Ubuhamya bwa SIBOMANA Jean Damascene wapfuye akazuka

Nitwa SIBOMANA Jean Damascene ntuye mu mujyi wa Kigali, ndacyari ingaragu, ndashima Imana ko yampaye agakizwa kayo ku buntu ndetse ikangabira umurimo wayo

Navukiye mu muryango udakijijwe, data amaze kujya gutabara igihugu nibwo narerewe kwa nyogokuru ari naho naje kumenyera inzira y’agakiza na nyuma yuko data atabaruka nakomeje kugendera muri iyo nzira

Nyuma rero naje gukura gutyo niga amashuri abanza, ayisumbuye ndetse na kaminuza, ngeze mu cyiciro cya gatatu cya kaminuza mu bijyanye n’ubushakashatsi mu gihugu cya Kenya, ndagenda mbana n’abandi banyeshuri bagenzi banjye turiga tugeze hagati mu gihembwe, ndabyibuka icyo gihe nta byo kurya twari dufite, bamwe tujya guhaha abandi basigara bakora amasuku mu rugo

Twaragiye turahaha tugarutse twambuka umuhanda mu buryo bwemewe n’amategeko ariko muri Kenya burya bagenda nabi cyane mu muhanda, gusa kuko twari tuziko turi kwambuka mu buryo bwiza, haturuka imodoka iza yirukanka cyane hari mu muhanda umanuka imodoka ikubita dos d’anne iratugurukira uko turi bane iratwurira

Uko yakatwuriye, bagenzi banjye babiri basigara aho ariko njyewe umwenda wanjye urafata mu modoka irankurubana cyane nko muri metero nyinshi, ubwo abantu bakoma induru babonaga inyama gusa gusa, nari nangiritse bikomeye
Ubwo nahise njya muri koma, amaraso yuzuye umubiri wose ariko bagenzi banjye bo baratakaga ariko bigaragara ko bariho,

Mu byukuri tujye dushima ubuyobozi bw’igihugu cyacu buratabarana cyane, ariko muri icyo gihugu nta wita ku bandi, icyo gihe batugonga hari mu masaa sita ariko twageze kwa muganga saa kumi n’imwe, nyuma rero twabuze utujyana kwa muganga ariko tubona umugiraneza aradutabara ariko amasaha yari yarenze

Ubwo ambulance yaraje iradutwara, ariko umwe muri twe wasaga nkaho ari muzima ho gato bamujyana ku ivuriro riri hafi ahongaho twebwe turakomeza turagenda ariko mu byukuri kubera ukuntu Kenya ari nini, kuva aho twakoreye impanuka kugera ku bitaro hari urugendo rungana no kuva I muhanga ugera I Kigali andi ubwo nubundi bari batinze kutujyana

Turi mu nzira tugenda rero nibwo ba bandi babiri twari kumwe bahise bapfa kandi ari bo bagaragaraga ko bagifite agatege kuko bo babashaga gutaka mu gihe njye nari ndi muri koma, ubwo umushoferi yarakomeje aragenda ariko agenda aziko atwaye imirambo, yageze ku bitaro avuga ko nubundi azanye imirambo ariko ndashima Imana yo mu ijuru yandokoye urupfu rukomeye nkurwo muri bagenzi banjye

Akivuga ko twapfuye abaganga baradupimye basanga nkifite akuka gacye cyane batangira kunyitaho ariko namaze ukwezi kose muri koma ntazi iyo ndi, ndashima Imana ko abantu bakurikiranaga amakuru yanjye uko bwije nuko bucyeye

Naje kuva muri koma rero narakanuraga gusa ariko nta kintu nari nzi, nza kumara ukundi kwezi ntangira kuvuga mbaza impamvu ndi kwa muganga ariko bakanyihorera, mu kwezi kwa gatatu nkiri kwa muganga nibwo wa musore utari wakomeretse bikabije yaje kundeba ariko bamubuza kumbwira uko byagenze kuko ntibukaga uko bagenze

Nyuma rero umuntu umwe ni we waje kunsura kwa muganga ambwira uko byagenze kose umutima uhita utera cyane abaganga bahita bahurura baza kumfasha ngenda nkira gahoro gahoro

Ndashima Imana y’amahoro yandindiye umutwe ukaba muzima, ndashima Yesu wampaye casque mu gihe nari ngiye gukora impanuka Imana irinda umutwe wanjye n’umugongo yagize neza, nyuma y’ umwaka ndi mu bitaro naje koroherwa nkomeza amasomo ndetse ndanayarangiza Imana ibishimirwe

Uyu munsi wa none ndi muzima kandi ingingo zose numva zikora kandi na nubu Imana iracyakomeje kungirira neza
Amen!

[email protected]