Ubuhamya: Barantemye ndetse banyicira abana babiri n’ umugabo. Mutegwaraba Tasiyana

Nitwa Mutegwaraba Tasiyana navutse mu mwaka w’1968 I Bugesera mu Karere ka Nyamata. Mvuka kuri Kabagema Marcel na Kakuze Marciane. Twavutse turi bane twari umuryango wifashije dufite inka n’ imirima tukabana neza n’ abantu nta kibazo. Nashyingiwe mu mwaka w’ 1990

Nyuma y’imyaka ibiri, ni ukuvuga mu w’ 1992, i Bugesera batangiye kwica abatutsi hanyuma turahunga. Njye nahungiye I Nyamata ku Kiriziya nibwo hazaga umusenyeri w’ umuzungu wahayoboraga adusanga aho twicaye icyo gihe nari mfite umwana w’ uruhinja, maze abana bato abasukaho amazi y’ umugisha abasiga n’ amavuta. Tugiye kubona tubona haje abasirikare bo kwa Habyarimana bahita barasa uwo muzungu. Twahise twiruka tujya inyuma aho barerera imfubyi; icyo gihe ntitwapfuye twese kuko byaje guhosha dusubira mu ngo.
Byaje kugera muri Mata 1994 hatangira jenoside yakorewe abatutsi, icyo gihe sinari kumwe n’ umugabo yari yaraje gukora akazi mu Mujyi wa Kigali ariko nari narabyaye undi mwana muri Mutarama 1994. Jenoside itangiye twarahunze kuko hakurya yacu bari batangiye gutwika amazu, iwanjye hahungiye abantu benshi cyane, bigeze nimugoroba baradutera turiruka. Byari bikomeye cyane, nuko duhungira Cyugaro.

Barantemye banyicira umwana

Umunsi ukurikiyeho interahamwe zikomeye zaje kuduhiga twirirwa twiruka, bigeze taliki ya 14 Mata bantema akaboko bantema no mu mutwe. Icyo gihe twari I Ntarama, nari kumwe na mama na musaza wanjye wari warashatse, icyo gihe bantema bahise bica n’ umwana wanjye umwe muri babiri nari mfite. Muramukazi wanjye nawe bahita bamwica, mama nawe bamutema ariko ntiyapfa. Ubwo mama yafashe intebe aho muri kiriziya arazipanga andambikamo, kandi nahumekaga nabi cyane.

Ku mugoroba bagarutse kwica abarokotse; n’ubwo Mama bari bamukubise impiri mu mutwe yabashije kubihisha ntibamubona. Yaje kumenya ko bagiye kuko yari yihishe hafi yahise agaruka aramfata ari kumwe na musaza wanjye turagenda bafata n’umurambo w’ umwana wanjye bareba aho bawushyingura hanyuma baransindagiza tugaruka Cyugaro.

Bantemye ijosi banyicira umwana wari wasigaye

Byagenze tariki ya 23 Mata tuva Cyugaro tujya Kayenzi. Maman twaragumanye n’abandi bari basigaye mu muryango barimo musaza wanjye twese twagiye kwihisha mu rufunzo ari naho bantemeye ijosi. Bamwe mu bantemye bari abapagasi b’iwacu nari nzi ndetse n’abaturanyi. Naryamye aho bantemeye ariko sinashiramo umwuka. Umwana wanjye wari wasigaye bahita bamukubita impiri ahita apfa.
Musaza wanjye yari yihishe ahandi hirya gato yari umurokore akitwa Bosco arambwira ngo: “Koko urapfuye utihannye n’ ukuntu nakubwirije ubutumwa bwiza ntukizwe!”.

Byageze nijoro tuva mu rufunzo aho twihishe. Barantwaye baranyomora ariko interahamwe zamenye ko ntarapfa zikomeza kumpiga. Baje kongera kumvumbura bankubita ubuhiri burimo imisumari noneho nsa nk’upfuye ariko nanone umwuka ntiwashira. Mama yari arwaje papa, maze nawe akava aho yihishe akanzanira umuti. Byageze aho ninginga mama ngo bantabe ndi muzima kuko nari narapfuye nabi baravuga ngo Imana nishaka ko mbaho nzabaho. Papa abonye abana bamushizeho yahisemo kwiyahura mu ruzi arapfa.

