Umutima wa Kibyeyi w’ Imana (Igice cya 2)

Ibikenerwa by’imbere mu mutima
Amahoro y’ umutima:
Umwana ukiri mu nda ashobora guhungabana cyangwa kwakira amahoro n’ ibyishimo nk’ uko byemezwa n’abaganga, Bilbiya nayo ikabishimangira (Luk 1:41).

Ubuhamya: "Uwo twise B" Yatubwiye ko yahoranaga umujinya, umunsi umwe nyina amuhishurira ko bahoraga batongana na se bakanarwana akimutwite ku buryo yavutse imburagihe umugabo we amaze kumutera umugeri ku nda.

Umwana wavutse mu genocide yakorewe abatutsi 1994 we yaba agendana ibikomere bingana iki? Hari abagore bari batwite, bahigwaga n’ imbwa, abandi babundabunda mu bihuru, mu bishanga bahunga urupfu.

Hari abandi bakuriye mu mahane, mu mirwano hagati y’ ababyeyi, mu gukubitwa bikomeye, mu bitutsi byinshi kugeza aho birirwaga ahandi bagacyurwa n’ijoro, barahahamutse. ‘C’ yatubwiye ko iwabo hahoraga intambara. Se na nyina bamaraga gusinda ibirahuri bakamena. Nabo ntibari borohewe kuko uwakoraga agakosa gato yarakubitwaga iz’ akabwana. Umubyeyi yarateruraga agatimba hasi! Yakuranye ubwoba bwinshi mu buzima.

Hari n’ibiganiro bikura abana umutima, aho usanga abakuru babwira abana ko ntakuramuka, ko abanzi bagwiriye, ko isi yose izabaroga. Hari abahimba abana amazina nka: Ndimukaga, Banyangandora, Mbyariyehe, Banzi, Ntahondi, n’ andi atanga amakuru ku mwana ko ibintu bizamucikiraho.

Imana yamenye ko tuzakurira mu bidukura umutima, yandikisha mu gitabo cyayo inshuro nyinshi ngo ‘ntutinye’. Kuri ‘konti’ y’ Imana umuntu ashobora kubikuza ‘ntutinye’ ku munsi. (Yesa 41:10; 51:12-13)

Ntuzacikwe n’igice gikurikiyeho.......................
Niba wifuza gusengerwa cyangwa kugisha inama, waduhamagara kuri +250788422984. Dusengera ibyifuzo by’abantu k’ubuntu. Sangiza ubu butumwa inshuti zawe.
Pastor Desire
www.agakiza.org
Fcbk: Agakiza.org
Chaine YouTube: Agakiza.org