UMUSOMYI WA BIBILIYA, kuwa gatandatu tariki ya 01/07/2017

UMUSOMYI WA BIBILIYA, ni igitabo gitegurwa n’UMURYANGO W’ABASOMA BIBILIYA MU RWANDA (Ligue Pour la Lecture de la Bible), kigamije gufasha abantu guhura n’Imana buri munsi mu ijambo ryayo. Uyu wa gatandatu tariki ya 01/07/2017 turasoma muri Daniyeli 1.1-21:
1. Mu mwaka wa gatatu Yehoyakimu umwami w’Abayuda ari ku ngoma, Nebukadinezari umwami w’i Babuloni yateye i Yerusalemu arahagota.
2. Uwiteka Imana amugabiza Yehoyakimu umwami w’Abayuda hamwe n’ibintu bimwe byo mu nzu y’Imana, abijyana mu gihugu cy’i Shinari mu rusengero rw’imana ye, maze abishyira mu nzu y’ububiko bwayo.
3. Nuko umwami ategeka Ashipenazi umutware w’inkone ze, kuzana abana b’abasore bamwe bo mu Bisirayeli bo mu muryango w’umwami, n’ab’imfura bandi
4. batagira inenge, ahubwo b’abanyaburanga, b’abahanga mu by’ubwenge bwose, bajijuka mu byo kumenya, b’ingenzuzi mu by’ubwenge, kandi batinyuka guhagarara mu nzu y’umwami, kugira ngo abigishe ubwenge bw’Abakaludaya n’ururimi rwabo.
5. Nuko umwami abategekera igaburo ry’iminsi yose rivuye ku byokurya by’umwami, n’umusa wa vino umwami yanywagaho, kandi ngo babarere imyaka itatu nishira babone guhagarara imbere y’umwami.
6. Muri abo bana b’Abayuda harimo Daniyeli na Hananiya, na Mishayeli na Azariya.
7. Nuko uwo mutware w’inkone abahimba amazina: Daniyeli amwita Beluteshazari, na Hananiya amwita Saduraka, na Mishayeli amwita Meshaki, na Azariya amwita Abedenego.
8. Maze Daniyeli agambirira mu mutima we kutaziyandurisha ibyokurya by’umwami cyangwa vino yanywaga, ari cyo cyatumye yinginga uwo mutware w’inkone kugira ngo atiyanduza.
9. Kandi Imana yari yatumye Daniyeli atona ku mutware w’inkone, agakundwa na we.
10. Nuko umutware w’inkone abwira Daniyeli ati “Ndatinya umwami databuja wabategekeye ibyo muzarya n’ibyo muzanywa, kuko nasanga munanutse mudahwanye n’abandi basore mungana, muzaba munshyize mu kaga gatere umwami kunca igihanga.”
11. Nuko Daniyeli aherako abwira igisonga cyari cyategetswe n’umutware w’inkone kurera Daniyeli na Hananiya, na Mishayeli na Azariya ati
12. “Ndakwinginze gerageza abagaragu bawe iminsi cumi, baduhe ibishyimbo abe ari byo turya n’amazi yo kunywa,
13. uzabone gusuzuma mu maso hacu n’ah’abandi basore barya ku byokurya by’umwami, uko uzabibona abe ari ko uzagenza abagaragu bawe.”
14. Nuko abyumvise atyo yemera kubagerageza iminsi cumi.
15. Iyo minsi cumi ishize asanga mu maso habo ari heza, kandi habyibushye kuruta abandi basore bose baryaga ku byokurya by’umwami.
16. Nuko icyo gisonga kibakura kuri bya byokurya byabo, na vino bari bakwiriye kunywa akajya abaha ibishyimbo.
17. Maze abo basore uko ari bane, Imana ibaha kujijuka no kuba abahanga mu byo bigishwa no mu by’ubwenge, ariko Daniyeli yagiraga ubwenge bwo kumenya ibyerekanwa byose no gusobanura inzozi.
18. Nuko iyo minsi yo kubazana yategetswe n’Umwami Nebukadinezari ishize, umutware w’inkone ajya kubamumurikira.
19. Bahageze umwami aganira na bo, ariko mu bandi bose ntihabonetse uhwanye na Daniyeli na Hananiya, na Mishayeli na Azariya. Ni cyo cyatumye abagira abakozi be.
20. Mu ijambo ryose ry’ubwenge no kumenya, icyo umwami yababazaga, yabonaga barusha abakonikoni n’abapfumu bose bari mu gihugu cye cyose inkubwe cumi.
21. Nuko Daniyeli aguma aho, ageza ku mwaka wa mbere Umwami Kūro ari ku ngoma.

