UMUSOMYI WA BIBILIYA, kuwa kabiri tariki ya 20/06/2017

UMUSOMYI WA BIBILIYA, ni igitabo gitegurwa n’UMURYANGO W’ABASOMA BIBILIYA MU RWANDA (Ligue Pour la Lecture de la Bible), kigamije gufasha abantu guhura n’Imana buri munsi mu ijambo ryayo. Uyu wa kabiri tariki ya 20/06/2017 turasoma muri Yobu 41.1-26 :
1. “Umva ibyiringiro byo kuyifata ntibyabaho. Mbese umuntu ntiyazira n’uko ayirebye gusa?
2. Nta ntwari yahangara kuyibyutsa, None se ni nde wabasha kumpagarara imbere?
3. Ni nde wabanje kugira icyo ampa kugira ngo mwiture? Ibiri munsi y’ijuru byose ni ibyanjye.
4. “Sinzareka kuvuga iby’ingingo zayo, Cyangwa ububasha bw’imbaraga zayo, Cyangwa umubyimba wayo mwiza.
5. Ni nde wabasha kuyambura umwambaro wayo w’inyuma? Ni nde wakwishyira mu rwasaya rwayo?
6. Ni nde wabasha kwasamura akanwa kayo? Amenyo yayo uko ameze atera ubwoba.
7. Imvuvu zayo zikomeye ni zo bwibone bwayo, Zibumbabumbiye hamwe zimeze nk’izihambiranijwe.
8. Ndetse rumwe rusobekerana n’urundi, Bituma ari nta mwuka uzinyuramo.
9. Zirasobekeranye, Zirafatanye ndetse ntabwo zatandukana.
10. Kwitsamura kwayo kuvamo umucyo, Kandi amaso yayo ameze nko gutambika k’umuseke.
11. Mu kanwa kayo havamo amafumbi agurumana, Hakavamo ibishashi by’umuriro.
12. Mu mazuru yayo hacucumuka umwotsi, Nk’uva mu nkono ibira cyangwa imbingo zitwitswe.
13. Umwuka wayo ukongeza amakara, Kandi mu kanwa kayo havamo ibirimi by’umuriro.
14. Mu ijosi ryayo habamo gukomera, Igitinyiro cyayo kiyihamiriza imbere.
15. Inyama zo ku mubiri wayo ziromekeranye, Ziyifasheho ntabwo zijegajega.
16. Umutima wayo ukomeye nk’ibuye, Ni ukuri ukomeye nk’urusyo.
17. Iyo yegutse intwari ziratinya, Ubwoba bukazisaza.
18. Naho hagira uyerekezaho inkota cyangwa icumu, Cyangwa umwambi cyangwa icumu ry’irihima, nta cyo byamara.
19. Ibyuma ikabireba nk’ibyatsi, Kandi umuringa ikawugereranya nk’igiti cyaboze.
20. Umwambi ntiwayihungisha, Amabuye y’umuhumetso ayihindukira nk’umurama.
21. Ubuhiri ibureba nk’ibikūri, Iseka guhinda ku icumu.
22. Ku nda yayo ni ibivuvu bityaye, Ku byondo ihahindura ibikuruzi.
23. Iyo igeze imuhengeri irahavuguta, Ikahahindura ifuro nk’inkono ibira, Ituma inyanja imera nk’amavuta.
24. Inyuma yayo ihasiga inzira iboneye, Umuntu yatekereza ko imuhengeri hadendeje urubura.
25. Nta yindi ihwanye na yo iri ku isi, Yavutse itagira ubwoba.
26. Yitegereza ibiri hejuru byose, Ni yo mwami w’abana b’abibone bose.”

Ikibazo kidufasha kurushaho gusobanukirwa:

Ibyo nsomye birambwira ibya NDE, kandi biranyigisha IKI?

Ubusobanuro bw’umusomyi:

Ibiri munsi y’ijuru byose ni ibyanjye (3): Imana ikomeje ivuga ubuhangange bwa Lewiyatani. Ni inyamaswa yatekerezwaga ko iba mu nyanja nini, ko ariyo ijya irigisa amato n’abantu bajya bahera mu nyanja. Uburyo ivugwa iteye ubwoba. Ndetse no kuyireba byonyine umuntu yabizira. Imikorere n’imiterere yayo na byo byongera kwerekana gukomera kw’Imana yayiremye ikanayibeshaho. Guhera kuri yo kugeza ku gakoko katagaragara n’amaso, ibyaremwe byose ibyo tuzi n’ibyo tutazi, ibyo byose ni Iby’Uwiteka. Imana ntiyashubije ibibazo bya Yobu kimwe ku kindi, ariko byonyine kwibutswa ibyaremwe na yo mu buryo butangaje kandi buteye ubwoba, bigomba kuba byaramuteye guhonga mu maso, na we akavuga nk’umwanditsi wa Zaburi ati «Uwiteka, umuntu ni iki ko umumenya ? Cyangwa umwana w’umuntu ko umwitaho ? (Zab.144.3).

UWIMANA Ange Victor
Tel: (+250)788552883, (+250)725151463
Email: [email protected]