UMUSOMYI WA BIBILIYA, kuwa mbere tariki ya 12/06/2017

UMUSOMYI WA BIBILIYA, ni igitabo gitegurwa n’UMURYANGO W’ABASOMA BIBILIYA MU RWANDA (Ligue Pour la Lecture de la Bible), kigamije gufasha abantu guhura n’Imana buri munsi mu ijambo ryayo. Uyu wa mbere tariki ya 12/06/2017 turasoma muri Ibyakozwe 4.23-31 :
Ab’Itorero babyumvise basaba Imana kubaha gushira amanga
23. Nuko barekuwe basubira muri bagenzi babo, babatekerereza ibyo babwiwe byose n’abatambyi bakuru n’abakuru.
24. Na bo babyumvise bavuga ijwi rirenga n’umutima uhuye, babwira Imana bati “Databuja, ni wowe waremye ijuru n’isi n’inyanja n’ibirimo byose,
25. kandi wavugiye mu kanwa ka sogokuruza Dawidi umugaragu wawe, ubivugisha Umwuka Wera ngo ‘Ni iki gitumye abanyamahanga bagira imidugararo, N’abantu bagatekereza iby’ubusa?
26. Abami bo mu isi bateje urugamba, N’abakuru bateraniye hamwe, Kurwanya Uwiteka n’Uwo yasize.’
27. Kandi koko Herode na Pontiyo Pilato, hamwe n’abanyamahanga n’imiryango y’Abisirayeli bateraniye muri uyu murwa kurwanya Umugaragu wawe wera Yesu, uwo wasize,
28. ngo basohoze ibyo ukuboko kwawe n’ubwenge bwawe byategetse mbere, byose bitari byaba.
29. Kandi none Mwami Mana, reba ibikangisho byabo, uhe abagaragu bawe kuvuga ijambo ryawe bashize amanga rwose,
30. ukiramburira ukuboko kwawe kugira ngo gukize, gukore n’ibimenyetso n’ibitangaza mu izina ry’Umugaragu wawe wera Yesu.”
31. Bamaze gusenga, aho bari bateraniye haba umushyitsi, bose buzuzwa Umwuka Wera, bavuga ijambo ry’Imana bashize amanga.

Ikibazo kidufasha kurushaho gusobanukirwa:

1. Ibyo nsomye birambwira ibya NDE, kandi biranyigisha IKI?
2. Mbese mu byo nsomye harimo icyo Imana YANSEZERANIJE?

Ubusobanuro bw’umusomyi:

Bavuga ijwi rirenga n’umutima uhuye (24) : Umutima uhuye bawurazwe na Yesu ubwo yabasengeraga mu bihe bye bya nyuma (Yoh.17.20-21). Mu mwanya nk’uyu ari twe dusenga twakubitisha inkuba abaduhohoteye. Ariko bose si ko basabye. Dore ibyari bikubiye mu isengesho ryabo: 1.Bishingikirije ku bushobozi bw’Imana Rurema igenga ibiriho byose. 2. Bemeza ko ababarenganya baba barenganije Yesu ubwe. 3. Basabye gushobozwa kuvuga Ijambo ry’Imana bashize amanga, n’ubwo ari byo baziraga. 4. Basabye Imana gushyigikiza Ijambo ryayo ibitangaza. Icyari kibashishikaje si umutekano wabo, ahubwo ni uko ubutumwa bwiza bwamamara nta nzitizi. Bose buzuzwa Umwuka Wera (31): Imana yabagaragarije ko yumvise gusenga kwabo, kandi ko igisubizo kidatinze. Kuri Pentekote buzuye Umwuka bavuga izindi ndimi, ubu bwo barawuzuye bahabwa icyo bari bakeneye: Kuvuga ijambo ry’Imana bashize amanga. Ikibazo: Ese twe dukeneye ko Imana iduha iki muri iki gihe?

UWIMANA Ange Victor
Tel: (+250)788552883, (+250)725151463
Email: [email protected]