UMUSOMYI WA BIBILIYA, kuwa gatanu tariki ya 23/06/2017

UMUSOMYI WA BIBILIYA, ni igitabo gitegurwa n’UMURYANGO W’ABASOMA BIBILIYA MU RWANDA (Ligue Pour la Lecture de la Bible), kigamije gufasha abantu guhura n’Imana buri munsi mu ijambo ryayo. Uyu wa gatanu tariki ya 23/06/2017 turasoma mu rwandiko rwandikiwe Abaheburayo 9.1-10 :

1. Isezerano rya mbere na ryo ryari rifite imihango y’ubutambyi rifite n’Ahera h’iyi si
2. kuko hariho ihema ribanzirizwamo, ryarimo igitereko cy’amatabaza n’ameza, n’imitsima iyateretseho imbere y’Imana, rikitwa Ahera.
3. Kandi hirya y’inyegamo y’umwenda wa kabiri ukinze hariho ihema, hitwa Ahera cyane.
4. Aho harimo icyotero cyacuzwe mu izahabu, n’isanduku y’isezerano yayagirijweho izahabu impande zose, irimo urwabya rw’izahabu rurimo manu, irimo na ya nkoni ya Aroni yapfunditse uburabyo na bya bisate by’amabuye byanditsweho isezerano.
5. Hejuru yayo hariho Abakerubi b’icyubahiro bateye igicucu intebe y’imbabazi, ariko ibyo ntitwakwirirwa tubirondora nonaha.
6. Icyakora ibyo bimaze kwitegurwa bityo, abatambyi binjiraga iminsi yose mu ihema ribanzirizwamo, kugira ngo basohoze imirimo yabo.
7. Ariko mu rya kabiri ryo, hakinjiramo umutambyi mukuru wenyine rimwe gusa uko umwaka utashye, ariko ntiyinjiragamo atazanye amaraso yo kwituririra no guturirira ibyaha abantu batakoze nkana.
8. Nuko rero icyo Umwuka Wera atumenyesha, ni uko inzira ijya Ahera cyane yari itarerekanwa ihema rya mbere rikiriho,
9. ari ryo ryashushanyaga iby’iki gihe cya none, ubwo abakurikiza amategeko yaryo batura amaturo bagatamba ibitambo, bitakibasha gutunganya rwose umutima w’ubitura,
10. kuko ibyo hamwe n’ibibwiriza iby’ibyo kurya no kunywa, no kwiyibiza no kujabika by’uburyo bwinshi, ari amategeko yo mu buryo bw’abantu gusa, yategetswe kugeza ku gihe cyo gutunganywa.

Ikibazo kidufasha kurushaho gusobanukirwa:

Ese hari ahandi muri BIBILIYA nibukijwe n’ibyo nsomye?


Ubusobanuro bw’umusomyi:

Uwandikiye Abaheburayo yasobanuye iby’imihango yose yo mw’isezerano rya kera yakorwaga mu gihe cyo kuramya Imana. Turabona ibice bibiri by’ihema, aho umurimo w’ubutambyi wakorerwaga. Igice cya mbere cyitwa Ahera niho abatambyi bakoreraga imirimo ya buri munsi. Mu gice cya kabiri hitwa Ahera cyane, ho hinjirwagamo n’umutambyi mukuru rimwe mu mwaka gusa ajyanyemo amaraso y’ibitambo ngo ayatureho icyiru cy’ibyaha bye n’iby’abandi bose bakoze batabigambiriye. “Umwuka Wera atumenyesha uko inzira ijya Ahera cyane yari itarerekanwa” (8). Mu gihe cy’isezerano rya kera Imana yari yitaruye abantu cyane kuyegera bidashoboka kuko ari Imana yera, kandi abantu bo bakaba banduye (Kuva 33.20). Mw’isezerano rishya, Imana yambaye umubiri iza kubana n’abantu (Matayo 1.23) ; niyo mpamvu Yesu amaze gupfira ku musaraba, umwenda ukingirije Ahera cyane wasadutsemo kabiri, byerekana ko noneho buri wese afite uburenganzira bwo kwegera intebe y’ubuntu y’Imana (4.14-16; Mat.27.50-51). “Amaturo …ibitambo, bitakibasha gutunganya rwose umutima w’ubitura”(9). Yesu ni we wabaye igitambo kimwe rukumbi cyanejeje Imana kandi, amaraso ye ni yo atwozaho gukiranirwa kose. Indir.83 Agakiza.