UMUSOMYI WA BIBILIYA, kuwa gatatu tariki ya 28/06/2017

UMUSOMYI WA BIBILIYA, ni igitabo gitegurwa n’UMURYANGO W’ABASOMA BIBILIYA MU RWANDA (Ligue Pour la Lecture de la Bible), kigamije gufasha abantu guhura n’Imana buri munsi mu ijambo ryayo. Uyu wa gatatu tariki ya 28/06/2017 turasoma mu rwandiko rwandikiwe Abaheburayo 10.26-31 :

26. Niba dukora ibyaha nkana tumaze kumenya ukuri, ntihaba hagisigaye igitambo cy’ibyaha
27. keretse gutegerezanya ubwoba gucirwa ho iteka, no gutegereza umuriro w’inkazi uzarya abanzi b’Imana.
28. Uwasuzuguye amategeko ya Mose ko atababarirwaga, ahubwo bakamwica abagabo babiri cyangwa batatu bamushinje,
29. nkanswe ukandagiye Umwana w’Imana, agakerensa amaraso y’isezerano yamwejesheje, agahemura Umwuka utanga ubuntu! Ntimugira ngo azaba akwiriye igihano gikabije cyane kuruta bya bindi?
30. Kuko tuzi uwavuze ati “Guhōra ni ukwanjye, ni jye uzītūra.” Kandi ati “Uwiteka azacira urubanza ubwoko bwe.”
31. Erega biteye ubwoba gusumirwa n’amaboko y’Imana ihoraho.

Ikibazo kidufasha kurushaho gusobanukirwa:

1. Mbese mu byo nsomye harimo ijambo RIMBURIRA?
2. Ese hari ahandi muri BIBILIYA nibukijwe n’ibyo nsomye?
Ubusobanuro bw’umusomyi:

“Uwiteka azacira urubanza ubwoko bwe” (30): Umwanditsi araburira Abaheburayo ku ngaruka zikomeye zo kuba umuntu yari yaramenye agaciro k’igitambo cya Yesu ku musaraba, nyuma akamutera umugongo. Kuba umuntu yaramenye inzira y’agakiza nyuma akayivamo ni akaga gakomeye. None se ko Yesu yabaye igitambo kimwe rukumbi gihagije, umuntu uzakirengagiza azabona he ikindi gitambo cyo guhongerera ibyaha bye? Kwirengagiza Yesu no kumutera umugongo ni ukwikururiraho umujinya w’Imana isumba byose. Mw’Isezerano rya kera uwasuzuguraga amategeko ya Mose, byamuviragamo kwicwa (Lewi 24.16; Kub.15.32-36; Guteg.17.2-7). None bizagendekera bite usuzuguye igitambo gisumba ibindi byose agahitamo gukora ibyaha nkana? Uwo acirwa urubanza aba akerensa amaraso ahamya Isezerano ry’Imana, aba kandi atutse Umwuka Wera. Yesu yavuze ko icyaha kitababarirwa ari icyaha cyo gutuka Umwuka Wera (Mat.12.31). Zirikana: Ngaho nimwisuzume ubwanyu, mumenye yuko mukiri mu byo twizera, kandi mwigerageze (2Kor.13.5). Indir.175 Gushimisha.

UWIMANA Ange Victor
Tel: (+250)788552883, (+250)725151463
Email: [email protected]