Ubuhamya bwa MUKANKURANGA Angelique, uko yarokotse Genocide ( igice cya kabiri)

Bimaze kuba nka saa yine za mugitondo, nari nihishanye n’abandi, igitero kiratuvumbura bahita bankubita ikibatira cy’umuhoro mu mugongo ubugi bufata umwana mu mutwe arasaduka, amaraso akwira mu mugongo ngenda mvirirana, turakomeza turagenda turenga abapfu hashize iminsi itatu nibwo naguye mu kindi gitero, twari benshi, baratubwira ngo twese twubike inda hasi ubwo umwana ndacyamuhetse yarize ageze aho araceceka, bararashe bararasa cyane, abantu barapfa abandi bararokoka kuko bari bumvise ko inkotanyi zaje.

Noneho mvamo n’abandi bantu bacye turahunga tujya mu kindi gice mpungana n’undi mwana twari mu kigero kimwe baramufata bati iwanyu ni ibyitso bamuzamura ku gikuta baramubamba, bafata igiti k’igisongo bagikubita mu ijosi gifata ku gikuta, n’ikindi mu ruhago, ariko bataramutera icya kabiri yaratatse ku buryo nanubu iryo jwi rye nkiryumva.

Mbibonye ntyo mbwira abari bamaze kumwica nti ndabizi nanjye napfuye ariko noneho mubanze mumpe amazi yo kunywa ubundi munyice, bati amazi yo rwose arahari, icyo gihe bahise bafata ikintu k’igikombe batega aho umwana yari amanitse kuko havaga amaraso menshi, bategaho barampa ndanywa kuko nari maze iminsi ntarya ntanywa kandi mpetse n’umwana, ampa igikombe cya mbere cyuzuye amaraso ndanywa, ampa icya kabiri n’icya gatatu mbinywa nkubitwa noneho numva amaraso akwiriye umubiri wose kuko nari maze kunywa nka litiro ebyiri.

Baramfata bakubita intoki n’ibirenge ndababara bikabije mpinduka inyama ku ntoki n’ibirenge ngeze aho numva kubabara birashize kuko umubabaro wari wandenze bankurura nubitse inda banyinjiza mu kizu basa n’abegekaho baragenda, noneho mpamara umunsi, mu byukuri iyo isazi yankoragaho numvaga ari nk’icyuma banteye kuko intoki n’ibirenge byari byabaye inyama kandi ndahetse sinabashaga kwinyagambura kandi nubitse inda, hashize iminsi ine yiyongera kuri itatu twamaze tuzenguruka, inkotanyi zaje kuza zituvana ahongaho ariko ntumva bagenda bampa agakoma bucye bucye,

Noneho wa mwana bamunkura mu mugongo, amaze amasaha atatu ahita yipfira, ubwo najye baramvura ariko sinkire kuko baribaranteraguye utwuma mu birenge mbambwira ikibazo mfite bambaga numva nta kinya kuva saa mbiri kugera saa cyenda bataratumaramno, nagize umubabaro ntavuga uko ungana, baramvura ndakira.

Intambara ihosheje baratubwira bati musubire mu buzima busanzwe, mbura amerekezo kuko hahandi ha mbere bari baragiye Uganda, aha kabiri babishe mbareba, nibajije ahantu ndi bujye ndahabura neza, ubundi ndazerera gusa, kuko nari narabaye n’inyamaswa mara amezi atandatu ntavuga ntagira iyo mba
Igihe kimwe naciye ku bantu baganira baravuga ngo uziko hari umusore waturutseuganda arwana avuga ko asanze baramwiciye umuryango yakwihorera none bakaba baramufunze? Nahise mfata umwanzura wo kujya gushaka perezida nkamubwira ibyambayeho, numvaga perezida ari umuntu usanzwe nk’abandi ariko nkumva agomba kumenya ibyambayeho.

Navuye muri ngarama ngenda n’amaguru ngera I remera, icyo gihe nari mfite imyaka 13, nagenze n’amaguru aho nduhiye nkaryama aho, bwacya nkakomeza, ndinda ngera I remera n’amaguru, mpageze mbona umugabo mwiza w’umusirimu rwose, ndamubaza nti ese wanyoboye kwa perezida ko mushaka byihutirwa,
Ati se urashaka perezida wuhe? Nti nyine urabona ko hari perezida wapfuye, nti ariko hari undi wahise umusimbura, nti rero uwo ni we nshaka, ambaza icyo mushakira ndamubwira byose, mubwira agahinda kose nagize arangije arandeba aranyitegereza ancira mu maso arigendera.

