Uburyo bwa mbere bwo gushima Imana : kugaragaza amarangamutima unejejwe n’icyo wakorewe n’Imana. Pasitori GATANAZI Justin

INTEGO : UBURYO BWA MBERE BWO GUSHIMA IMANA : KUGARAGAZA AMARANGAMUTIMA UNEJEJWE N’ICYO WAKOREWE N’IMANA

1 Abatesalonike 5:18

Mu bibaho byose muhore mushima kuko aribyo Imana ibashakaho muri Yesu Kristo.
Gushima Imana ni ubushake bw’Imana, kandi iyo umuntu adakoze icyo Imana ishaka bimuhindukira icyaha.

Icyaha kandi ni ugukora ikinyuranye n’ibyo Imana ishaka. Gushima Imana mu iteraniro bigira umumaro kandi ni ivugabutumwa kuko byongera kurema ibyiringiro muri benedata.

Hari abanga gushima Imana ngo batikoza isoni, bakanga gutanga ubuhamya ngo batisebya ariko gushima Imana ko yatubohoye ingoyi z’ibyaha dukwiye kubivuga cyane.

Pawulo we yajyaga ahamya cyane ko ashimira Imana yabonye ari uwo kwizerwa ikamugabira umurimo wayo nubwo yabanje kuba umwicanyi, umutukanyi n’ibindi,....

Dawidi we yaravuze ati nzamamaza imirimo Imana yakoze mu mahanga. Kwamamaza ni ugukoresha uburyo bwose icyo ushaka gutangaza kigakwira henshi, ku ma television, ku ma radio, mu binyamakuru, ku byapa,....uko niko twakagombye kwamamaza imirimo y’Imana kugirango abari muri ibyo bihe nk’ibyo natwe twarimo cyangwa twaciyemo Imana ikatugirira neza nabo bagire ibyiringiro ko Imana igikora nabo ibasha kubagirira neza.

Abantu benshi basigaye bapfobya amashimwe bakanga kuvuga ngo bagiye Dubai, bakanga kuvuga ko bambaye inkweto, uburyo bariye bagahaga nyamara nayo ni amashimwe kandi akomeye kuko abenshi baba baravukiye ahantu bitari gukunda no kugendera mu modoka, abandi bambaye inkweto bakuze, abandi babona ibyo kurya barashonje bikomeye ariko ibi byose ntibikwiye kwamburwa agaciro kuko biba byaraturutse ku buntu bw’Imana.

Gushima Imana bisobanuye ko wizeye Imana kandi ko ibyo wakira byose ariyo nkomoko yabyo. Ibi kandi bizamura kwizera kw’abantu ntibacike intege kuko babona ko Imana igikora imirimo n’ibitangaza.

Matayo 11 : 25 Muri iyo minsi Yesu aravuga ati Ndagushima Data, Mwami w’ijuru n’isi, kuko wahishe ibyo abanyabwenge n’abahanga ukabimenyesha abana bato. Yesu nawe yajyaga ashima Imana.

Luka 17 : 12:19 Akigera mu kirorero asanganirwa n’ababembe 10 barataka cyane bati Mutware Yesu tubabarire. 14 Ababonye arababwira ati nimugende mwiyereke umutambyi. Bakigenda barakira. 15 Umwe muribo abonye akize agaruka ahimbaza Imana n’ijwi rirenga, yikubita imbere y’ibirenge bye aramushima kandi uwo yari umusamariya. 17 Yesu aramubaza ati ntimwakize muri icumi ? Ba bandi cyenda barihe ? 18 Nta bandi bagarutse gujimbaza Imana keretse uyu munyamahanga ? 19 Kandi aramubwira ati Byuka wigendere kwizera kwawe kuragukijije.

Aba babembe 10 bose Yesu yarabakijije ariko hagaruka umwe gusa aza gushima. Imana ni urukundo kandi ivubira imvura abeza n’ababi, imanura imigisha ku bagome ndetse n’abanyabyaha nubwo abo bose batazirikana iryo shimwe.
Aba babembe bari bakize indwara yari ibagoye, yatumaga bahabwa akato, ariko mu kugaruka gushima hagarutse umwe gusa. Iyi niyo shusho y’iki gihe abantu benshi ntibajya bazirikana gushima Imana.

Uwo mubembe wakize wagarutse yagize umugisha wo kumva amagambo abandi batumvise. Yesu yaramubajije ati ntimwakize muri icumi none abandi barihe ? Kandi uwo wagarutse ntiyari n’umuyuda ahubwo yari umunyamahanga, nuko amubabarira ibyaha bye.

Ibi byerekana ko abantu batagiha agaciro ibyo Imana iba yakoze, bakabona ko ari ibisanzwe, ariko ibi byose Yesu arabinenga.

Ko abantu bari bakize kuki Yesu yabwiye uwagarutse ati igendere kwizera kwawe kuragukijije ? Nuko yahawe no gukira n’ibyaha ndetse n’ibindi byose. Ni kenshi Imana iyo yumvise amashimwe y’abantu bayishima ibaha n’ibindi batari basabye uko niko n’uyu mubembe hejuru yo gukira ububembe yamwongereyeho no kumukiza ibyaha.
Gushima Imana biduhesha kubona indi migisha tutari dufite. Hari abantu benshi bagiye bashima Imana bikayitera kugabira abantu ibindi, abo yagiye ihindurira amazina bitwaga,...

Twibuke Salomo yagiye gusenga Imana ayisaba ubwenge ibyo bintu bitungura Imana kuko iziko muri kamere ya kimuntu dusaba ibintu bifatika bitera Imana kumuha n’ibindi atasabye.

Umubwiriza we yaravuze ngo buri kintu kigira igihe cyacyo cyagenewe, hari igihe urira ikindi gihe ugaseka.

Uku gushima Imana mu buryo bwa mbere ni cya gihe ushima Imana kubyo iba yakoze binejeje ugaseka ukagubwa neza. Gushima Imana mu gihe uba watsinze, wageze ku byiza biroroshye, kuko uba uri mu gihe kinejeje.

Uyu munsi wa none abantu bafite amazu, bafite amafranga menshi ku ma compte yabo biroroshye ko bene abo bashima Imana biboroheye usibye ko hari n’abadashima Imana kubera kumva badashaka ko abantu bamenya uko bahagaze cyangwa ntibashake no kuvuga aho Imana yabakuye mbere yo kubona ibyo byose.

Ariko dukwiye gushima Imana kuko kutabikora ni ukunyuranya n’ubushake bw’Imana kandi ni icyaha.