Ujye uba ikitegererezo cy’abizera.

Iyo usomye Bibiliya mu rwandiko Pawulo yandikiye Timoteyo 4:12, Yabwiraga Timoteyo ibikwiriye imyitwarire y’umukristo nyawe.

Aha yaramwihanangirizaga amubwira ati “Ntihakagire uhinyura ubusore bwawe ahubwo ube icyitegererezo cy’abizera kubyo uvuga, no kungeso zawe no k’urukundo, no kwizera no kumutima uboneye” yakomeje amusaba kandi kugira umwete wo gusoma no kwigisha ndetse no guhugura.

Ikindi yamwihanangirije kugira ngo yirinde we ubwe ndetse no kubw’inyigisho yigisha kugirango abashe kwikizanya n’abamwumva.

Iyo urebye muminsi ya none imyigishirize twakwita igezweho hari aho ushobora kumva umuntu akubwiye ati mwumve ibyo mvuga ntimurebe ibyo nkora, undi ukumva arakubwiye ngo agakiza kaba mu mutima nyamara siko biri kuko mu mutima ntabwo abantu bahabona ahubwo baba bakeneye guhamirizwa n’ibyo babona ahagaragara.
Yesu abwira abantu ko bazamenyera abigishwa be ku mbuto ntabwo yari ayobewe ko hari n’ibindi bice bigize igiti, ubwo wenda yari kuvuga bakabamenyera ku mizi. Ahubwo iyi mizi niyo ishorera ahatagaragara hanyuma imbuto zigatunguka aho buri wese areba.

Nta bushobozi abantu bafite bwo kureba mu mitima y’abandi, niyo mpamvu bo bavuga ibyo bareba. Umwiza bakamwita mwiza, n’utari umurokore bakamwita umupagani.
Akenshi ibyo abantu bavuga nibyo bizabatsindishiriza, iyo tuvuze kwirinda kubwawe no kunyigisho wigisha ni ukugira ngo umuntu utarigeze akizwa atabona urwaho rwo gutuka Imana kubwawe, byaba bibabaje abantu bavuga ko aho gukizwa nkawe babireka.

Iyo umwana akura imico imwe n’imwe ayigira ku babyeyi be mbese wowe muntu wakijijwe imico yawe abizera bashya bayigenderaho bakazagera mu ijuru ?
Birakwiye ko umuntu wese yisuzuma akareba ko ntaho izina ry’Imana ryatutswe kubwe, yasanga hahari akemera guca bugufi agasaba Imana gusibanganya amateka mabi agatangirana n’ubuzima bushya bubera ikitegererezo abataramenya Yesu.
Burya iyo ukora ibihabanye n’ibyo uvuga uba uri gutukisha izina ry’Imana ariko igikwiriye ni ukwitwararika, ukemera bikakuvuna ariko ukabaho uhesha Imana icyubahiro aho gutukisha izina ry’Imana mubatarakijijwe.