Ndongera mbona undi na we mubaza ntyo, arangije arambwira ati rero wa mwana we ati ntureba ko ufite imyaka 13? Ati uzarinda usaza utabonye perezida imbonankubone kuko Atari umuntu upfa kuboneka, ubwo nahise nshika integer burundu mpita nigira inama yo kuva mu gihugu kuko n’ubundi ntazahasubirizwa, cyakora nabonye umu mama unshumbikira na we mutekerereza ibyambayeho byose n’ibyo nshaka na we anca intege.

Arangije antegera imodoka nsubira I gatsibo ntagira aho ndara, ntagira aho mba, nyuma naje kujya ku muturanyi twari duturanye mbere y’intambara nsanga na we yabaye inshike arangije aranyakira turibanira ariko n’ubundi nta mahoro nari mfite, igihe kimwe rero ndyamye ndota uwo muturanyi ari kunyirukankana ashaka kunkubita ishoka, mu nzozi ndiruka umunsi wa mbere, uwa kabiri, uwa gatatu ngera za rwinkwavu mvuye I gatsibo ariko njyewe nkaba nziko niryamiye ndi kurota, ndebye inyuma yanjye ngirango namusize mpita nicara ndaruhuka nicuye nsanga ndi ahantu hadasanzwe.

Noneho ngeze aho hantu mbona abantu benshi baje kureba umwana wasaze, baza iruhande rwanjye nkibaza nti ese ni njye wasaze? Nirebye mbona ndasa nabi cyane, mbona ndasa n’umusazi koko,noneho ngira ipfunwe, ndavuga nti narasaze disi, ubwo mu bantu baje kureba umwana wasaze na musaza wanjye yari arimo ariko ntiyamenya.

Ubwo nagiye ahantu ndiherera mbaza Imana impamvu ingaruye mu buzima itandetse ngo nkomeze nisarire, ngiye kubona mbona umwana araje arambwira ati ngwino twijyanire, turagenda iwabo ampa ibyo kurya birananira nshyira umumama baturanye ati fasha uwo mwana nzaza tuvugane arigendera.

Umumama yaramfashije arankarabya, ampa igikoma amfata neza nkamubaza aho turi akambwira, icyumweru kirashira, wa mwana akajya aza kunsura ariko simenye ko ari we wanzanye aho, ubwo maze kugubwa neza umwana akanganiriza, ndakura, umuntu yambaza uko nitwa nkanga kumubwira ko nitwa IBYIKIGIHE, nkavuga ko nitwa NINDE UNKUNDA, irya naryo hashize igihe numva sindikunze nkajya mbwira abantu ko nitwa MUKANKURANGA kuko wa mugore bishe mu ntambara yari yarandeze neza kandi yitwagagutyo numva nshatse kwitwa ntyo, umuntu umbajije uko nitwa nkamubwira Mukankuranga.

Ubwo igihe cyarageze ndakura, wa musaza wanjye na we nsanga yitwa Manzi, hashize iminsi njye na Manzi turakundana ariko twese nta wari warigeze abwira undi amateka ye, ansaba ko tubana, ababyeyi baratwemerera, imihango y’ubukwe iraba, habura iminsi icyenda ngo tubane nk’umugore n’umugabo, Manzi musaba ko yamperekeza tukajya hahandi naje nturuka nataye umutwe tukajya kubabwira ko mfite ubukwe, ubwo yarabyemeye turagenda tugezeyo abantu twari duturanye batangira kunyibuka baribukiranya bati ntimwibuka ba bana batoraguye ari impanga, bati uyu ni IBYIKIGIHE noneho babivuga gutyo Manzi akibuka ko afite mushiki we witwa gutyo kandi arebye asanga icyo gice yakibayemo.

Igihe cyje kugera rero arambaza ati ko numvise bakwita gutya, ubundi mu kuri witwa nde? Ubwo nahise mucira mu mateka yose yose, amaze kubyumva atyo araturika ararira ngirango wenda cheri arijijwe no kumva ibyambayeho, ndamuhumuriza, arangije anjyana mu gikari ati ngwino nkubwire, turagenda arambwira ati ni njyewe IBYIYINGOMA ubwo twese twaguye mu kantu, dusubira mu nzu tubabwira ko twari tuje kubabwira iby’ubukwe ariko ko dusanze tuva indimwe mpita numva mbivuyemo iby’ubukwe.
Ariko mbere yaho twari twararyamanye antera inda ntabizi na we atabizi……………………………

Ntucikwe n’igice gikurikira……………..

Liliane [email protected]