areba n’aho akandagira. Iyo ageze ahari icyago arahasimbuka cyangwa agaca indi nzira.

Kimwe mu bituma Imana itatwereka byose biri imbere yacu cyangwa inzira tunyuramo, ni uko turi abanyantege nkeya, turamutse tubonye intambara Imana irwana mu nzira tunyuramo twakuka umutima tugapfa tutageze iyo tujya. Rero Imana niguhishurira gato ibiri imbere, jya wizera ubirindishe kuguma ku mugongo wayo, kuko wowe wihaye ibyo gushaka kureba imbere no kwishakira uko uzabigeraho wapfa utabibonye kuko Imana iba yatanze ingabo nyinshi zigapfa kugira ngo igire aho itugeza. Urugamba rwo mu nzira rero ruharire Imana wowe ntiwarushobora, igumire mu mugongo ibindi izabyikorera ubwayo.

None umva, kuva ukiri mu nda kugeza ubu uri ku mugongo. Ni ukuri Uwiteka araguhetse ntacyo uzaba humura. Ibyo bihorera nyine biriho ariko wibuke ko uri ku mugongo w’Imana uko byasa kose. Humura ntacyo uzaba. Wowe wirinde icyagukura ku mugongo w’Imana gusa ibindi bizatungana neza, urugendo uzarusoza amahoro

Nzakujya imbere ahataringaniye mparinganize, nzamenagura inzugi z’imiringa, n’ibihindizo by’ibyuma nzabicamo kabiri. Yesaya 45: 2

Mu bushobozi bwawe ziriya nzugi zikingishijwe ibyuma wazikingura? Guma mu mugongo rero wirira, wisakuza kandi wikubagana. Mureke akingure niwe ubibashije. Jya mu mugongo neza wumve umunyenga wa Papa. Uwiteka ni Papa kandi ni mama. Ni byose tumwizere.

Yesu aguhe umugisha!