UMUSOMYI WA BIBILIYA, kuwa kabiri tariki ya 06/06/2017

UMUSOMYI WA BIBILIYA, ni igitabo gitegurwa n’UMURYANGO W’ABASOMA BIBILIYA MU RWANDA (Ligue Pour la Lecture de la Bible), kigamije gufasha abantu guhura n’Imana buri munsi mu ijambo ryayo. Uyu wa kabiri tariki ya 06/06/2017 turasoma muri Ibyakozwe 2.22-36 :

22. “Yemwe bagabo ba Isirayeli mwe, nimwumve aya magambo: Yesu w’i Nazareti, wa muntu Imana yabahamirishije imirimo ikomeye n’ibitangaza n’ibimenyetso, ibyo yamukoresheje hagati yanyu nk’uko mubizi ubwanyu,
23. uwo muntu amaze gutangwa nk’uko Imana yabigambiriye, ibimenye bitari byaba, mwamubambishije amaboko y’abagome muramwica.
24. Ariko Imana yaramuzuye ibohoye umubabaro uterwa n’urupfu, kuko bitashobotse ko akomezwa na rwo.
25. Kuko Dawidi yavuze iby’uwo ati ‘Nabonye Umwami ari imbere yanjye iteka ryose, Kuko ari iburyo bwanjye ngo ntanyeganyezwa.
26. Ni cyo gituma umutima wanjye unezerwa, Ururimi rwanjye rukishima, Kandi n’umubiri wanjye uzaruhuka wiringiye ibizaba.
27. Kuko utazarekera ubugingo bwanjye ikuzimu, Cyangwa ngo uhane Uwera wawe abone kubora.
28. Wamenyesheje inzira y’ubugingo, Uzanyuzuza umunezero kuko ndi imbere yawe.’
29. “Bagabo bene Data, nta kimbuza kubabwira nshize amanga ibya sogokuruza mukuru Dawidi, yuko yapfuye agahambwa ndetse n’igituro cye kiracyari iwacu n’ubu.
30. Nuko rero, kuko yari umuhanuzi akamenya ko Imana yamurahiye indahiro, yuko izamuha umwe mu buzukuruza be ngo abe ari we usubira ku ngoma ye,
31. yavugaga ibyo kuzuka kwa Kristo abibonye bitari byaba. Ni cyo cyatumye avuga ko atarekewe ikuzimu, kandi ngo n’umubiri we nturakabora.
32. Imana yazuye Yesu uwo, natwe twese turi abagabo bo guhamya ibyo.
33. Nuko amaze kuzamurwa n’ukuboko kw’iburyo kw’Imana, no guhabwa na Se ibyo yasezeranije ari byo Mwuka Wera, none asutse icyo mureba kandi mwumva.
34. Kuko atari Dawidi wazamutse mu ijuru, ahubwo ubwe yaravuze ati ‘Uwiteka yabwiye Umwami wanjye ati: Icara iburyo bwanjye,
35. Ugeze aho nzashyira abanzi bawe munsi y’ibirenge byawe.’
36. “Nuko abo mu muryango wa Isirayeli bose, nibamenye badashidikanya yuko Yesu uwo mwabambye, Imana yamugize Umwami na Kristo.”

Ikibazo kidufasha kurushaho gusobanukirwa:

1. Ibyo nsomye birambwira ibya NDE, kandi biranyigisha IKI?

Ubusobanuro bw’umusomyi:

Petero ababwira ibya Yesu ashize amanga (22): Petero amaze gusobanura ibyabaye, yakurikijeho gusobanurira abari aho Kristo, ari we mvo n’imvano y’ibyo byose: ubutumwa bwiza bwa Yesu Kristo, urupfu rwe,umuzuko no gushyirwa hejuru kwe (22). Avuga ibyahanuwe byerekeye Yesu ko wari umugambi w’Imana ko Mesiya azababazwa kandi agapfa (22,23). Dawidi yavugaga ibya Mesiya ubwo yabwiraga Imana ko itazarekera ubugingo bwe ikuzimu (27, Zab.16.9-11). Uwo ni we Yesu dukwiye guhamiriza abatamuzi cyangwa bamwitiranya. Imana yamugize Umwami na Kristo (36): Petero yahangaye kuvuga ibyo imbere y’Abayuda. Uwo bahoze barega ko yigereranyije, none ngo Imana yamushyize iburyo bwayo (Luka 22.69). Ukuzuka kwe kwabaye icyemezo ko ari umwana w’Imana (Rom.1.4). Ikibazo: Mbese wemeza ko Yesu ari Umwami wawe, uko byamera kose? (1Kor.12.3).

UWIMANA Ange Victor
Tel: (+250)788552883, (+250)725151463
Email: [email protected]