Ubuhamya:Imana niyo yonyine ibasha guhindura amateka y’umuntu

Pasiteri Nkurunziza Fiacre abarizwa mu ‘‘Rusengero rwa Yesu Kirisitu rw’Abera b’Imana bo mu minsi ya nyuma’’. Uyu mu pasitoro yavuze ubuhamya bw’ubuzima bwe ari naho yemereje ko Imana yonyine ari yo ibasha guhindura imibereho n’amateka y’umuntu.

Ubuhamya bwa Pasiteri Nkurunziza bukubiyemo ibyo yanyuzemo mbere yo gukizwa ndetse n’ibyo abona muri iki gihe yamaze kwakira agakiza.

Nkurunziza yavuze ko yamenye ubwenge asanga se afite abagore babiri. Kubera ko se atabitagaho bituma ajya gushaka akazi k’ububoyi mu Mujyi wa Kigali, amaze kuba umusore yagize igitekerezo cyo gushaka, niko kwishyingiranya n’umukobwa wari inshuti ye muri icyo gihe.

Nkurunziza amaze gushaka yavuye mu kazi k’ububoyi atangira gukora akazi ko gucukura imisarani y’abaturage, kubaka ingo z’imiyenzi, gusiza ibibanza no kwikorera amabuye imodoka zabaga yamennye ku muhanda kandi ba nyirayo batawegereye . Ibyo byose kandi yabikoraga ataretse uburaya no kunywa ibiyobyabwenge.

Nkurunziza muri icyo gihe ntiyahiriwe n’urushako, kuko yashatse afite intego yo kubyara ariko muri icyo gihe umugore we akaba atarigeze ashyira ku mu mugongo ngw’aberwe nk’uko bigenda ku bandi babyeyi.

Nkurunziza yagize ati “Mbere yo gukizwa napfushije abana 4 bakurikirana”, umwana wa mbere akaba yarapfuye afite umwaka umwe n’igice, uwa kabiri apfa amaze iminsi 2, uwa 3 apfira ku myaka 3 naho uwa 4 apfa afite umwaka umwe gusa.

Nkurunziza yagize ati ‘‘Ibyo byago byose byatumye njye n’umugore wanjye tuba nkabasazi ku buryo njye nari nshigaje kwiruka ku gasozi”, ikibabaje kurusha ibindi n’uko muri icyo gihe batabonaga naho bicaza ababasuye, kuko babaga mu nzu bakodeshaga amafaranga ibihumbi 3000.

Nkurunziza amaze kubona ibibazo bimurembeje yahisemo kunywa ibiyobyabwenge birimo inzoga z’urwagwa n’ibigage byo mu bwoko bwa muriture, bareteta ndetse akongeraho n’amatabi y’ubwoko butandukanye. Amaze kubyiyahuza yarushijeho guta ubwenge, maze aragenda aryama mu muhanda ngo imodoka zimugonge, kuko yari arambiwe kuba ku isi.

Ntibyatinze, muri uwo muhanda hanyuze imodoka iramukubita agwa muri rigore, ku buryo abakozi b’Imana bo mu Itorero ry’Abamethodisite bahamukuye atumva bakamujyana mu rusengero rwabo ruri ku Gisozi. Icyo gihe yahamaze iminsi itatu bahamukura bamujyana kwa muganga kuko atabashaga guhumeka, bakomeje kumwitaho ku buryo bamusuriraga n’umugore we wari warishwe n’agahinda ko kudashyira ku ibere nk’abandi.

Abo bakozi b’Imana bamuvurije ahantu hatandukanye yaba mu mavuriro ya Leta ndetse n’ayigenga ariko biranga birananirana, ahubwo uko iminsi yashyiraga akarushaho kuremba ari nako ata ibiro gahoro gahoro.

Bimaze kunanirana nibwo bigiriye Inama yo kumujyana mu Bitaro bikuru bya ‘‘CHUK’’, ari naho hagaragariye indwara ye ariko nabwo byabanje kubagora, kuko bamucishije mu cyuma inshuro zirenga 5 babura indwara.

Nyuma y’amezi atatu Nkurunziza arwariye muri ‘‘CHUK’’ nibwo abaganga basanze abana na Virusi y’Agakoko gatera Sida, indwara ya Mburugu ndetse afite n’igituntu cyo mu magufa.

Kuva icyo gihe Nkurunziza yatangiye kunywa imiti igabanya ubukana ndetse n’iy’igituntu, ari nako bamuvoma amazi yari yariretse mu gihaha cy’uruhande rumwe. Ubwo hari mu mwaka wa 2005, Nkurunziza mu mwaka wa 2006 yavuye ku biro 72 agera kuri 38.

Nkurunziza yagize ati “Mbere yo gusohoka muri ‘‘CHUK’’ bampimye inshuro 4, bashaka kumenya uko abasirikare banjye bameze, batangazwa n’uko ibyo bizamini byose byagaragaza ko nta virusi mfite uretse igituntu cyari cyaranze gukira.

Nkurunziza amaze kugera mu rugo iwe yakomeje kujya ajya gufatira imiti ku bitaro bya Muhima. Ikintu cyatangaje abantu benshi n’uko igihe Nkurunziza bamusanganaga ubwandu bihutiye gupima n’umugore we, ariko bagasanga ari muzima nta kibazo afite.

Nkurunziza amaze koroherwa nibwo yatangiye gusenga maze yakira agakiza, Imana nayo iramwishimira guhera icyo gihe atangira guhabwa amasezerano atandukanye, ariko inshuro nyinshi Imana ikamubwira ko imugize umushumba w’Intama zayo. Nkurunziza yagize ati “Narabyemeraga ariko nkibaza aho bizava bikanshobera”.

Nkurunziza avuga ko yakomeje kwinjira mu mirimo y’Imana, maze mu gihe gito Itorero ry’Abamethodisite ryo ku Gisozi rimusaba kujya gukurikirana inyigisho z’abarimu, mu gihe gito aba abaye umwarimu muri ryo.

Muri icyo gihe kandi kwa muganga bari baramubujije kunywa inzoga no kwegera umugore, Nkurunziza yagize ati ‘‘Muri iyo minsi mike Imana yahise iduha urubyaro ubu mfite abana 3 umukobwa w’Imyaka itandatu n’igice n’umuhungu ufite imyaka itatu n’igice naho umuto akaba afite imyaka 2 gusa.

Nkurunziza avuga ko amaze kuba umwarimu aribwo yakomeje kumva ijwi rimubwira ngo nkugize umushumba w’intama zanjye, icyo gihe muri iyo minsi yumva telefoni y’umuntu wari muri Kanada yari yarigeze kumusengera, amubwira ngo ajye gukurikirana inyigisho z’abapasiteri mu itorero asengeramo ubu.

Izo nyigisho akaba yarazikurikiranye imyaka 3 azirangije bamushyira ku rwego rwa Pasiteri ari naho yitiwe Pasiteri Nkurunziza. Uwo mupasiteri yagize ati “Ubu ibyo Imana yambwiye jye byose narabibonye, urubyaro, ibyo kurya ntari narigeze ngira”.

Pasiteri Nkurunziza yari yaratanze ubutumwa ku bantu batandukanye ashishikariza abantu kuba mu by’Imana neza, kuko ubibayemo neza nayo iba mu bye kandi yizeza abantu ko Imana ari yo ibasha ibyananiranye, nk’uko yabivuze mu buhamya yatanze haruguru.