Umukirisitu agomba kumenya kuganira n’umutima we

Hari igihe umuntu agira ibibazo byinshi umutima ugasa n’ukutse, bikaba ibyago bikomeye iyo adafite hafi undi muntu wo kumuhumuriza. Bisaba ko umuntu we ubwe agirana ikiganiro n’umutima. Kuko ibikura umuntu umutima bikomoka kuri Satani umwanzi w’ibyiza ariko ibikomeza umuntu bituruka ku Mana Umwami w’amahoro.

Ni yo mpamvu umuririmbyi yaririmbye ngo mu mutima wanjye harimo abantu babiri, umwe ankunda undi angoma. Bisaba rero ko uturisha amajwi yose y’urucantege yongorera mu mutima wawe ntuwemerere kwiheba kuko umutima wihebye ujugunya rwose amahoro yawo, kandi nta kintu gihenze ku buzima bw’umuntu nk’amahooro yo mu mutima.

Ibi na Dawidi byamubayeho.
Zaburi 43:5 "Mutima wanjye ni iki gitumye wiheba? Ni iki gitumye umpagararamo? Ujye utekereza Imana kuko nzongera kuyishima. Niyo gakiza kanjye ni Imana yanjye.

Imana ishimwe ko yashyizeho ubwo buryo bwo guhumuriza umutima wihebye. Igihe ubuze uguhumuriza, nukuri biremewe ko nawe ubwawe wiganiriza ukatura gukomera kw’Imana mu buzima bwawe. Kandi icyo kirere Imana igikorera mo imirimo ikomeye cyane.

Ibyo dusomye haruguru ni Dawidi wabiganiraga n’umutima we. Nawe wabaye mu bihe bisa n’ibyo, amaze gusenga Imana abonye ntacyo imusubije ahita atangira kuganiriza umutima we awumvisha ko Imana igihari kandi ko azageraho akabona ishimwe.