Umutima wa Kibyeyi w’ Imana (Igice cya 5 Gisoza)

Ingorane zo kudahabwa ibyo umutima wari ukeneye

Uwakuze adahabwa amahoro mu muryango, ahinduka uyabuza abandi cyangwa agahorana ubwoba. Hari abantu badashobora gutuza, bahora bavurungana ukagira ngo bararibwa n’intozi. Ntibashobora kwicara, ngo batekane (relax). Bakeneye kwakira amahoro Imana itanga.

Ababuze agaciro bagendana ipfunwe, bisuzugura. Mefibosheti mwene Sauli wari ikimuga, wavukaga mu muryango wa bene Sauli ku ngoma ya Dawidi, yiyise intumbi y’ imbwa (II Sam 9:8).

Abo bantu twavuze haruguru bahora batekereza ko abandi babasuzugura, bagatanguranwa guhora berekana ko bashoboye bityo bamwe bakamera nk’ abari mw’irushanwa, bikabatera kuvunika cyane. Bagira icyo bageraho, bakarangwa no gusuzugura no guhinyura abandi. Bene aba iyo babaye abayobozi, abakorera munsi yabo bagusha ishyano. Bakeneye kwakira agaciro Imana itanga.

Utarakunzwe ananirwa kwakira urukundo. Niyo umubwiye ko umukunda agira ngo uramubeshya. Kenshi asabiriza urukundo, agahora ashaka ko abandi bamusura, bamwitaho nubwo we atabikorera abandi. Uwabuze urukundo ananirwa kuruha abandi.

Uwitwa ‘J’ yagorwaga no kubwira uwo yarambagije ngo ‘ndagukunda’. Yumvaga ari ururimi rutamenyekana. Amaze no gushaka, umufasha we yarahababariye cyane kuko twa tugambo twiza tw’abageni, ntatwo yigeze ahabwa. Uwo mudamu yagize umugisha ‘J’ yaje kwakira inyigisho zivuga k’Urukundo rw’Imana, byatumye akingura umutima yakira urukundo rw’ Imana Data nyuma aza ‘gukuramo esheki’. Umufasha we wari umaze kumera nk’umukecuru yahise ahinduka inkumi!

Ishusho ya plumbline

Byangiza ishusho n’imyumvire abantu bagira ku Mana. Uzumva benshi bigisha Imana nk’umupolisi ucungira hafi ngo afate abantu mu makosa. Abandi bakumva Imana iba kure ku buryo ititaye ku bibazo. Umwana umwe yashushanije Imana iri kure cyane kuko ababyeyi be batabaga mu rugo.

Dukurikije intego y’icyigisho twakwemeza ko bigoye ko umuntu utarahawe urukundo, utarigeze yemererwa kubwira ababyeyi be uko amerewe, uyu munsi nahura n’ibimubabaje bikomeye nko kwicirwa ababyeyi, gufatwa ku ngufu, ahite asanga Imana ariyo Se wo mw’ijuru ngo amuruhure.Biragoye.

Ishusho y’uko tubona Imana

Imana irashaka kutubera umubyeyi (II Abakor 6: 18)
Twagiye dushushanya umutima w’ Imana tukabwira abantu ngo bandike icyo bari bakeneye ku mubyeyi yaba umugabo cyangwa umugore ntibagihabwe. Ibi nibyo byagiye bigaruka: kummenya byihariye, kumvugisha neza, kutankubita, kumbaza uko merewe, kumbabarira nakoze amakosa, kunsura kw’ishuri, gutaha no kwicarana natwe, kudutetesha,.... Dusomye Zaburi 103 hatwereka ko ibi byose Imana ishobora kubitanga. Ababibuze, Imana iravuga ngo ‘nzababera umubyeyi’, bisobanurwa ko umuntu akinguye umutima mu kwizera, Imana yamusukamo urukundo, agaciro, amahoro yaburiye ku babyeyi. Ibi bihindura uko tubana n’ abandi, uko dusabana n’imiryango, uburyo tuyobora n’ibindi.

‘E’ ahamya ko nyuma yo gukira k’umutima no kubabarira se wamwihakanye akivuka, Imana yamuhaye undi mubyeyi, utari uwamubyaye, wamukunze, akajya amutetesha. Iyo ababaye uwo mubyeyi aza kumusura. Iyo afite ibyishimo abisangira n’uwo. Iyo afite ibibazo by’ ingutu, uwo amugira inama. Si ihame kuri bose ariko iyo umuntu amaze gukira, akababarira ababyeyi be, hari igihe Imana ‘imuremera’ abandi babyeyi. ‘I’ we, amaze kunyura muri iri somo, yahise agura indabyo azijyanira nyina amubwira akababaro k’ umwana w’umukobwa utarabonye urukundo. Nyina yararize amusaba imbabazi (nyina akunda indabyo!).

Nubwo Imana itaduha ‘uhagarara mu cyuho’, cyangwa igahindura imitima y’ ababyeyi bacu, yuzuza imitima yacu ibyo twaburiye ku babyeyi.Wafata akanya ko gutekereza ibyo wifuzaga kubona mu muryango utabonye. Ubibwire mu magambo yeruye Umubyeyi wo mw’ijuru.

Uzirikane ko abababyeyi bawe bashobora kuba bari bahuye n’ingorane zabo bituma bataguha ibyo umutima wawe wari ukeneye maze ubababarire ubikuye ku mutima. Ubasabire umugisha kubere ko baguhaye impano y’ubuzima kandi ubasabire umugisha kubera ibyo wibuka byiza bagukoreye.

Niba hari uburyo wabonaga Imana buvangiwe n’ibyo wahuye nabyo mu muryango, saba Imana Data kuguhishurira umutima wayo wa kibyeyi. Imana ni umubyeyi udukunda, iratwememerera ko tuyizanira ibyatubabaje. Gukira no kwiyunga bihera mu muryango!

Niba wifuza gusengerwa cyangwa kugisha inama, waduhamagara kuri +250788422984. Dusengera ibyifuzo by’abantu k’ubuntu. Sangiza ubu butumwa inshuti zawe.
Pastor Desire
www.agakiza.org
Fcbk: Agakiza.org
Chaine YouTube: Agakiza.org