UMUSOMYI WA BIBILIYA, ni igitabo gitegurwa...

UMUSOMYI WA BIBILIYA, ni igitabo gitegurwa n’UMURYANGO W’ABASOMA BIBILIYA MU RWANDA (Ligue Pour la Lecture de la Bible), kigamije gufasha abantu guhura n’Imana buri munsi mu ijambo ryayo. Uyu wa gatatu tariki ya 31/05/2017 turasoma muri Yobu 35.1-16:

1. Elihu akomeza gusubiza ati
2. “Mbese wibwira yuko ibyo bitunganye, ubwo wavuze uti ‘Gukiranuka kwanjye kuruta ukw’Imana’?
3. Kuko wavuze uti ‘Kuzamarira iki?’ Kandi uti ‘Nzabona nyungu ki ziruta izo mba narabonye ngikora ibyaha?’
4. Ngiye kugusubiza wowe na bagenzi bawe.
5. “Itegereze mu ijuru urebe, Kandi witegereze ibicu biri hejuru uko bigusumba.
6. Niba warakoze icyaha hari icyo uyitwaye? Kandi ibicumuro byawe niba byaragwiriye na byo biyitwaye iki?
7. Niba uri umukiranutsi hari icyo uyihaye? Cyangwa se icyo ihabwa n’ukuboko kwawe ni iki?
8. Icyakora ibibi byawe byababaza umuntu umeze nkawe, Kandi umwana w’umuntu gukiranuka kwawe ni we kwagira icyo kumumarira.
9. “Batakishwa no kurengana kwinshi, Ku bwo kubabazwa n’amaboko y’abakomeye ni cyo kibatera gutabaza.
10. Ariko nta wavuga ati ‘Imana Umuremyi wanjye iri he? Kandi ari yo iduha indirimbo mu ijoro,
11. Ikatwigisha kuruta inyamaswa zo mu isi, Kandi ikaduha ubwenge kuruta ibisiga byo mu kirere.’
12. Nuko barataka ariko ntihagira ubasubiza, Bitewe n’ubwibone bw’abanyabyaha.
13. Ni ukuri Imana ntiyumvira ibyo ubusa. Ndetse Ishoborabyose ntiyabyitaho.
14. “Nubwo uvuga ko utayireba, Ariko urubanza ruri imbere yayo, Nawe uyirindīra.
15. Ariko noneho kuko idahōresha uburakari bwayo, Ntiyite ku gasuzuguro cyane,
16. Ni cyo cyatumye Yobu abumburira ubusa akanwa ke, Akagwiza amagambo atagira icyo azi.”

Ikibazo kidufasha kurushaho gusobanukirwa:

1. Ibyo nsomye biranyigisha iki:
- Ku MANA Data wa twese?
- Kuri YESU KRISTO?
- Ku MWUKA WERA?

Ubusobanuro bw’umusomyi:

Niba uri umukiranutsi hari icyo uyihaye ? (7):
Hari igihe abakristo bakora ibyo gukiranuka bameze nk’aho baguriza Imana, maze bagera mu gihe cy’ingorane bakumva Imana igomba kuzibakuramo ibishyura. Ni cyo kibazo Yobu yari afite. Yari yarakiranukiye Imana. Ibyago bije akumva Imana na yo itaragombaga kumureka ngo agerweho n’ingorane. Ariko Bibiliya igaragaza ko ingorane ari ibisanzwe ku mukristo (2Tim.3.12, Ibyak.14.22). Gusa Imana idusezeranya ko izabana natwe (Yes.43.2). Ariko ntawavuga ati Imana irihe?(10): Iyo umuntu ababazwa, aba yumva Imana yamutaye. Nyamara byose iba ibikurikiranira hafi. Ishobora kuba itagukuye mu ngorane runaka urimo, ariko ni yo ikomeza kuguha gusinzira no kuramuka (10b), ni yo iguha ubwenge (11). Hari ibyo Imana idukorera tukibwira ko ari ibisanzwe kubera ko ibikora buri munsi kandi ikabikorera benshi: guhumeka, kugenda,… n’ibindi byose by’ubuzima ni yo iba yabikoze. Ibyo byagombye gutuma tuyiringira.

UWIMANA Ange Victor
Tel: (+250)788552883, (+250)725151463
Email: [email protected]