Ubukene (crise): ingaruka yo gukunda impiya?

«Ngaho yemwe batunzi mwe, nimurizwe muborozwe n’ibyago mugiye kuzabona. Ubutunzi bwanyu buraboze, nimyenda yanyu iriwe n’inyenzi, izahabu n’ifeza zanyu ziriwe n’ingese,…» Yakobo 5:1-3.

«Kuko gukunda impiya ari umuzi w’ibibi byose, …» 1 Timoteyo 6:10.

«Mwitonde kandi mwirinde kwifuza kose, kuko ubugingo bw’umuntu butava mu bwinshi bw’ibintu bye» Luka 12:15.

Murakaza muri iyi si itegekwa n’ifaranga! Mu by’ukuri, nta cyo umuntu abasha gukora adafite amafaranga. Iyi si ya nyamwigendaho ishingiye mbere na mbere ku ifaranga, kugeza ubwo abantu babaye abacakara b’ubutunzi. None se ko abakire bagenda barushaho gukira, abakene na bo bakarushaho gukena, ifaranga n’ubutunzi muri rusange bitwereka iki? Nk’Abakristo dukwiriye kwirinda, ariko tutirinda ifaranga ubwaryo ahubwo twirinda gutegekwa na ryo.

Ni koko amafaranga ni meza. Ariko se ni ay’iki?

Abantu batuye iyi si biroha muri byinshi bitagira umumaro, babitewe no kwifuza guhaza irari ryabo bwite. Ifaranga rero ni ryo ribafasha kugera ku byo bifuza, ndetse no ku butegetsi. Kwikunda gukabije k’ukuntu kumutera guca mu nzira zitemewe, kugira ngo agere ku cyifuzo kimwe rukumbi ni cyo cy’iki: kugira amafaranga menshi!

Ibyo rero bitera kwibaza: Abakire bakora iki kugira ngo barusheho gukira, abakene na bo barusheho gukena? Aha wakwibaza niba kuvuga ko hariho ubukene atari amageza yo gushaka gusenya imbaga (society).

Rimwe na rimwe tujya dutinda kwemera akayabo k’amafaranga kagenda kuri sport, cinema no mu bucuruzi… aho ni ho abafite ubutunzi bigaragariza, ndetse no mu bigirwamana. Ibi bigaragara cyane iyo witegereje igice cy’isi gikennye cyane (Africa), iyo agace gato k’ayo mafaranga gakoreshejwe mu bikorwa by’ubugiraneza bakavuga ko bizahashya inzara ku isi!

Ni gute umuntu yagira ubwenge ku bijyanye n’ifaranga?

Aguri yari umunyabwenge. Yasabye Imana ati «Ntumpe ubukene cyangwa ubukire, ahubwo ungaburire ibyokurya binkwiriye…» ! (Imigani 30:8b).

Iyo twigishijwe n’Imana, tubasha kuyishima mu bisaga no mu bukene. Ariko tugomba kwirinda umwanzi ushaka kutwohesha uburiganya bwe ngo tutegera Imana, kandi azi neza uburyo yakoresha ibyo dutunze kugira ngo agere ku ntego ye.

Iyo usomye Umubwiriza 7:12, ubona ko amafaranga ari ubwugamo ariko ubwenge ni ubwugamo buruta ubundi. Amafaranga adufasha kubona ibyo dukeneye mu buzima, ariko ntibibujije ko atuma benshi bagirira nabi bagenzi babo. Urugero rufatika rw’Abakristo, ni inkuru dusanga muri Matayo 26:14-16. Haranditswe ngo «Hanyuma umwe muri abo cumi na babiri witwaga Yuda Isikariyota, asanga abatambyi bakuru arababaza ati “Mwampa iki nkamubagenzereza?” bamugerera ibice by’ifeza mirongo itatu, aherako ashaka uburyo yamubagenzereza.»

Tekereza kugira ngo amafaranga atange Umwana w’Imana ngo abambwe!

Isi yibwira yuko amafaranga ari ubwugamo… Muri iki gihe, banki ni ikimenyetso nyamukuru cy’ubutunzi. Tujyanayo amafaranga yacu, twibwira yuko ari ho azagira umutekano. Iyo myumvire ivuga ko kugira amafaranga ari ko kurindwa, ishobora kutubera ikigirwamana. Ubwo ni bwo dushaka ubwishingizi bw’ubuzima kugira ngo butubere ubwugamo, ariko se ni kangahe ibyo bidukiza?

… Bibiliya ivuga ko Imana ari yo izatugororera

Tuvugishe ukuri: Bibiliya ntirwanya amafaranga! Mu Isezerano rya Kera, ubukire bwagaragazaga ko umuntu amerewe neza, kandi ko uwo muntu Imana yamugiriye neza. Uhereye mu Itangiriro, tubona ko Aburahamu yari «afite imikumbi myinshi, ifeza n’izahabu» Itangiriro 13:2.

Ikibazo ni igihe amafaranga atubereye ikigirwamana, akatujyana kure y’Imana. dore imirongo itwereka icyo Imana ivuga ku mafaranga:
“Ntimukagire ingeso zo gukunda impiya ahubwo mujye munyurwa n’ibyo mufite, kuko ubwayo yavuze iti ‘Sinzagusiga na hato, kandi sinzaguhana na hato.’” Abah. 13:5.

«Nta we ukeza abami babiri kuko yakwanga umwe agakunda undi, cyangwa yaguma kuri umwe agasuzugura undi. Ntimubasha gukorera Imana n’ubutunzi» Matayo 6:24.

« Wihanangirize abatunzi bo mu by’iki gihe, kugira ngo be kwibona cyangwa kwiringira ubutunzi butari ubwo kwizigirwa, ahubwo biringire Imana iduha byose itimana ngo tubinezererwe » 1 Timoteyo 6:17.

« Kandi usa n’ibizibwe mu mahwa, uwo ni we wumva ijambo, maze amaganya y’iyi si n’ibihendo by’ubutunzi bikaniga iryo jambo ntiryere» Matayo 13:22.

« Kuko gukunda impiya ari umuzi w’ibibi byose» 1 Tim 6:7-10.

Tuvane imitima yacu ku by’isi, ahubwo “dushake uko twakwibikira ubutunzi bwacu muri iyi minsi ya nyuma.” Kuri twebwe, “iminsi ya nyuma” ni ibanziriza kugaruka kwa Yesu kugira ngo itumenyeshe aho ubutunzi bwacu nyakuri bubitse, ari bwo tuzabana iteka ryose. Ni irihe tandukaniro hagati y’ubutunzi bw’iteka ryose n’ubutunzi bw’iyi si, ubwo intumwa ivuga iti «Ubutunzi bwanyu buraboze…»?