Ubuhamya bwa Bishop GACURA igice cya kabiri

Ubwo icyo gihe nageze ku ruzi umuntu ansangayo rwose ndi hafi kwinjira mu ruzi ngo niyahuremo kuko numvaga ndambiwe ubuzima bubi ahita antegeka ko dusubirana mu rugo nuko ndagenda umugambi wanjye uburizwamo inshuro ebyiri zose, ku nshuro ya gatatu nafashe umuti wica uburondwe ku nka mfataho gacye nshyira ku mufuniko w’icupa, ntarawunywa wose ukora ku rurimi ho gacye urankebagura ariko ngiye kumva numva ijwi rimbwira ngo kandi ubwo wapfa, ubwo mpita mpinda umushyitsi nzubiza hasi ariko mu byukuri ibyo byose nabikoraga kubera umubabaro n’agahinda nabaga mfite

Nakomeje kuba muri ubwo buzima rero ariko nkanga umuntu umbwira ibyo gukizwa, nyuma rero nibwo namaze ibyumweru bitatu numva ijwi rinsaba gukizwa, nkibaza ukuntu nzajya gusenga mu barokore kandi nari narabajujubije kubera kubatuka mvuga ko ari abasazi

Ijoro rimwe rero nibwo rya jwi ryakomeje kumpata kujya gusenga ndangije ndakambakamba mfata urugendo rurerure njya kuri rwa rusengero ngezeyo nsanga Imana yantanzeyo ndakizwa nkunda Imana n’ubuzima bwanjye bwose, mu byukuri nihannye icyaha cyo kutababarira kuko hari umuntu wankubitaga cyane numvaga naramwanze, narihannye kubandwa, guterekera, umujinya, kwiyanga n’ibindi byinshi birimo agahinda n’umubabaro mwinshi

Nyuma yo gukizwa rero najyaga nzinduka ngatunganya inzu y’Imana kandi mfite ubumuga, abandi bajya mu ivugabutumwa ngasigara mbasengera cyane bagaruka bakambwira uko urugendo rwagenze nkumva ndanezerewe mu mutima kubera ko nanjye hari uruhare nagize mu ivugabutuma najyaga hejuru y’inzu nkasakara inzu y’Imana ndasakara ntangira gukorera Imana muri ubwo buryo

Nakomeje kugira inzara n’inyota byo gukorera Imana ngashaka gusoma bibiliya ariko simbishobore kuko ntarinzi gusoma, nza gufata igihe kimwe nsenga amasengesho yo kwiyiriza ubusa nsaba Imana ko yanyigisha gusoma no kwandika, haciyeho imyaka 2 gusa nsenze Imana ubwo nari maze kugira imyaka 15 nibwo natangiye ishuri mu mwaka wa mbere w’amashuri abanza ndabyibuka icyo gihe abanyeshuri baranshungereye ikimwaro kiranyica ariko ndiga ndabishobora ku buryo mu mezi atatu yonyine nari maze kumenya gusoma bibiliya kuva mu itangiriro kugeza mu byahishuwe

Igihe kiragera rero Imana ikajya irara inganiriza, ikambwira ko nkwiye kuvuga ubutumwa, ndabyemera nkajya mu byaro hirya no hino nambaye ibibote mu mavi nkagenda nkavuga Imana ubundingataha
Narakomeje niga amashuri yose na kaminuza ndarangiza neza, ninjye muntu wa mbere wazanye diploma mu rugo kandi barantanze kwiga, ndashima Imana yangiriye neza ikampa kwiga no kuyimenya biruseho, nakomeje gukorera Imana bihinduka ubuzima bwanjye bwose ikantuma ngatumika ngirana ubusabane nayo nkayikorera henshi hatandukanye

Igihe cyaje kugera rero nshaka umugore Imana ibanza kumuganiriza mbere yuko mubaza izina, Imana irabanza iramwibwirira ariko aratokesha yirukana abazimu ariko bigeze aho ndatobora ndagenda mubwira ko mukunda adatinze aranyemerera anyemera ntagenda, anyemera ntabasha guhaguruka

Nyuma Imana idukorera ibitangaza dukora ubukwe bwiza, turabyara ubu dufitanye abana bane, abahungu batatu n’umukobwa umwe

Bishop GACURA n’umuryango we

Ndashima Imana yabanye nanjye ikankorera imirimo n’ibitangaza umwana w’umuntu atari kunkorera

Ushobora kuba ufite ikibazo gikomeye wibwira ko Imana itakugirira neza ariko irashoboye iyashoboye ibyanjye yashobora n’ibyawe

Amen!

[email protected]