Ubuhamya bwa MUKANKURANGA Angelique, uko yabyaranye na musaza we bavukana ari impanga


Mu bice biheruka twabagejejeho ubuzima bugoranye MUKANKURANGA yanyuzemo n’uko yarokotse Genocide yakorewe abatutsi mu mwaka w’1994,mu gice cya nyuma cy’ubuhamya bwe harimo uko yabyaranye na musaza we bavukanye ari impanga.
Bwaracyeye mu gitondo, musaza wanjye arakaraba, agenda nk’umuntu utembereye, turamushakisha turamubura neza neza, ndongera numva neza ntaye umutwe, numva igihugu cy’u Rwanda ndacyanze burundu kuko nta mahoro nigeze nkibonamo na make, ubwo aho nabaga bahise basa n’abandebye ijisho ribi mbura icyerekezo mfata umwanzuro wo kuva mu gihugu nkajya gushaka iyo mba.

Ubwo nagenze ishyamba rinini ntazi iyo njya, ndagenda koko, ndananirwa, ibirenge biratoboka, ndagenda nsha Tanzania ngera Uganda n’amaguru, mpingukira mu nkambi ya Nyakivara urwo rugendo narukoze hafi amezi arindwi.
Ngezeyo nsanga za nterahamwe zangiriye nabi cyane niho ziri, ubwo kandi inda igeze mu mezi arindwi ntazi ko nyifite, njya ahantu barancumbikira bambwira ko ndyama iryo joro gusa ariko ko bucya hari abaza kunyica, naraye hanze y’inkambi, bucyeye mfata inzira ndagenda ntazi iyo njya, mu gihe nicaye ku kazuba mbona umugabo anturutse imbere ancaho ariko asiga ankozeho ku bitugu, mpita numva ngize imbaraga nyinshi ndamukurikira turagenda, mbona anyinjije ahantu mu kizu arangije arakinga.

Ngiye kubona mbona azanye ibyatsi ndariye, umunsi wa mbere ndarya, uwa kabiri ndarisha kandi mfite appétit, ku munsi wa gatatu numva akenge kangarutsemo, ndungurutse hanze mbona nta muntu uhari , nsohoka niruka ndagenda, ngeze hanze gato numva umuntu ahamagaye umwana ngo ngwino utware amateke, mbabwije ukuri numvise ari Imana ivuganye najye kuko aho najyaga hose bavugaga ikigande gusa.

Ubwo ndatwite inda nkuru ya musaza wanjye w’impanga, naragiye nsaba amazi muri urwo rugo, uwo mugore anzanira amamininwa ndayanywa ariko mpinda mbira ibyuya byinshi nsa nkutaye umutwe, andyamisha ahantu ku mucyeka, ahashize akanya anzanira amata ashyushye ndanywa , burira , buracya umumama aranyondora cyane ubwenge busa n’ubugarutse, arankarabya ndongera ngarura ubumuntu
Icyumweru gishize noneho atangira kumbaza uko byangendekeye, ndamubwira, arngije arandeba ati mbese ko mbona ausa n’umuntu utwite? Nanjye nirebye mbona birashoboka koko, ndabimwemerera mubwira uko byagenze kose, nigumira aho igihe kiragera ndabyara barampemba .

Nyuma nza kumva itangazo risaba ko abantu bashaka ibyangombwa byo kuguma muri Uganda ari abanyarwanda bagende babahe ibyangombwa, twaragiye tugezeyo badupakiza imodoka batugarura mu Rwanda bintunguye gutyo, ndongera ndaserera kubera ko ntaho kuba nari mfite, numva ubuzima burongeye buranshanze, umwana musigayo, kugeza ubu nta nubwo turabonana, musaza wanjye ntawe nongeye kubona
Ariko ntangira kubaza Imana nti ese birashoboka ko nabona amhoro yo mu mutima? Mbwira Imana ngo imbabarire impe amahoro kuko numvaga ndemerewe mu mutima cyane, ubwo nagiye mu rusengero rwari aho hafi baransengera ndakizwa.

Nyuma yo gukizwa numva amahoro yuzuye umutima wanjye, ndira amarira menshi cyaneee, numva nkunze Imana, nkumva nakwigumira mu nzu y’Imana gusa, ngenda nkira gahoro gahoro, ndongera mba umukobwa mwiza, ndasabwa, ndashyingirwa, ubu mfite umutware n’abana batatu turashima Imana yagiye ibana natwe muri ibyo bihe byose none tukaba turi amahoro.

Liliane [email protected]