UMUSOMYI WA BIBILIYA, kuwa gatatu 16/08/2017

UMUSOMYI WA BIBILIYA, ni igitabo gitegurwa n’UMURYANGO W’ABASOMA BIBILIYA MU RWANDA (Ligue Pour la Lecture de la Bible), kigamije gufasha abantu guhura n’Imana buri munsi mu ijambo ryayo. Kuri uyu wa gatatu tariki ya 16/08/2017 turasoma muri Daniyeli 10.1-20:

1. Mu mwaka wa gatatu wo ku ngoma ya Kūro umwami w’i Buperesi, Daniyeli wahimbwe Beluteshazari hariho icyo yeretswe kandi cyari icy’ukuri, ari cyo ntambara zikomeye. Amenya icyo ari cyo, ibyo yeretswe biramusobanukira.
2. Muri iyo minsi, jyewe Daniyeli namaze ibyumweru bitatu ndira.
3. Nta mutsima naryaga nubwo ari mwiza, nta nyama cyangwa vino, nta cyo nasamiraga kandi sinihezuraga kugeza aho ibyo byumweru uko ari bitatu byose bishiriye.
4. Ariko ku munsi wa makumyabiri n’ine w’ukwezi kwa mbere, nari ku nkombe y’uruzi runini rwitwa Hidekelu.
5. Nuko ntereye amaso mbona umugabo wambaye umwenda w’igitare, yari akenyeje izahabu nziza yacukuwe Ufazi.
6. Kandi umubiri we wasaga na yasipi, mu maso he hasaga n’umurabyo, amaso ye yasaga n’amatabaza yaka umuriro, amaboko ye n’ibirenge bye byasaga n’imiringa isenwe, kandi ijwi ry’amagambo ye ryari rimeze nk’iry’abantu benshi.
7. Ni jye Daniyeli gusa wabonye ibyo neretswe ibyo, ariko abantu twari kumwe ntibarakabibona, ahubwo bahinze umushyitsi cyane barahunga, barihisha.
8. Nuko nsigara aho jyenyine mbona ibyo byerekanywe bikomeye, sinasigarana intege kuko ubwiza bwanjye bwampindukiyemo ububore ndatentebuka.
9. Ariko numvaga ijwi ry’amagambo ye, nkiryumva ngwa nubamye ndarabirana nk’usinziriye.
10. Nuko haza ukuboko kunkoraho, kurambyutsa kumpfukamisha amavi n’ibiganza.
11. Arambwira ati “Yewe Daniyeli mugabo ukundwa cyane, umva amagambo ngiye kukubwira, haguruka weme kuko uyu munsi ngutumweho.” Amaze kumbwira iryo jambo ndahaguruka, mpagarara ntengurwa.
12. Aherako arambwira ati “Witinya Daniyeli, kuko uhereye ku munsi watangiriyeho gushishikarira gusobanukirwa no kwicisha bugufi imbere y’Imana yawe, amagambo yawe yarumviswe kandi ni yo anzanye.
13. Ariko umutware w’ibwami bw’u Buperesi amara iminsi makumyabiri n’umwe ambuza. Nyuma Mikayeli, umwe wo mu batware bakomeye aza kuntabara, ntinda mu bami b’u Buperesi.
14. Nuko none nzanywe no kugusobanurira ibizaba ku bantu bawe mu minsi y’imperuka, kuko ibyo weretswe ari iby’igihe gishyize kera.”
15. Amaze kumbwira ayo magambo, ncurika umutwe ndumirwa.
16. Maze haza uwasaga n’umwana w’umuntu akora ku munwa wanjye, mperako mbumbura akanwa kanjye ndavuga, mbwira uwari umpagaze imbere nti “Databuja, ibyo neretswe ko byatumye imibabaro yanjye ingarukamo nkabura intege,
17. mbese nkanjye umugaragu wawe nabasha nte kuvugana na databuja, ko nta ntege ngifite kandi ntagihumeka neza?”
18. Uwasaga n’umuntu arongera ankoraho, arankomeza.
19. Arambwira ati “Yewe mugabo ukundwa cyane, witinya, amahoro abe muri wowe. Komera, koko komera.”Tukivugana mperako ndakomezwa ndavuga nti “Databuja vuga, kuko unkomeje.”
20. Arambaza ati “Uzi ikinzanye aho uri? Dore ubu ngiye gusubirayo kurwana n’umutware w’u Buperesi, nimara kugenda umwami w’u Bugiriki araherako aze

Ibibazo kidufasha kurushaho gusobanukirwa:
1. Ibyo nsomye birambwira ibya NDE, kandi biranyigisha IKI?
2. Ibyo nsomye biranyigisha iki:
 Ku MANA Data wa twese?
 Kuri YESU KRISTO?
 Ku MWUKA WERA?
Ubusobanuro bw’umusomyi:
Daniyeli amara ibyumweru bitatu asenga yiyiriza ubusa (2): Daniyeli yari umunyamasengesho w’umwinginzi ku rwego rwo hejuru. Ibice 4 muri 12 bigize iki gitabo bivuga hejuru yo gusenga kwe: 1) Mu gice cya 2, tumubona ari gusenga kugira ngo Imana imuhishurire inzozi z’umwami. 2) Mu gice cya 6, tumubona akomeza gushima Imana nubwo yari yashyizweho iterabwoba. 3) Mu gice cya 9, tumubona asenga yatura ibyaha bye n’iby’ubwoko bwe. 4) Mu gice cya 10 tumubona yigomwa ibyo kurya no kunywa, agafata umwanya wo kwegera Imana, kugira ngo arusheho gusobanukirwa ibyo yeretswe. Mbese ujya ugira umwanya wo kwiyima ibinezeza umubiri, kugira ngo ubone uko wihererana n’Imana? Ni jye gusa wabonye ibyo neretswe (7): Nyuma yo gusenga, Daniyeli yeretswe ibintu bikomeye, abo bari kumwe ntibabibona. Birashoboka ko hari ibyo Imana ikubwira itabibwiye bagenzi bawe, kubera umugambi igufiteho cyangwa uko mubana (Ibyak.22.6-9). Umutware w’ubwami bw’u Buperesi amara iminsi 21 ambuza (13): igisubizo cyatinze kumugeraho kuko malayika yabanje gutangirwa na Sekibi. Ibyo yabwiwe byamukoze ku mutima, ariko Imana imwoherereza uwo kumukomeza. Hakoreshejwe amagambo afite imbaraga: 1. Ukundwa cyane, 2.Witinya, 3. Wumviswe, 4. Haguruka weme, 5. Amahoro abe muri wowe, 6. Komera koko komera. Imana yacu ntihinduka. Niba uri inkoramutima yayo, nawe uyu munsi yayakubwira.

UWIMANA Ange Victor
Tel: (+250)788552883, (+250)725151463
Email: [email protected]