UMUSOMYI WA BIBILIYA, kuwa gatatu tariki ya 14/06/2017

UMUSOMYI WA BIBILIYA, ni igitabo gitegurwa n’UMURYANGO W’ABASOMA BIBILIYA MU RWANDA (Ligue Pour la Lecture de la Bible), kigamije gufasha abantu guhura n’Imana buri munsi mu ijambo ryayo. Uyu wa gatatu tariki ya 14/06/2017 turasoma muri Zaburi 14.1-7 :

1. Zaburi iyi yahimbiwe umutware w’abaririmbyi. Ni iya Dawidi. Umupfapfa ajya yibwira ati “Nta Mana iriho.” Barononekaye, bakoze imirimo yo kwangwa urunuka, Nta wukora ibyiza.
2. Uwiteka yarebye abantu ari mu ijuru, Kugira ngo amenye yuko harimo abanyabwenge, Bashaka Imana.
3. Bose barayobye, bose bandurijwe hamwe, Nta wukora ibyiza n’umwe.
4. Mbese inkozi z’ibibi zose nta bwenge zifite? Ko barya abantu banjye nk’uko barya umutsima, Kandi ntibambaze Uwiteka?
5. Aho ngaho bahagiriye ubwoba bwinshi, Kuko Imana iri mu bwoko bw’abakiranutsi.
6. Mukoza isoni inama z’umunyamubabaro, Ariko Uwiteka ni ubuhungiro bwe.
7. Icyampa agakiza k’Abisirayeli kakaba kavuye i Siyoni, Uwiteka nasubizayo ubwoko bwe bwajyanywe ho iminyago. Ni bwo Abayakobo bazishima, Abisirayeli bazanezerwa.

Ikibazo kidufasha kurushaho gusobanukirwa:

Mbese mu byo nsomye harimo:
- URUGERO RWIZA nakurikiza?
- URUGERO RUBI nakwirinda?

Ubusobanuro bw’umusomyi:

Umupfapfa ajya yibwira ati nta Mana iriho (1). Abantu bigira abahakanyi babikoreshwa no kugira ngo bihe amahoro mubyo bakora bibi. Bene abo hari n’igihe ubasanga no mu rusengero. Abo nibo Yuda yise intaza (Yuda 1.12). Nyamara kuvuga ko nta Mana ibaho ntibiyibuza kubaho, kuko ibyo yaremye bigaragaza kubaho kwayo, ndetse bifatanya kuyihimbaza (Zab.148.2-10). Bose barayobye, bose bandurijwe hamwe. (3): Uko ni ko ijisho ry’Imana ribona abana b’abantu. Bose bakoze ibyaha, ntibashyikira ubwiza bw’Imana (Rom.3.23). Icyo ni cyo cyatumye Imana itanga Yesu Kristo ho impano y’agakiza. Birababaje ko n’ubu hari benshi bagikomeje gukerensa ubwo buntu bw’Imana. “Icyampa agakiza k’Abisirayeli kakaba kavuye i Siyoni” (7): Umwanditsi arasabira ubwoko bw’Abisirayeli agakiza kavuye ku Mana iri i Siyoni. Uyu munsi iyi Mana ni iya twese, abanyamahanga n’Abisirayeli. Mbese ujya usabira abo mubana bataramenya Yesu, ngo bave kw’izina ry’abapfapfa, bahabwe imbabazi za Yesu?

UWIMANA Ange Victor
Tel: (+250)788552883, (+250)725151463
Email: [email protected]