Umunyamakuru Muganza Clement nawe ari mu batahiwe guhabwa inshingano z’ubupasitori muri ADEPR

Mu gihe mu hirya no hino mu gihugu itorero rya Pantekoti ryo mu Rwanda ADEPR rikomeje gutanga inshingano za gipasitori mu maparuwasi atandukanye, umunyamakuru akaba n’umuvugabutumwa Muganza Clement nawe ari mu batahiwe mu guhabwa izi nshingano.

Umunyamakuru Muganza Clement azahabwa izi nshingano hamwe n’abandi bane kuri uyu wa gatatu tariki 16/12/2015, umuhango uzabera mu itorero rya ADEPR-Akarere ka Karongi, ADEPR-Gatwaro, hakaba ari mu ntara y’Uburengerazuba.

Clement Muganze asanzwe avuga ubutumwa kuri Radio

Uretse kandi kuba umunyamakuru Muganza Clement asanzwe azwi nk’umuvugabutumwa ,muri paruwasi ya Kibuye, by’umwihariko akaba yaramenyekanye cyane ubwo yakoraga kuri Radio Isangano ikorera i Karongi, aho yari mu ishami ry’ibiganiro cyane by’iyobokamana. Nyuma ariko yaje kugirirwa ikizere n’itorero rya ADEPR rimushinga gukora Ikiganiro Isoko y’Ubugingo cyari gisanzwe gitegurwa na Pastor Paul Marcel wagiye mu kiruhuko cy’izabukuru.

Nk’uko bimaze kugaragara itorero rya ADEPR riri muri gahunda yo guha inshingano z’ubupasitori abanyamuhamagaro bakiri bato, ibintu bamwe bafata nk’imwe muri gahunda zo kuzana impinduka mu itorero.