UMUSOMYI WA BIBILIYA , Kuwa kabiri 2 Ukwezi kwa gatanu Matayo 13.16-23

“Ariko amaso yanyu arahirwa kuko abona, n’amatwi yanyu kuko yumva. Ndababwira ukuri, yuko abahanuzi benshi n’abakiranutsi bifuzaga kureba ibyo mureba ntibabibone, no kumva ibyo mwumva ntibabyumve. “Nuko nimwumve umugani w’umubibyi. Uwumva wese ijambo ry’ubwami ntarimenye, Umubi araza agasahura ikibibwe mu mutima we. Uwo ni we usa n’izibibwe mu nzira. Kandi usa n’izibibwe ku kara, uwo ni we wumva ijambo, uwo mwanya akaryemera anezerewe, ntagire imizi muri we, maze agakomera umwanya muto. Iyo habayeho amakuba cyangwa kurenganywa azira iryo jambo, uwo mwanya biramugusha. Kandi usa n’izibibwe mu mahwa, uwo ni we wumva ijambo, maze amaganya y’iyi si n’ibihendo by’ubutunzi bikaniga iryo jambo ntiryere. Kandi usa n’izibibwe mu butaka bwiza, uwo ni we wumva ijambo akarimenya, akera imbuto umwe ijana, undi mirongo itandatu, undi mirongo itatu.”

Ibibazo bidufasha kurushaho gusobanukirwa:

1. Ibyo nsomye biranyigisha iki:
- Ku MANA Data wa twese?
- Kuri YESU KRISTO?
- Ku MWUKA WERA?
2. Mbese mu byo nsomye harimo:
- URUGERO RWIZA nakurikiza?
- URUGERO RUBI nakwirinda?

Ubusobanuro bw’umusomyi:

Amaso yanyu arahirwa kuko areba, n’amatwi yanyu kuko yumva (16): Yesu yahaga abigishwa be igihe, akabasobanurira inyigisho bumvise. Muri uyu mugani, Imbuto zabibwe ni ijambo ry’Imana ryigishijwe na Yesu, n’abigishwa ndetse n’abandi babasimbuye. Izaguye mu nzira ni abigishijwe ariko bakiziba amatwi ntibumvire Umwuka. Iby’isi ni byo bibuzuye, bityo bemerera satani gusahura ibyo bumvise (Yes.6.9-10). Imbuto zabibwe ku kâra ziranga abakristo ba nyabo iyo ibintu bigenda neza. Ijambo ry’Imana riba rigwiriye, ariko batwarira ibintu hejuru kuburyo badashobora kuryuza. Iyo bahuye n’ibigeragezo, ibyo bizeye ntibatinda kubivamo. Imbuto zaguye mu mahwa zo ziranga abantu bagaragara nk’abiteguye kwakira ubutumwa. Ariko bakunda ubutunzi ku buryo kubukurikirana biniga iby’Imana. Imbuto zabibwe mu butaka bwiza zo zigereranywa n’abakristo bumvise ibyo ijambo ry’Imana rivuga, bakagira umuhati wo kurishyira mu bikorwa. Abo ni bo bumvise amagambo ya Yesu, baramwizera, baramukurikira, bitondera amategeko ye (Yoh.14.21). Gusenga: Mana yacu, uduhe inzara y’ijambo ryawe, kugira ngo twemere gutungwa na ryo, natwe tubone uko dutungisha benshi (Amosi 8.11).