Uburyo 3 bwatuma umenya impano Imana yaguhaye

Kuvumbura impano Imana yaduhaye ni ibintu by’ingenzi cyane kugirango tubashe kuba abantu bakora icyo Imana idushakaho. Niyo mpamvu dukwiye kumenya ubushobozi Imana yaduhaye kugirango tubashe kuzuza imirimo Imana yadushinze.

Abefeso 2:10 hatubwirako imirimo twahawe n’Imana ihora idutegereje ngo tuyigenderemo: “Kuko turi abo yaremye ituremeye imirimo myiza muri Kristo Yesu, iyo Imana yiteguriye kera kugira ngo tuyigenderemo.(Abefeso 2:10)
Niba dushaka gukora imirimo myiza Imana yaturemeye, tugomba kuyitegura, kandi inzira yabidufashamo ni ukubanza kumenya impano zacu tukazikoresha neza duhesha Imana icyubahiro.

Ikintu kimwe cy’ingenzi dukwiye kuzirikana ni uko impano zitandukanye ariko zikaba zitangwa n’Umwuka umwe.Ntabwo umuntu afite impano zimwe ahubwo Umwuka Wera ni umwe utanga izo mpano, akaduha ubushobozi bwo gukora ibiri mu bushake bw’Imana hano ku isi tudatsinzwe. Bityo rero, ntidukwiye guhinyura ubuhanga cyangwa impano z’abandi bakristo. Twese twaremwe kimwe kandi kuba turi umwe biha icyubahiro Umuremyi wacu , bigatuma tubasha kuzuza iby’abandi bakeneye.

Uku niko wamenya impano ikurimo:

1.Gerageza kuyikoresha

Hari ibintu twita ko bishoboka.Abenshi muri twe ntibabasha kuvumbura ubushobozi Imana yabahaye kuko batagerageza kubukoresha.
Abakinnyi ntibavukanye imbaraga zidasanzwe cyangwa amaguru y’ibyuma.Baritoza, bikaba ubuzima bwabo bwa buri munsi, kandi bagahora bakina kenshi gashoboka kugira ngo bagende bamenyera.
Kimwe natwe, dukwiye kwitoza gukora ibintu tutigeze tugerageza, tugasuzuma ibyo twifitemo. Tekereza kuri ibi: Ni gute Petero yari gushobora kugenda ku mazi atabashije no gutera intambwe imwe ?

2.Igenzure ubwawe witonze

Nyuma yo kugerageza ibiturimo, dukeneye kwisuzuma twitonze.(tukamenya impano twifitemo[ubuhanga, impano,…] Abenshi muri twe bagerageza kutwemezako bagiriwe ubuntu bwo guhabwa impano n’ubuhanga twe tudafite, ariko dukwiye kubyitondamo. Abaroma12:3 hatubwirako tudakwiye kwifata uko tutari, ahubwo tukamenya aho tugarukira :
“Ndababwira umuntu wese muri mwe, mbwirijwe n’ubuntu nahawe, mwe kwifata uko mutari, ahubwo mutekereze mwitonze nk’uko Imana yagereye umuntu wese kwizera.”(Abaroma12:3)
Kumenya urugero twahawe bizatuma dutura imitwaro yo kugerageza kurushanwa n’abandi ahubwo bizadufasha gukora icyo Imana yaturemeye.

3.Baza abantu uko babibona

Biba byiza kwegera abantu bizewe b’inyangamugayo ukababaza uko bakubona.Yeremiya17:9 hagira hati:
“Umutima w’umuntu urusha ibintu byose gushukana, kandi ufite indwara ntiwizere gukira. Ni nde ushobora kuwumenya uko uri?”(Yeremiya17:9)

Abenshi muri twe turisuzuma ubwacu, ntidushobora gutekerezako hari ibintu tutazi cyangwa tutahawe impano mu kintu runaka turimo gukora. Rero dushobora kwishuka. Ariko abandi bantu bashobora kutubona neza kurusha uko tubikora.Bashobora kuduha ubufasha bakatubwira ku myitwarire yacu, ibyo dushoboye gukora neza, ibyodukwiye kongeramo imbaraga ndetse n’ibyo babona tudashoboye gukora.

Reka tureke ubwoba bwo kubaza abantu uko batubona , kuko bizadufasha kumenya ibyo dukora neza, bityo tubikoresheduhaza ibyo abantu bakeneye kandi twuzuze umugambi w’Imana.

Sophie @Agakiza.org