Ubuhamya bw’ukuntu yarokotse Genocide yakorewe abatutsi mu mwaka w’1994

Iwacu ni mu karere ka Bugesera mu cyahoze ari komine Kanzenze cyayoborwaga na bururgumesitere witwaga Rwambuka wanditse amateka mabi muri iki gihugu, abantu bajya bavuga ko kwicwa kw’abatutsi byaturutse ku kuba indege ya Habyarimana yahanutse ariko njye siko mbizi

Bajyaga batubwira ko mu mwaka w’1994 hari abatutsi bajyanye i Bugesera kugirango bicirweyo na tsetse, babaka utwabo twose,
Mu mwaka w’1992 Genocide yarageragejwe turahunga bamwe barapfa abandi baratwikirwa abandi baba ibicibwa, ndibuka ko twebwe twahungiye muri ETO abandi bajya i Gahanga niyo mpamvu mvuga ko icyatumye abatutsi bicwa atari indege ya Habyarimana

Indege ikimara guhanuka hari saa mbiri z’ijoro dutetse mu gikoni tubona ibishashi biratse batanga itangazo ngo abantu bagume aho bari ku itariki 9 nibwo iwacu byasobanutse bavuga ko nta mututsi uzongera kuharangwa, abagabo birwanaho bararwana biranga uwari ufite imbunda atangira kurasa abandi turahunga tujya mu nzu y’Imana ku kiriziya I mwogo turabireba haza umuntu umwe atubwira ko bagiye kuza bakatwica, turahunga tugera ahantu mu gasantere batuvugiriza induru batera amagerenade n’amasasu menshi

Twarakomeje tugeze aho twari duhungiye dusanga nta muntu uhari abaho nabo bahunze abandi bapfuye, ubwo abakuru bahagaze aho tugiye kumva twumva induru ziravuze tujya mu rusengero kwa Pasteur uwinkindi, Pasteur ati duhumirize dusenge ariko yari ku isiri n’abicanyi ubwo barahumirije ngo barasenga bumva amasasu menshi ariko bacye twari twacomotse twirutse

Bakomeje kuduhiga ujya mu ishamba turiruka ariko imvura ituri hejuru ari nako tunyura ku mirambo ya benshi birakomeza biba nabi cyane bigeze mu kwa gatanu haza abasirikare b’I gako baraturasa bakarasa n’aho batareba tujya kwambuka uruzi kandi ubwo inzara ni yose, imvura ni nyinshi ariko imvura yaradufashije cyane kuko iyo yagwaga bajyaga kugama natwe tukaruhuka

Twaje kwambuka uruzi mu ma saa kumi n’imwe batubonye batumanukaho kuko twarengaga 70 tugeze ku ruzi turicara baba batugezeho bati tugiye kubasubiza muri bosiniya ubwo bankuramo banyicaza ku ruhande ngo kuko nari umuhanga mu ishuri barobanuramo abo bazi ubundi abasigaye babica urupfu rubi cyane abagabo bakabica nabi, abakobwa babaca amabere ibintu biba bibi cyane

Ubwo naje gusigara njyenyine mu bantu 70 basigaye aho barantemye bantema icumu muri trompes bantema mu mavi yombi barangije baramboha bantera inyundo mu mavi baranzirika amaboko bayazirikira inyuma ndababara bikomeye barangije banjugunya muri nyabarongo itemba baziko napfuye

Uruzi rwarantembanye mara iminsi itatu amaguru n’amaboko aboshye mara iminsi itatu mu isayo aho amazi yantaye ariko ubwo sinari nkiri kumva, abantu bari barimo kwihisha bansanga aho intozi ziri kundya mu kanwa no mu mazuru

Bankuyemo baranyanika ndumuka bigeze nimugoroba banjyana iwabo barampisha hashize iminsi mike inkotanyi zifata ahongaho ncika ku icumu gutyo baramfata banjyana indera banyitaho gutyo nza gukira gahoro gahoro
Ndashima Imana yangiriye neza ikankiza muri ubwo buryo

Amen!