Ijosi ryari umuvure, amazi akareka aho batemye, bakanyegura amazi akameneka. Ubwo abo twari kumwe nababwiraga ko bantesheje umwana kuko amashereka nayo yari amereye nabi ariko Imana yandindiye mu busabusa, kuko inyota yaranyicaga bitewe no gutakaza amaraso cyane.

Ijosi ryari ryaraguye mama yarariboshye ariko inyo zaragwaga. Mama yaje kunyimurira mu kindi gihuru ariko nari ndwaye inda cyane, naho harimo imirambo myinshi nkirirwa aho. Nanywaga ibiziba biri aho ndi mu mirambo myinshi, byagera nimugoroba sinzi ibyatsi mama yazanaga akabinyogesha. Aho nahamaze iminsi.

Inkotanyi zaje kutugeraho

Inkotanyi zaje kuhagera zitubwira ko zafashe igihugu baratuzamura nari nambaye ubusa, nuka cyane batujyana I Nyamata. Baje kutujyana hafi yo kwa Padiri hari ishuri badushyiramo baratuvura tubyimba inda, ibirenge, noneho musaza wanjye yari yararokotse arambwira ati: “Dore urakize uzakizwe”. Ubwo ntangira guhigira Imana umuhigo ngo nimbaho simpfe nzayikorera.

Batangiye kumvura mu mutwe bakuramo amagufa kuko umutwe bari barawumennye kuko bantemesheje imihoro banteramo n’ icumu. Twaje gucumbika I Kayenzi kuko inzu zacu bari barazitwitse.

Ubwo nakiraga agakiza…naje kumenya ko umugabo wanjye atakiriho
Nyuma naje gukizwa ndabatizwa ariko numvaga nanga abahutu cyane kuko ubuzima bwose nahoraga ndira ntabasha gusinzira kubera abana banjye. Nakekaga ko umugabo wanjye ariho ariko rimwe nabonye umuntu anzaniye ubutumire twakoreyeho ubukwe, arambwira ati: “Si wowe witwa gutya? Umugabo wawe yarapfuye bamutsinze mu ruganda aho yakoraga I Kigali”. Noneho nsa nk’ubaye umusazi neza neza.

Nyuma nakomeje gukizwa ariko ngahorana agahinda; byageze aho nsaba Imana ko yampa urukundo n’umutima muzima, Imana yarabinkoreye ntangira kubohoka umutima bigera aho njya no muri Korare ndaririmba.

Byageze muri 1995 musaza wanjye anzana mu Mujyi wa Kigali ubuzima bwari butangiye kugaruka. Twabanye na musaza wanjye mu nzu nyuma hari umugiraneza wampaye ibihumbi 100 ntangira gucuruza caguwa. Icyo gihe nasengeraga I Nyarugenge. Imyenda nacuruzaga yaje guhomba nkora muri Kioske ntangira gusa neza naje gushaka n’ inzu ndibana ntangira kurera imfubyi.

Uko nakomeje gusenga no kwiringira Imana niko umutima wanjye wagiye ubohoka bigeza ubwo mbasha kubabarira abantemye n’abishe umugabo wanjye n’ abana banjye ndetse n’abo mu muryango wanjye.

Icyizere cy’ejo hazaza

Nyuma nongeye gushaka umugabo nawe warokotse mu muryango wose ari wenyine, ubu tubyaye abana batatu b’abahungu ndetse dufite n’abandi batatu turera. Ubu turiho ubuzima buciriritse kuko turacyakodesha inzu gusa kenshi iyo ngiye gushaka inzu mpisha inkovu y’ ijosi kuko iyo maze gukuraho igitambaro babona ijosi bakanyirukana mu nzu ariko Imana yampaye kubyihanganira. Ariko mfite kwizera ko bizagera aho Imana ikampa inzu kuko ndiho Imana izakora ibikomeye kuba narabashije kubaho ni igitangaza.

Nasoza ngira inama abatariyakira nibihangane barwanire kubaho kuko Imana izakomeza imigambi myiza ibafiteho kandi iyo umunsi w’ umuntu wageze arapfa iyo hataragera ntupfa bityo kuba ndiho ni igitangaza buri muntu abaho kuko Imana yemeye ko abaho.

Ikindi iyo utarabasha kubabarira umutima wawe ukomeza kuba uhambiriye ariko iyo wiyakiriye ukanababarira ugira amahoro mu mutima. Ugategereza ubuzima Imana yakugeneye kubaho.