UMUSOMYI WA BIBILIYA, kuwa gatanu tariki ya 02/06/2017

UMUSOMYI WA BIBILIYA, ni igitabo gitegurwa n’UMURYANGO W’ABASOMA BIBILIYA MU RWANDA (Ligue Pour la Lecture de la Bible), kigamije gufasha abantu guhura n’Imana buri munsi mu ijambo ryayo. Uyu wa gatanu tariki ya 02/06/2017 turasoma muri Yobu 37.1-24:
1. “Ni ukuri ibyo bitera umutima wanjye guhinda umushyitsi, Umutima ugakuka.
2. Nimwumve yemwe nimwumve urusaku rw’ijwi ryayo, No guhinda kuva mu kanwa kayo.
3. Umuhindo waryo iwukwiza munsi y’ijuru hose, N’umurabyo wayo ikawugeza ku mpera z’isi.
4. Hanyuma yayo ijwi rikaririma, Igahindisha ijwi ry’icyubahiro cyayo, N’iyo iranguruye ijwi irekura imvura ikagwa.
5. Imana ihindisha ijwi ryayo bitangaje, Ikora ibikomeye tutabasha gusobanura.
6. Kuko ibwira shelegi iti ‘Gwa ku isi’, N’imvura yamagira na yo ikayibwira ityo, Ndetse n’imvura y’umurindi.
7. Igaganyaza amaboko y’abantu bose, Kugira ngo abo yaremye bose babimenye.
8. Kandi inyamaswa zigasesera mu bwihisho, Zikaguma mu burumba bwazo.
9. Umugaru urahindura uturutse ikusi, N’imbeho igaturuka ikasikazi.
10. Iyababa izanwa n’umwuka wo mu kanwa k’Imana, Maze amazi adendeje agafatana.
11. Ni ukuri itwaza ibicu bya rukokoma amazi, Isanza ibicu birimo umurabyo wayo.
12. Kandi irabiyobora bigakomeza kubunga, Kugira ngo bikore icyo ibitegetse cyose, Biri hejuru y’isi ituwemo n’abantu.
13. Igituma ibizana, Ni ukubihanisha igihugu cyayo no kukigirira ibambe.
14. “Umva ibi yewe Yobu, Hagarara witegereze imirimo y’Imana itangaza.
15. Mbese uzi uko Imana iyisohoza, Kandi uko itegeka umurabyo w’igicu cyayo kurabya?
16. Cyangwa se uzi uko ibicu bireretse, Yuko ari ibitangaza by’Iyo ifite ubwenge butunganye?
17. Ntuzi ko imyambaro yawe isusuruka, Iyo umuyaga w’ikusi woroshye mu gihugu?
18. Ese wabasha kubamba ijuru ufatanije n’Imana? Ko rikomeye nk’indorerwamo iyagijwe!
19. Utwigishe icyo dukwiriye kuyibwira, Kuko umwijima ari wo utubuza kubitunganya.
20. Mbese yabwirwa ko nshaka kuvugana na yo? Cyangwa se hariho umuntu wakwifuza kumirwa bunguri?
21. “Kandi n’ubu abantu ntibareba umucyo urabagiranira mu ijuru, Ariko umuyaga urahita ukeyura ibicu.
22. Ubwiza buhebuje bugaturuka ikasikazi, Imana ifite ubwiza buteye ubwoba.
23. Ishoborabyose ntabwo twabasha kuyishyikira, Ifite ububasha buhebuje, Kandi igira imanza zitabera no gukiranuka kwinshi, Nta bwo irenganya.
24. Ni cyo gituma abantu bayubaha, Ntabwo yita ku bantu bīgize abanyabwenge.”

Ikibazo kidufasha kurushaho gusobanukirwa:

1. Ibyo nsomye biranyigisha iki:
- Ku MANA Data wa twese?
- Kuri YESU KRISTO?
- Ku MWUKA WERA?
Ubusobanuro bw’umusomyi:

Imana ikora ibikomeye tutabasha gusobanura (5): Kwitegereza ubuhangange bw’Imana mu mirimo yayo, na byo biradukomeza mu gihe cy’ibigeragezo, kandi bikaduha guca bugufi imbere yayo. Guhinda kw’inkuba, kugwa kw’urubura, guhinduka kw’ikirere, imirabyo, byose ni yo iba ibiyoboye. Ishobora byose ntabwo twabasha kuyishyikira. Ifite ububasha buhebuje ariko ntishobora kurenganya (23). Ishoborabyose ntabwo twabasha kuyishyikira (23): Ifite ububasha buhebuje, ni umucamanza utabera, irakiranuka. Ariko kandi kurenganya ntikuba muri yo. Imana ifite ubushobozi buhambaye kuriya ni yo Mana yacu. Hari Umwana wari usinziriye mu ndege Se yari atwaye, iza kugera aho ihungabanywa n’ikirere, abarimo bagira ubwoba ko igiye guhanuka. Bamukanguye arabaza ati: Si Papa uyitwaye? Arongera arisinzirira! Yari yizeye ko Se azi gutwara bihagije ku buryo nta mpanuka yagira. Tubashije kwitegereza uku gukomera kw’Imana natwe twarushaho kuyizera n’ubwo twaba mu ngorane.

UWIMANA Ange Victor
Tel: (+250)788552883, (+250)725151463
Email: [email protected]