Isoko y’ ubwenge n’ubuhanga / Rwayitare Eric

Ubwenge n’ingenzi muri byose, ndetse Bibiliya ivuga ko umuntu yahitamo gushaka ubwenge kuburutisha ubutunzi (ifeza na zahabu) kuko ngo mubyifuzwa byose ntagihwanye nabwo (Imigani 8:10-11). Kandi ngo ubwenge bugaragazwa n’imirimo yabwo (Matayo 11:19).

Rero iyo umuntu afite ubwenge bigaragarira mu mivugire ye, imikorere ye: Aha ni ukuvuga uko ahuza ibyo avuga n’ibyo akora, ubwenge kandi bugaragazwa n’uko ikintu cyubatse aribyo bituma kiramba: Aha ni ukuvuga ngo umunyabwenge yubaka inzego (institution system) akoreramo kuburyo ubireba wese bimurenga akabona koko harimo ubwenge.

Ubwenge kandi ni ukumenya ibitazwi n’abandi kuko ikizwi na bose ntikiba kikiri ubwenge kiba cyabaye rusange. Aha rero abanyabwenge uyu munsi bagerageje kuvumbura byinshi ariko ntibamenye urugero ruhamye nyamara bibiliya yo igenda ivuga ibintu ariko bigafata abantu imyaka irenga 1000 ngo bavumbure ibyo yo yavuze cyera.

Ingero: Abanyabwenge mubijyanye n’ikirere bavumbuye ko hari amatsinda y’inyenyeri byibuze Miliyari ijana (one hundred billion galaxies). Galaxy akaba ari itsinda ry’inyenyeri ariryo bitiriye terefoni zimwe dukoresha. Muri buri tsinda ry’inyenyeri haba harimo inyenyeri hagati ya Miliyari ijana na Miliyari 400 byibuze kuko abahanga baragereranya byarabananiye kubara umubare nyawo. Kandi imwe mu inyenyeri ntoya ziriho ni izuba ryacu kandi izuba riruta isi inshuro miliyoni n’ibihumbi Magana atatu (1 300 000). Ni ukuvuga ko munda y’izuba hajyamo imibumbe y’isi 1 300 000. Gusa izindi nyenyeri zigaragara ko ari nto urebesha ijisho kuko ziri kure ugereranije n’isi kurusha izuba.

Nyamara umwami wacu “Abara inyenyeri, azita amazina zose” (Zaburi 147:5). Ibi bivuze ko na tekinologi y’uyu munsi yananiwe kubara inyenyeri ngo izimenye umubare ariko kubwa Dawidi mu myaka irenga ibihumbi bitatu ishize, Imana yari ifite tekinologi ibara inyenyeri ikazita amazina zose.

Imana iravuga ngo twubure amaso turebe mu ikirere, ikabaza uwaremye ibi byose biri mw’isanzure, ngo nta nakimwe kiyisoba, ngo kuko Ifite ubwenge n’imbaraga, ikagira amaboko n’ububasha (Zaburi 104:24, Yesaya 40:26). Imana ngo yabambye ijuru nkubamba ihema ryo kubamo (Yesaya 40:22) abantu bagerageje kureba uko ryaba ringana basanga babashije kubona icyogajuru gifite umuvuduko w’urumuri, nukuvuga kigenda miles ibihumbi 186/sec, bisobanuye ko cyabasha kuzenguruka isi inshuro 7 mw’isegonda imwe, babonye byibuze byagifata imyaka miliyari 28 byibuze kandi nabwo ntibizeye ko bitarenga. Siyanse rero y’abantu burigihe iba iri hasi cyane y’ubwenge bw’Imana.

1. Isoko y’ubwenge

Umunyabwenge wari warabayeho kera mu bami yari Salomo, aho byateye ndetse n’abami bibindi bihugu kuza kumureba ngo barebe ubwenge bwe. Umugabekazi w’i Sheba yabonye ubwenge bwa Salomo n’inzu yubatse, ibyo kurya byo kumeza ye n’imyicarire y’abagaragu be, no guhereza kw’abahereza be ba vino n’imyambarire yabo n’urwuririro yazamukiragaho ajya mu inzu y’Uwiteka, ngo arumirwa bimukura umutima. Bari barabimubwiye yanga kubyemera ngo barakabya ariko abonye ibya Salomo asanga ahubwo baramubwiye bike (2 Ingoma 9:3-6).

Nyamara uruta Salomo yarabonetse, kandi ubwenge bwe arabutanga (Matayo 12:42). Bibiliya iravuga ngo “Muri we (YESU KRISTO) ni mo ubutunzi bwose bw’ubwenge no kumenya bwahishwe” (Abakolosayi 2:3). Salomo yarafite ubwenge bwo kuvuga, ubwenge bwo kwambara, ubwenge bwo gushyira ibintu kuri gahunda buhambaye, yarazi iby’ibiti n’amabuye y’agaciro akamenya guca imanza. Kandi yarazi guhimba ibisigo n’imigani. Yaratangaje cyane.

