UMUSOMYI WA BIBILIYA, kuwa mbere tariki ya 28/08/2017

UMUSOMYI WA BIBILIYA, ni igitabo gitegurwa n’UMURYANGO W’ABASOMA BIBILIYA MU RWANDA (Ligue Pour la Lecture de la Bible), kigamije gufasha abantu guhura n’Imana buri munsi mu ijambo ryayo. Kuri uyu wa mbere tariki ya 28/08/2017 turasoma muri Matayo 21.12-22 :

12. Nuko Yesu yinjira mu rusengero rw’Imana, yirukanamo abaruguriragamo bose, yubika ameza y’abavunjaga ifeza n’intebe z’abaguraga inuma,
13. arababwira ati “Byanditswe ngo ‘Inzu yanjye izitwa inzu yo gusengerwamo’, ariko mwebwe mwayihinduye isenga y’abambuzi.”
14. Nuko impumyi n’ibirema bamusanga mu rusengero arabakiza.
15. Ariko abatambyi bakuru n’abanditsi babonye ibitangaza akoze, n’abana bavugiye mu rusengero amajwi arenga bati “Hoziyana mwene Dawidi”, bararakara.
16. Baramubaza bati “Aho urumva ibyo aba bavuga?” Yesu arabasubiza ati “Yee, ntimwari mwasoma ngo ‘Mu kanwa k’abana bato n’abonka wabonyemo ishimwe ritagira inenge’?”
17. Arabasiga asohoka mu murwa, ajya i Betaniya ararayo.

18. Bukeye bwaho mu gitondo kare asubira mu murwa, arasonza.
19. Abona umutini iruhande rw’inzira arawegera, asanga utariho imbuto keretse ibibabi gusa, arawubwira ati “Ntukere imbuto iteka ryose.” Muri ako kanya uruma.
20. Abigishwa babibonye baratangara bati “Mbega uhereye ko wuma muri ako kanya?”
21. Yesu arabasubiza ati “Ndababwira ukuri yuko mufite kwizera mudashidikanya, mutakora nk’iby’umutini gusa, ahubwo mwabwira n’uyu musozi muti ‘Shinguka utabwe mu nyanja’, byabaho.
22. Kandi ibyo muzasaba mwizeye muzabihabwa byose.”

Ibibazo kidufasha kurushaho gusobanukirwa:

Ibyo nsomye biranyigisha iki:

- Ku MANA Data wa twese?
- Kuri YESU KRISTO?
- Ku MWUKA WERA?

Ubusobanuro bw’umusomyi:

Yirukana abacururiza mu rusengero (12): Mu minsi mikuru ya Pasika, abantu benshi bazaga gusengera i Yerusalemu, ndetse bamwe babaga bavuye mu bindi bihugu. Bityo ntibyari byoroshye kuba baturukanayo amatungo bifashishaga mu gutamba ibitambo nk’uko amategeko ya Mose yari ari (Lewi1.1, Yoh.2.14). Mu buryo bwo kwiyorohereza hashyizweho gahunda y’ubucuruzi bw’amatungo n’ibiguruka; iri soko kandi ryaberaga mu mbuga y’urusengero. Abantu bazanaga amafaranga y’amanyahanga bagombaga kuyavunjisha mu biceri byakoreshwaga muri Isirayeli kuko andi yabaga ahumanye. Gusa ibi si cyo hari hagenewe gukoreshwa (Yes.56.7; Yer.7.11). Umubiri wawe nawo ni urunsengero rw’Imana. Ukwiriye kuwurinda kuwukoresha ibintu bizira mu maso y’Imana (2Kor.6.16-18). Ishimwe mu kanwa k’abana bato (16): Hari igihe usanga mu nsengero tudaha agaciro abana bato. Nyamara guhimbaza Imana kwabo kurayinezeza kuko kuba kutarimo uburyarya. Ibuka ko gukorera Imana bitagombera umubare w’imyaka runaka. Bisaba gusa kubikorana umutima uboneye. Gusenga: Mana nshoboza kutagira ibizira nimika mu buzima bwanjye.

UWIMANA Ange Victor
Tel: (+250)788552883, (+250)725151463
Email: [email protected]