Ibibazo kidufasha kurushaho gusobanukirwa:

1. Ibyo nsomye birambwira ibya NDE, kandi biranyigisha IKI?
2. Mbese mu byo nsomye harimo:
- URUGERO RWIZA nakurikiza?
- URUGERO RUBI nakwirinda?

Ubusobanuro bw’umusomyi:

DANIYELI

Igitabo cyanditswe na Daniyeli mu gihe yari i Babuloni mu bunyage. Kidutekerereza inkuru zo mu gihe Abayuda bakandamizwaga n’abami b’abanyamahanga. Izo nkuru zigamije gufasha Abayuda kwihangana, bakiringira ko Imana izahirika ingoma z’abo bami igasubiza ubwoko bwayo ubusugire. Daniyeli yajyanywe i Babuloni akiri umwana, mbere y’uko Ezekiyeli ahanura. Yari umuhanga kandi yubahaga Imana cyane. Igitabo cya Daniyeli cyanditswe mu myaka 600 mbere yo kuvuka kwa Yesu. Kigizwe n’ibice 12, ibice 6 bibanza bivuga imibereho ya Daniyeli na bagenzi be mu myaka 70 y’ubunyage. Ibice bisigaye bivuga ubuhanuzi bw’ibizaba. Iki gitabo kigaragaza ubuhangange bw’Isumbabyose, ikora ibidashoboka birenze ibyo ubwenge bw’abantu bwatekereza kandi ko ibana muri byose n’ugendana na yo. Imana yemera ko abizera bageragezwa ariko ntibahana mu bigeragezo, irabarinda. Ibice 6 bya nyuma bihanura iby’ubwoko bw’Abayuda kugeza ku kuvuka kwa Yesu. Iki gitabo kirimo n’ubuhanuzi bwavugaga ibyari kuzabaho ku isi, uko ibihe bizakurikirana kugeza igihe Yesu ari we Mesiya azagarukira ari mu cyubahiro.

Umwami ategeka Ashipenazi gutoranya abana b’abasore (3): Aba basore barimo Daniyeli, bari i Babuloni barajyanyweho iminyago, ubwo Nebukadinezari yatsindaga Yehoyakimu umwami w’i Buyuda (2 Abami 24.2-3). Daniyeli na bagenzi be bahinduriwe imirimo kuko bari bujuje byinshi mu byasabwaga (3-4). Hari igihe umuntu ahabwa umurimo bikagaragara nk’ibisanzwe, nyamara Imana yo ifite icyo igambiriye kuzamukoresha. Uwo mutware w’inkone abahimba amazina: (7): Gucengezwamo umuco w’abakaludaya, byasabaga ko batakaza ibibagaragazaho imico y’abayuda. Daniyeli nta bushobozi yari afite bwo kwanga izina, ariko yagambiriye mu mutima we kutarya no kutanywa ibyaterekerejwe imana z’abanyamahanga (8). Impano Imana yamuhaye yo gutona ku mutware w’inkone yayikoresheje neza, maze ibyo yasabye byakirwa neza, na bagenzi be batatu babyungukiramo. Ese ujya ugira ibyo wemera kureka kubw’urukundo ukunda Kristo, nubwo byaba bigaragarira abandi nko kubura ubwenge? Zirikana: Abubaha Imana nayo irabubaha (1Sam.2.30b): Imana ntiyabatereranye. Mu gihe cyo kumurikirwa umwami, mu bandi bose ntihabonetse uhwanye na bo. Indir.388 Gushimisha.

UWIMANA Ange Victor
Tel: (+250)788552883, (+250)725151463
Email: [email protected]