Ariko ngo Salomo n’ubwo yambaraga akaberwa, akarya neza kandi agashyira ibintu kuri gahunda ntaho ahuriye n’ubwenge bw’Imana n’imbaraga z’Imana. Ubundi umuntu iyo amaze gukizwa akakira Yesu nk’umwami n’umukiza w’ubugingo bwe aba atunganirijwe kwiga ubwenge buhishwe muri Yesu Kristo aribwo bwenge butavugwa ahabonetse hose….tuvuga ubwenge bw’ubwiru bw’Imana aribwo bwenge bwahishwe, Imana yaringanije ibihe byose bitarabaho ngo buduheshe icyubahiro (1 Abakor 2:6-7).
Ubwenge bwose yaba ubwa siyanse, yaba ubukorokori, yaba dipolomasi yaba amategeko, indimi nibindi, imbaraga zose yaba izo gukirana, yaba iz’ibisasu bya kirimbuzi, imirabyo n’inkuba, byose n’agace gato ko muri Kristo Yesu kuko Yesu niwe mbaraga z’Imana kandi niwe bwenge bwayo (1Abakor 1:24). Ibikorerwa kw’isi byose imbere y’Imana ntanubwo bigeze kukadomo usibye imbabazi z’Imana ubundi isi iri inyuma y’ubusa ugereranije nibyo Imana yaremye (Yesaya 40:12-15).

Ijambo ry’Imana ridukangurira gushaka ubwenge kandi iyo Bibiliya ivuga ubwenge iba ivuga Yesu (Imigani 8:12). Ubwenge bwa Yesu butwigisha kwanga ibibi tugakunda ibyiza. Kwanga akarengane tugakunda kurenganura, kwanga akavuyo tugakunda gushyira ibintu kuri gahunda, kwanga kurya nabi tugakunda kurya neza, kwanga kugaburira umubiri gusa tukagaburira n’umwuka, kwanga kwigomeka ku Imana tugakunda gukora ibyo ishaka. Icyo tugomba kumenya nuko icyitwa ubwenge bwose n’ubumenyi kiva muri Yesu Kristo, yaba imibare, yaba ububaji yaba amategeko yaba tekinoloji gusa abantu ntibabizi nkuko Abisiraheli batamenye ko Igitare banywagaho cyari Yesu, babonaga banywa bakarya ariko byose byari Yesu (1 Abakor 10:4). Nk’uko natwe turya tukanywa ukagirango nuko wize computer, imibare, ububaji cg indimi nyamara iyo mibare niyo siyanse ni Yesu Kristo kuko muri we nimo byose bikomoka kandi nimo bihishwe kandi niwe soko ya byose (Abakolosayi 1:15-16).

2.Ibuye abubatsi banze niryo rikomeza imfuruka

Abantu barashaka gukora ibintu mu buryo bwabo, barashaka gukora ibyo bibwira bitagenwe n’Ijambo ariryo Yesu. Aho niho hava ijambo “Abamurikiwe (illiminati)” nyamara urumuri rw’ukuri ni Yesu Kristo kuko niwe ‘Inyenyeri yaka yo mu ruturuturu’(Ibyahishuwe 22:16) na ho bo uwabamurikiye ni satani kuko yahoze yitwa ‘inyenyeri yo mu ruturuturu’(Yesaya 14:12) kuko yarumukerubi utwikira (Ezekiyeli 28:14). Muyandi magambo gutwikira Yesu ariwe rumuri rwaka byamuheshaga kumurika n’ubwo nta rumuri agira ariko kwirukanwa mw’ijuru agatandukana na Yesu byatumye aba umwijima niko abamwisunga nabo bibagendekera.

Yesu kandi agereranwa n’urutare arirwo buye. Abacurabwenge cg se abubaka imikorere na gahunda z’isi babita nanone freemasons bivuze abubatsi bigenga bakora ibyo bishakiye aho byose byemewe, ariho hava ubutinganyi, kwihinduza ibitsina n’ibindi bizira byose. Nukuvuga ngo banze ryabuye rikomeza imfuruka, biyubakira ibijyanye n’ibyo bibwira (1 Petero 2:7).

Ubwenge bwo muri Yesu n’ubwenge bushingiye kugukunda ikiza ukanga ikibi, kandi ikiza nicyo Imana yise kiza n’ikibi nicyo Imana yise kibi. Gushaka kugira cyiza icyo Imana yise kibi rero ntibishoboka kuko Bibiliya iravuga ngo “Nta bwenge cg ubuhanga cg inama, byabasha kurwanya Uwiteka” (Imigani 21:30).

Ijambo ry’Imana riravuga ngo “Iyo baba abanyabwenge baba bamenye ibi, baba bitaye kwiherezo ryabo” (Gutegeka 32:29).Kandi umubwiriza aravuga ngo iherezo ry’ikintu riruta intangiriro yacyo (Umubwiriza 7:8).

Birakwiye rero ko turushaho gushaka ubwenge bwo muri Yesu, kuko nibwo buduha kugendera mubyo Imana Ishaka. Muri Yesu harimo ubwenge buduha kunezeza Imana maze natwe tukabona kunezezwa na yo. Ubwo bwenge tubuheshwa no gusoma Ijambo ry’Imana, Gusenga ndetse no gukurikiza ibyo twabwiwe nibyo twasomye. Ibyo bituma tumenya ibyo abshakashatsi ba NAZA batazi, kandi tumenya n’ibizaba ejo kuko dufite umwuka urondora ibihe kandi ukabitegeka. Shaka ubwenge shaka n’ubuhanga, ntuteshuke amagambo ava mu kanwa k’Imana (Imigani 4:5).

Rwayitare Eric